Napiaredadni novaha navučalnaha hoda biełaruskija prafsajuzy vydzielili členam svaich arhanizacyj bolš jak 4 młrd. rubloŭ na padrychtoŭku dziaciej da škoły.
Jak paviedamili ŭ pres-słužbie Fiederacyi prafsajuzaŭ Biełarusi (FPB), materyjalnaja dapamoha z prafsajuznaha biudžetu vydzialałasia siemjam, što vychoŭvajuć dziaciej školnaha ŭzrostu. Aprača taho, za srodki hetaha biudžetu nabyvalisia školnyja pryłady, padručniki, a taksama kancylarskija tavary, adzieńnie i abutak.
Suma materyjalnaj dapamohi, vydzielenaja prafsajuzami na padrychtoŭku dziaciej da škoły sioleta, bolš čym u 10 razoŭ vyšejšaja za anałahičnuju finansavuju padtrymku, akazanuju ŭ 2010 hodzie, zaznačajecca ŭ paviedamleńni pres-słužby.
«Prafsajuzy nie pakinuli baćkoŭ sam-nasam ź ciažkaściami pry padrychtoŭcy dziaciej da škoły, a akazali realnuju, adčuvalnuju, a dla mnohich i adzinuju ŭ hety pieryjad materyjalnuju padtrymku, — cytuje pres-słužba staršyniu FPB Leanida Kozika. — U nas jość prykłady, i ich niamała, kali prafsajuznyja kamitety zakuplali pa paŭtysiačy rancaŭ dla dziaciej-školnikaŭ usich rabotnikaŭ, vydzialali hrošy na kuplu školnaha adzieńnia i abutku».
Asablivuju ŭvahu prafsajuznyja arhanizacyi nadavali «šmatdzietnym i małazabiaśpiečanym siemjam», aprača taho «padšefnyja dziciačyja sacyjalnyja prytułki i škoły-internaty» taksama atrymali materyjalnuju padtrymku.
Pres-słužba FPB nahadała, što dabračynnaja akcyja «Prafsajuzy — dzieciam» pravodzicca ź listapada 2002 hoda. U miežach hetaha prajekta «pasilnaja materyjalnaja dapamoha» akazvajecca pry «padrychtoŭcy da škoły, da Dnia abarony dziaciej, dla praviadzieńnia navahodnich i kaladnych mierapryjemstvaŭ».
Kamientary