«Bardak u krainie nadakučyŭ usim»

Kali čakać stabilizacyi kursu valut? Kolki budzie kaštavać dalar u najbližejšy čas? Ci vierniecca kraina ŭ «lichija 90-ja»? Ci jość u Biełarusi niejkaja pierśpiektyva? Za kolki možna nabyć dalary ŭ Homieli? Viadomyja dziejačy biełaruskaha sportu adkazvajuć na hetyja i inšyja pytańni Goals.by.

«Nie bačyŭ «valutčykaŭ»

Alaksandr Šumidub (trenier CHK «Homiel»)

«Vieru, što najbližejšym časam kurs dalara pavinien stabilizavacca. Ja, viadoma, nie ekanamist, ale ŭpeŭnieny, što ŭsio, jak skazaŭ prezident, budzie stabilna da siaredziny vieraśnia. Pavinnyja adbycca tarhi na valutnaj biržy, a adtul užo i budziem skakać. Nie mahu skazać, na jakim uzroŭni ŭstalujecca kurs amierykanskaj valuty. Viedaju tolki bankaŭski kurs, a što tam na čornym rynku robicca, mnie nasamreč nieviadoma. Surjozna, navat «valutčykaŭ» pakul nidzie nie bačyŭ. Dy i z rodnymi my ekanamičnyja prablemy nie abmiarkoŭvajem.

Nakolki ja viedaju, ludzi mohuć kupić valutu ŭ bankach pa śpiecyjalnych dazvołach dla pajezdak abo inšych važnych metaŭ. Ja sam valuty nie nabyvaju, navošta jana mnie pakul? Kali b mnie treba było kudyści jechać, to ja b zadumaŭsia z hetaj nahody. My ž pajedziem u Łatviju tolki bližej da Novaha hoda, a tady, ja spadziajusia, situacyja ŭžo całkam narmalizujecca, i valutu možna budzie nabyć svabodna. Na jakoj padstavie ja nie pavinien vieryć zajavam prezidenta? "

«Heta žach!»

Rusłan Bajdakoŭ (hałoŭny trenier BK «Łakamatyŭ — KiS»)

«Ščyra kažučy, u stabilizacyju kursu valuty vielmi chaciełasia b vieryć. Tamu što toj bardak, jaki robicca ŭ krainie, nadakučyŭ usim: i zamožnym, i małamajomasnym, i biednym. Chočacca choć niejkaj stabilnaści. Chaj užo kurs dalara budzie vialikim, chaj maleńkim, u što słaba vierycca, chaj siarednieńkim, što kudy ni išło, ale hałoŭnaje, kab usio stała stabilna. Bo ciapier znoŭ nastupili dalokija 90-ja hady, kali ŭ śviadomaści ludziej užo niama ni himna, ni ściaha, ni Radzimy — ničoha. Sucelnaje dušeŭnaje spustašeńnie. I hałoŭnaje, niama nijakaj pierśpiektyvy — ty bješsia, jak hałavoj ab ścianu.

A nakont terminaŭ naviadzieńnia paradku treba spytać u ludziej vyšej. Ad mianie sapraŭdy ničoha nie zaležyć. Ja rablu ŭsio, za što adkazvaju, sumlenna pracuju, i vieru ŭ dobruju budučyniu. Pakul jašče. Chaciełasia b, kab kurs dalara nie pieravysiŭ 10 tysiač biełaruskich rubloŭ. Bo ŭ advarotnym vypadku heta piarojdzie ŭsiakija miežy. Budzie vialikim pytańniem, jak u kramach raźličvacca. Valuty nie nabyvaju, tamu što niama za što. Ciapier paraŭnoŭvać naš rubiel z dalaram — prosta śmiešna. Nie viedaju, što jany tam źvierchu mohuć zrabić, ale toje, što adbyvajecca, — heta žach».

«U krainie šmat valuty»

Siarhiej Biabieška (hałoŭny trenier HK «Dynama»)

«Ja nie dumaju, što niechta vieryć u chutkuju stabilizacyju kursu dalara. Niama padstavaŭ dla takoha aptymizmu. A sam kurs budzie zaležać ad taho, jak projduć tarhi na dadatkovaj siesii, i ad interviencyi Nacbanka. Mnie zdajecca, što ŭ vypadku interviencyi kurs dalara pavinien spynicca ŭ rajonie 7 tysiač. U advarotnaj ža situacyi my ŭbačym vosiem-dzieviać. Pa-mojmu, ciapier kožny sočyć za navinami ekanomiki, bo ŭ sporcie šmat što zaležyć ad hetaha.

U pryncypie, ciapier u mianie niama mahčymaści nabyć valutu. Zarabotnuju płatu my atrymlivajem u biełaruskich rublach, tamu zastajecca tolki čakać hetaj samaj dadatkovaj siesii i spadziavacca, što dalar źjavicca ŭ prodažy. Bo kupla i prodaž valuty nie ŭ bankach nielehalny, i lepš z hetaj spravaj nie hulać.

Dumaju, što dalar moža najbližejšym časam źjavicca ŭ abmieńnikach, ale pa vielmi vialikim kursie. Tamu budzie mała achvotnych jaho nabyć. Mnie zdajecca, u krainie ciapier davoli šmat valuty, usie jaje prytrymlivajuć i čakajuć stabilizacyi kursu. Nie dumaju, što z takoj zarpłataj, jak u Biełarusi, ludzi zmohuć žyć narmalna — jany buduć prosta vymušanyja zdavać svaje valutnyja źbieražeńni. Ale ŭsie chočuć zrabić heta pa vyhadnym kursie, a nie pa tym, jaki ciapier vystaŭleny Nacbankam».

«Praz paŭhoda „zanački“ skončacca»

Janina Karolčyk (zasłužany majstar sportu Respubliki Biełaruś, alimpijskaja čempijonka ŭ šturchańni jadra)

«Pa-mojmu, kurs valuty pavinien stabilizavacca ŭ chutkim časie. Napeŭna, da kanca vieraśnia. Bo biez hetaha prosta nijak! Šmat tavaraŭ treba nabyvać za miažoj. Jeździć za miažu taksama treba. Asabliva heta datyčyć spartoŭcaŭ. Adnak na vypraŭleńnie situacyi ŭ krainie spatrebicca čas: usio adbyłosia tak chutka, i ludzi byli prosta nie hatovyja. Narod naohuł nie viedaje, čaho čakać. Ciapier kurs dalara na rynku składaje 7500 — 8000 rubloŭ. Mnie, viadoma, chaciełasia b, kab jon byŭ mienšy. Dumaju, što ŭsio-taki jon nie pieravysić adznaku ŭ 10000. A pakul ja valuty nie nabyvaju, nie chočacca karystacca nielehalnymi abmieńnikami. U ludziej jašče nie skončylisia staryja zapasy valuty. Adnak projdzie dzieści paŭhodzika, i ŭsie zanački pry takoj situacyi skončacca».

«Prapanoŭvali dalary pa kursie 7300»

Maksim Lisavy (forvard FK «Homiel»)

«Rana ci pozna kurs pavinien stabilizavacca. Kažuć, što hetaje pytańnie musić vyrašycca da kanca miesiaca. Mnie zdajecca, što da hetaha času kurs dalara spynicca na adznacy 8000 rubloŭ. A taki pavarot padziej niepryjemny dla ŭsich. Pa-pieršaje, u nas zarobki byli raźličanyja pa inšym kursie, a pa-druhoje, ceny vyraśli davoli surjozna. Hetaja prablema datyčyć nie tolki mianie jak lehijaniera, ale i ŭsich biełarusaŭ. Bo ŭsie stali atrymlivać mienš hrošaj.

Asabista ja jašče ŭ Babrujsku karystaŭsia pasłuhami „valutčykaŭ“. A ŭ Homieli mnie apošni raz prapanoŭvali kupić dalary pa kursie 7300. Dumaju, treba pačakać, a potym užo nabyvać valutu, kali budzie stabilny aficyjny kurs. A pakul ad mianie ŭsio roŭna ničoha nie zaležyć, tamu hladžu ŭ budučyniu z aptymizmam. Kali b ja moh paŭpłyvać na dadzienuju situacyju, tady možna było b chvalavacca».

• 0
• 0
• 0
• 0
• 0
• 0
• 0
• 0