Bierlinski hurt «ŠOS-bend»: «U Biełarusi nas čakaje basiejn ź siernaj kisłatoj»

Biełarus, ukrainiec, hruzinski cyhan i habrej zasnavali ŭ Berlinie muzyčny prajekt, jaki nazvali «ŠOS-bend». Svoj pieršy internet-synhł «KHB – Kali Hospadu Balić» muzyki prezentujuć na «Tuzinie Hitoŭ». «Kali jany spuskajuć sabakaŭ na tych, chto słuchaje kanservavanaha Coja, dyk žyvuju rybu buduć hłušyć u basejnach ź siernaj kisłatoj», - miarkuje lider hurta Michał.

Aŭtar tekstaŭ i vakalist «ŠOS-bendu» nazyvaje siabie «Panam Michałam ź Lipsku». U 90-ch jon byŭ davoli viadomym čałaviekam u mienskim kulturnym asiarodździ. Pan Michał pracavaŭ u hazecie «Imia», hraŭ u składzie mienskaha chevi-metał hurta SPIRIT, mieŭ solny prajekt NCHŁ. «Ja zaŭždy byŭ kulturnym pravakataram», - kaža muzyka. U 1996 hodzie ŭ jaho ŭdałosia aficyjna vydać albom NCHŁ «Muzyka dla chokkieistov». U adnoj ź piesień jon śpiavaŭ, jak «tovariŝ Łukašienko na korkie apielsinovoj słomał nohu».

Z paŭmiesiacy kaseta pradavałasia na ŭsich bujnych kropkach u Miensku, ale niejki pilny słuchač nastukaŭ na jaho ŭ firmu-vydaŭca i albom byŭ prybrany z palicaŭ.

Pan Michał u tyja časy jaŭna karystaŭsia słabaj idealahičnaj pilnaściu dziaržaŭnych strukturaŭ: «U časy hłybokaha ŭžo Łžesašy ŭ ratacyju na biełaruskaje dziaržaŭnaje radyjo ŭdałosia ŭkinuć maju pieśniu, dzie śpiavałasia tak: "Pajdu słužyć miantom/ Nie daj Boh ciabie złaŭlu/Ŭsiu dubinku pałamlu"», - z zamiłavańniem zhadvaje jon.

Na pačatku 00-ch Pan Michał pierabraŭsia ŭ Berlin, dzie ŭziaŭsia aktyŭna prasoŭvać biełaruskuju kulturu.

«Michałok tut niejak pabyvaŭ, dyk potym raspaviadaŭ usim pra cikavy artystyčny kvartał Krojcberh. Dyk ja ŭ tym Krojcberhu, tureckim darečy rajončyku, niechta nakštałt kulturnaha načalstva», - kaža jon.

Sioleta vyśpieła ŭ Michała i ideja muzyčnaha prajektu, jaki nazvali «ŠOS-bend». U skład jaho jašče ŭvajšli ŭkrainiec, hruzinski cyhan i habrej. «Ja panapisaŭ vieršaŭ dy kryču, a siabra moj, cyhan Roma piša muzyku dy hraje na hitary», - raspaviadaje muzyka. Jon nie nazyvaje svajho sapraŭdnaha proźvišča, bo «ranavata pakul», ale abiacaje zrabić heta nieŭzabavie.

«ŠOS-bend» prezentujuć na «Tuzinie Hitoŭ» svoj debiutny internet-synhł, jaki zaviecca «KHB – Kali Hospadu Balić».

U Miensk pryjazdžać hurt Pana Michała pakul nie planuje: «Kali jany spuskajuć sabakaŭ na tych, kaho chapaje tolki na toje, kab nacisnuć na pimpačku z kanservavanym Cojem, dyk žyvuju rybu, miarkuju, buduć hłušyć u basejnach ź siernaj kisłatoj. Mieŭ honar viedać asabista dziadulek biełaruskaj litaratury Hrachoŭskaha i Skryhana, dyk jany mnie sioje-toje na hety kont raspaviadali».

Słuchać tut

• 0
• 0
• 0
• 0
• 0