Siońnia startuje 20-y čempijanat Biełarusi pa chakiei

Siońnia piaćciu matčami ŭ Minsku, Breście, Homieli, Mahilovie i Salihorsku startuje 20-y čempijanat Biełarusi pa chakiei ŭ ekstralizie.

Usiaho ŭ biełaruskaj chakiejnaj ekstralizie vystupiać 11 kamandaŭ ź dźviuch krain: «Junactva» (Minsk), «Nioman» (Hrodna), «Mietałurh» (Žłobin), «Šachcior» (Salihorsk), «Homiel», «Mietałurhs» (Lijepaja, Łatvija), «Brest», «Chimik-SKA» (Navapołack), «Mahiloŭ», «Viciebsk» i «Lida».

U paraŭnańni ź minułym siezonam kolkaść udzielnikaŭ skaraciłasia na adnu kamandu. Byŭ rasfarmavany babrujski «Šyńnik», jaki zaniaŭ apošniaje miesca i ciapier budzie supracoŭničać ź minskim «Dynama», a minska-babrujskaja družyna «Dynama-Šyńnik» zamienić «Minskich zubroŭ» u Maładziožnaj chakiejnaj lizie, dzie ŭ novym siezonie buduć hulać pradstaŭniki Rasii, Biełarusi, Łatvii, Kazachstana i Słavakii. Z-za finansavych prablem admoviŭsia ad vystupu ŭ adkrytym čempijanacie Biełarusi ŭkrainski «Sokał» z Kijeva. Źjavicca ŭ biełaruskaj ekstralizie i debiutant. Im stanie stvorany minułaj viasnoj kłub «Lida».

Hvazdom startavaha tura stanie pajadynak pamiž čempijonam i vice-čempijonam krainy minułaha siezonu staličnaj «Junactvam» i hrodzienskim «Niomanam», jaki adbudziecca na Krytym katku ŭ minskim parku Horkaha i pačniecca ŭ 18.30. U hety ža čas pačnucca matčy i ŭ inšych haradach: «Brest» — «Lida», «Homiel» — «Mietałurhs» (Lijepaja, Łatvija), «Šachcior» (Salihorsk) — «Chimik-SKA» (Navapołack), «Mahiloŭ»- «Viciebsk».

U rehularnym čempijanacie ŭdzielniki ekstralihi zhulajuć u piać kołaŭ. Zavieršycca papiaredniaja stadyja 1 sakavika 2012. Miedali čempijanatu buduć razyhrany na druhim etapie pa sistemie płej-of, kudy vychodziać vosiem lepšych kłubaŭ.

Najbolš značnym źmianieńniem ŭ rehłamiencie adkrytaha čempijanatu Biełarusi źjaŭlajecca ŭviadzieńnie ŭzrostavaha limitu, jaki, zrešty, nie tyčycca zamiežnaha ŭdzielnika turniru lijepajski «Mietałurhsa». U majučym adbycca siezonie biełaruskija kamandy ekstralihi mohuć unieści ŭ zajaŭku nie bolš za 7 chakieistaŭ starej za 28 hadoŭ (1983 hoda naradžeńnia). Limit na lehijanieraŭ u zajavačnym śpisie kamandy z 25 čałaviek abmiežavany šaściu zamiežnikami. Pryčym, kali bramnik nie maje biełaruskaha pašparta, kvota skaračajecca da 5 čałaviek (adzin hałkipier i čatyry palavyja chakieisty).

Pačatak matčaŭ ekstralihi ŭ budnyja dni — 18.30, u suboty, niadzieli i śviatočnyja dni — u 13.00 u Minsku i ŭ 17.00 — u inšych haradach.

Čaściej za ŭsich — šeść razoŭ — čempijonam Biełarusi stanaviłasia minskaje «Junactva» (2004, 2005, 2006, 2009, 2010, 2011). Akramia «Junactva», zołata čempijanataŭ Biełarusi vyjhravali taksama minski «Civali» (1993, 1994, 1995, 2000), hrodzienski «Nioman» (1998, 1999, 2001), navapołacki «Palimir» (1996, 1997), minski «Kieramin» (2002, 2008), «Homiel» (2003) i minskaje «Dynama» (2007).

• 0
• 0
• 0
• 0
• 0
• 0
• 0
• 0