Prezident Rasii Dźmitryj Miadźviedzieŭ ličyć, što kiraŭnictva Siryi «čakaje sumnaja dola», kali jano nie pojdzie na dyjałoh z apazicyjaj i na reformy.
«Padčas našych asabistych znosinaŭ i ŭ listach, jakija ja prezidentu Siryi nakiroŭvaŭ, ja pravodžu adnu ideju: treba terminova pravodzić reformy, mirycca z apazicyjaj, adnaŭlać hramadzianski mir i stvarać sučasnuju dziaržavu», — zajaviŭ Miadźviedzieŭ u intervju Pieršamu infarmacyjnamu kaŭkazskamu kanału, telekampanii Russia Today i radyjostancyi «Echo Moskvy».
«Kali jon nie zmoža hetaha zrabić, jaho čakaje sumnaja dola, i ŭ kančatkovym vyniku nam daviadziecca prymać niejkija rašeńni», — dadaŭ Miadźviedzieŭ. Da hetaha času Rasija była kateharyčna suprać lubych sankcyj u dačynieńni da siryjskaha režymu.
Napiaredadni siryjskija ŭłady žorstkaj krytycy padvierhnuŭ pradstaŭnik Miadźviedzieva Michaił Marhiełaŭ, faktyčna abvinavaciŭšy prezidenta Bašara Asada ŭ raźviazvańni krovapralićcia.
Prezident Rasii nie staŭ naŭprost paraŭnoŭvać situacyju ŭ Siryi, Livii ź situacyjaj u Hruzii ŭ žniŭni 2008 hoda.
«Heta vielmi indyvidualnyja rečy», — ličyć jon.
«U Livii jość čałaviek, jaki 40 hadoŭ kiruje krainaj, i jon vyrašyŭ užyć siłu suprać svajoj krainy, — praciahnuŭ Miadźviedzieŭ. — My nie ličym heta pravilnym».
«U Hruzii zadača była ŭ tym, kab sklejvać krainu, a Livija pakul nie raspałasia», — dadaŭ jon.
«Siryja — heta bolš składanaja tema, tam situacyja raźvivajecca bolš dramatyčna, — ličyć Miadźviedzieŭ. — Kadafi addaŭ vielmi žorstkija ŭkazańni pa źniščeńni apazicyi, a ciapierašni prezident Siryi takich ukazańniaŭ nie addavaŭ, ale, na žal, i tam hinuć ludzi ŭ vialikaj kolkaści, i heta vyklikaje naša vialikuju zaniepakojenaść».
Pazicyja Rasii pa Siryi mocna źmianiłasia za apošni čas. U kancy maja ŭ intervju Financial Times Miadźviedzieŭ kazaŭ, što jamu škada prezidenta Siryi, jaki «spaźniŭsia z reformami».
Skandał u «Jeŭraopcie». 96‑hadovamu dziadulu nie dazvolili prysieści na kresła kala kasy20
Kamientary