Artykuł z takim nazovam źjaviŭsia ŭ litoŭskaj hazecie Lietuvos žinos. Aŭtar Rasa Kalinaŭskajcie praciahvaje daśledavać temu najaŭnaści ŭ spravie Alesia Bialackaha pryvatnych intaresaŭ niekatorych litoŭskich jurystaŭ i biznesoŭcaŭ.
Padpisańnie damovy ź litoŭskimi biznesoŭcami ŭ mahiloŭskim abłvykankamie 28 lutaha 2011.
Paśla mižnarodnaha skandału vakoł zdrady ŭ dačynieńni da biełaruskaha dysydenta, zdadzienaha režymu Alaksandra Łukašenki (inšaja forma toj samaj zdrady — vydača vizy namieśnicy ministra justycyi Biełarusi Ale Bodak, uklučanaj ŭ čornyja śpisy Eŭraźviazu) litoŭskija ŭłady nastomna sprabuć davieści, što heta tolki vypadkovaje nieparazumieńnie, jakoje ŭźnikła z-za niedastatkovaj kaardynacyi i systemnych niedachopaŭ, jakija, pavodle premjera Andrusa Kubilusa, isnavali ŭžo dvaccać hadoŭ. Ci heta sapraŭdy tak? Redakcyja LŽ maje dokazy, što zdradu mahli pradvyznačyć tolki što padpisanyja prybytkovyja damovy, što za kulisami hetych novych ździełak i haniebnaj zdrady milhajuć tyja samyja postaci. Tak što heta nia prosta zdrada, a zdrada za hrošy.
Siamiejny biznes
Za niekalki dzion da pryniaćcia Ministerstvam justycyi (MIU) rašeńnia ab vydačy režymu Alaksandra Łukašenki bankaŭskich dadzienych biełaruskich dysydentaŭ Alesia Bialackaha i Valancina Stefanoviča, biełaruskija ŭłady błasłavili nadzvyčaj bujnuju investycyju litoŭskich biznesoŭcaŭ u Mahiloŭskaj vobłaści. Pry padpisańni damovy ab hetaj investycyi na sumu 77 miljonaŭ eŭra litoŭskich biznesoŭcaŭ kansultavała biełaruskaje biuro advakackaj kantory «Bernotas & Dominas Glimstedt», jakoje kuryruje partner hetaj kantory Ehidzijus Biarnatas.
Amal adrazu paśla padpisańnia damovy žonka E.Biarnatasa, byłaja dyrektarka Departamentu mižnarodnaha prava MIU Aŭšra Biarnacienie pryniała rašeńnie zadavolić prośbu biełaruskaha boku ab pravavoj dapamozie ŭ spravie apazycyjnych dziejačoŭ. Zapalić zialonaje śviatło dla litoŭskaha biznes-prajektu pradpisała biełaruskaja ŭłada. Što heta — supadzieńnie abo cyničny handal, pry jakim źviestki ab biełaruskich dysydentach byli zdadzienyja ŭ abmien na dazvoł litoŭskim biznesoŭcam pačać realizacyju prajektu, jaki byŭ zaplanavany jašče paŭtara hoda tamu, ale doŭha čakaŭ błasłavieńnia aficyjnaha Miensku?
Abaviazańnie najvyšejšych uładaŭ
28 lutaha 2011 hodu ŭ vykankamie Mahiloŭskaj vobłaści ZAT «Vakarų medienos grupė» («Zachodniaja hrupa draŭniny»), u asobie hieneralnaha dyrektara Viktara Adamajcisa i pradpryjemstva «Mebelain» kancernu SBA u asobie dyrektara Alaksandra Hardziejčyka, padpisali z staršyniom mahiloŭskaha abłvykankamu Piatrom Rudnikam damovu ab budaŭnictvie zavodaŭ u Mahiloŭskaj svabodnaj ekanamičnaj zonie (Mahiloŭskaja SEZ).
Pavodle hetaj damovy, «Vakarų medienos grupė» planuje da 2012 hodu pabudavać kompleks drevaapracoŭčych i meblevych fabryk, jaki zojmie płošču 22 ha. U prajekt praduhledžana investavać bolš za 77 miljonaŭ eŭra. Kancern SBA źbirajecca na dzialancy płoščaj 6,5 ha pabudavać zavod «Mebelain», planavanyja investycyi - 43,66 miljonaŭ litaŭ (12,65 miljonaŭ eŭra). Kompleks składuć zavody, jakija ź miascovaj syraviny — draŭniny ź biełaruskich lasoŭ — buduć vyrablać DSP, korpusnuju meblu i faneru. Usia pradukcyja vudzie ekspartavacca, hałoŭny pakupnik — meblevy kancern IKEA. Ułady Mahiloŭskaj vobłaści vydzielili na prajekt litoŭskich biznesoŭcaŭ dzialanku ziamli płoščaj 35,5 ha.
Aprača hetaha «Vakarų medienos grupė» padpisała z vykankamam pratakoł ab namierach nakont stvareńnia lesapramysłovaha kłasteru, pavodle jakoha litoŭskija biznesoŭcy razam ź Biełaruśsiu buduć zasnoŭvać supolnyja pradpryjemstvy narychtoŭki lesu i lahistyki.
U cyrymonii padpisańnia damovy ŭdzielničaŭ nadzvyčajny i paŭnamocny pasoł Litvy ŭ Biełarusi Edminas Bahdonas i kamercyjny ataše Ministerstva haspadarki Litvy Edvinas Kaminskas. Staršynia abłvykankamu P.Rudnik zapeŭniŭ, što ŭładnyja ŭstanovy akažuć litoŭskim biznesoŭcam usiebakovuju dapamohu.
Rašeńnie nakont hetaj investycyi pryniali najvyšejšyja biełaruskija ŭłady. Na sajcie Mahiloŭskaj SEZ paviedamlajecca, što 18 lutaha 2011 hodu Saviet ministraŭ Biełarusi pryniaŭ pastanovu №204, jakoj abaviazaŭ staršyniu Mahiloŭskaha abłvykankamu P.Rudnika padpisać damovu z «Vakarų medienos grupė».
Hałoŭny jurydyčny daradca
U dzień padpisańnia damovy dziaržaŭnaja Biełaruskaja televizija pakazała repartaž, dzie hety prajekt byŭ nazvany najbujniejšaj investycyjaj litoŭskaha kapitału ŭ Biełarusi, uzhadnieńnie jakoj ciahnułasia paŭtara hoda. Cytavalisia litoŭskija biznesoŭcy, jakija vykazvali škadavańnie, što ich prychod u Biełaruś tak zaciahnuŭsia.
Na sajcie Mahiloŭskaj SEZ paviedamlajecca, što padrychtoŭka da investycyi raspačałasia jašče 26 červienia 2009 hodu, kali ŭ SEZ jak pradpryjemstva-rezydent było zarehistravanaje prynaležnaje «Vakarų medienos grupė» tavarystva «Industri». Jak i jakimi srodkami možna było paŭździejničać na Miensk, kab jon mienavita ciapier błasłaviŭ tak doŭha ŭzhadnianuju damovu?
Jak paviedamlajecca na sajcie advakackaj kantory «Bernotas & Dominas Glimstedt», pry padrychtoŭcy damovy ab investycyjach u Mahiloŭskaj vobłaści hetaja kantora była hałoŭnym jurydyčnym daradnikam «Vakarų medienos grupė». Prajekt kaardynavała partnerka kantory ŭ Biełarusi Darja Žuk.
Jak užo paviedamlała hazeta LŽ, zasnavańnie biełaruskaha biuro kantory «Bernotas Dominas Glimstedt» inicyjavaŭ i ciapier kuryruje partner hetaj kantory, muž byłoj kiraŭnicy Departamentu mižnarodnaha prava MIU Aŭšry Biarnacienie E.Biarnatas.
U toj samy čas, kali Saviet ministraŭ Biełarusi daručyŭ mahiloŭskamu hubernataru P.Rudniku padpisać damovu z kansultavanaj kantoraj E.Biarnatasa «Zachodniaj hrupaj draŭniny», Ministerstva justycyi Litvy vyrašała pytańnie nakont vydačy infarmacyi dysydentaŭ.
Jak paviedamiła MIU, zapyt Biełarusi ab pravavoj dapamozie z prośbaj dać infarmacyju pra ruch hrašovych srodkaŭ A.Bialackaha byŭ atrymany 2 lutaha 2011 hodu.
2 sakavika — usiaho praź niekalki dzion paśla padpisańnia investycyjnaj damovy — MIU dasłała ŭ bank list z prośbaj dać patrabavanyja dadzienyja. Hety list padpisała byłaja kiraŭnica Departamentu mižnarodnaha prava A.Biarnacienie.
Kali adzin z bankaŭ admoviŭsia dać źviestki, A.Biarnacienie vyjaviła nieŭłaścivuju litoŭskim čynoŭnikam starannaść i pryncypovaść — padpisała i zvarot u sud, kab toj zapatrabavaŭ ad banku vydaču źviestak.
Zdabyŭšy infarmacyju praz sud, 28 sakavika MIU Litvy pierasłała dadzienyja ab rachunkach biełaruskich dysydentaŭ Ministerstvu justycyi Biełarusi.
Paśla taho, jak LŽ paviedamiła pra intaresy advakackaj kantory E.Biarnatasa ŭ Biełarusi, Najvyšejšaja kamisija słužbovaj etyki atrymała zajavu deputata Sojmu Saŭlusa Stomy z prośbaj pravieści raśśledavańnie ab mahčymym kanflikcie publičnych i pryvatnych intaresaŭ A.Biarnacienie. Adnak A.Biarnacienie ź ministerstva ŭciakła.
Paśla taho, jak A.Biarnacienie zvolniłasia z pasady, Kamisija słužbovaj etyki painfarmavała, što raśśledavańnie pravodzicca nia budzie. Tak što nia budzie adkazu i na pytańnie, jakoha pamieru ŭznaharoda za paśpiachovuju ździełku ŭ Mahiloŭskaj vobłaści papoŭniła siamiejny biudžet advakata E.Biarnatasa i byłoj čynoŭnicy MIU A.Biarnacienie. I ci tolki biudžet hetaj siamji (u Litvie)?
Hetaja tema nie zacikaviła i mižviedamasnuju kamisiju, jakoj było daručana daśledavać hetuju historyju, jakaja spryčyniła vielizarnuju i badaj što niepapraŭnuju škodu mižnarodnaj reputacyi Litvy. Adnak mižviedamasnaja kamisija asabliva i nie prykidałasia, nibyta šukaje sapraŭdnych vinavatych u hetym skandale, a Ministerstva zamiežnych spravaŭ navat nie pačało raśśledavańnia ŭ spravie vydačy vizy niepažadanym u Eŭraźviazie asobam. U zajavach pradstaŭnikoŭ ułady hety incydent, jaki na dziva nahadvaje cyničny handal, padajecca jak vypadkovaje nieparazumieńnie, jakoje ŭźnikła z-za niedastatkovaha supracoŭnictva roznych ustanovaŭ. Adnak, jak śviedčyć damova ŭ Mahilovie, ustanovy supracoŭničajuć vielmi dobra. Viadoma, kali adčujuć pach prybytku.