Akcyja «Stop-bienzin» u Minsku nie adbyłasia

Zapłanavanaja na viečar 14 vieraśnia ŭ Minsku akcyja aŭtamabilistaŭ suprać padaražańnia paliva «Stop-bienzin» nie adbyłasia.

Rašeńnie ab čarhovym — siomym z pačatku hoda — pavyšeńni cen na bienzin i dyzpaliva pryniaŭ napiaredadni dziaržkancern «Biełnaftachim» «u metach paetapnaha raŭnavańnia cen na tavary ŭ krainach Mytnaha sajuza».

Roźničnyja ceny na naftapradukty, jakija realizujucca praz AZS, pavialičany ŭ siarednim na 3%. Litr bienzinu «Narmal-80» kaštuje 4.380 rubloŭ (było 4.240), Ai-92 — 4.590 (4.460), Ai-95 — 4.950 (4.800), dyzielnaha paliva — 4.860 (4.720).

Akcyi «Stop-bienzin» pravodziacca ŭ Biełarusi z maja 2010 hoda, jak praviła, paśla kožnaha pavyšeńnia cen na paliva. Apošniaja akcyja płanavałasia ŭ Minsku 22 žniŭnia, adnak, pa sutnaści, nie adbyłasia. Daviedaŭšysia ab płanach aŭtamabilistaŭ, supracoŭniki DAI pierakryli ruch na praśpiektach Niezaležnaści i Pieramožcaŭ.

Infarmacyja ab ciapierašniaj akcyi źjaviłasia ŭ internecie ranicaj 14 vieraśnia.

Jaje arhanizatary — štab supolnaści «Stop-bienzin» — zaklikali aŭtamabilistaŭ źbiracca «małymi hrupami ŭ lubym zručnym dla ich miescy» na adrezku praśpiekta Niezaležnaści ad vulicy Surhanava da HUMa.

«Asnoŭnaja meta ŭdzielnikaŭ akcyi — paśla 19.00 ruchacca pa praśpiekcie Niezaležnaści ad vulicy Surhanava da HUMa ŭ lubym napramku, razvaročvacca ŭ lubym dazvolenym PDR miescy. Vy možacie prosta katacca pa praśpiekcie. Roŭna ŭ 19.10 udzielniki akcyi źnižajuć chutkaść ruchu da 20–30 km/hadz i ŭklučajuć avaryjku», — havaryłasia ŭ raspaŭsiudžanym paviedamleńni.

Adnak, pavodle śviedčańnia karespandentaŭ BiełaPAN, da vyznačanaha času na praśpiekcie Niezaležnaści było ŭsio spakojna, tradycyjna dziažuryli narady patrulna-pastavoj słužby. Ruch aŭtamabilistaŭ pa centralnaj mahistrali stalicy hetym razam supracoŭnikami DAI nie pierakryvaŭsia, choć jany i prysutničali na asnoŭnych skryžavańniach i płoščach. Na Kastryčnickaj płoščy byli zaŭvažany supracoŭniki pravaachoŭnych orhanaŭ u cyvilnym.

Napiaredadni ŭ intervju BiełaPAN Arciom Šarkoŭ — dyrektar infarmacyjna-aśvietnickaj ustanovy «Za Aŭto», jakaja abjadnoŭvaje aŭtamabilistaŭ, vykazaŭ mierkavańnie, što čarhovaje pavyšeńnie roźničnych cen na naftapradukty naŭrad ci pryviadzie da pratestnaj akcyi. Na jaho dumku, ciapier hramadskaść «znachodzicca ŭ niejkaj śpiačcy». «Mahčyma, ludzi jašče nie adyšli ad leta, a, mahčyma, pytańni pražytku i narychtoŭki na zimu ludziej ciapier chvalujuć bolš, čym inšyja štodzionnyja pytańni», — adznačyŭ Šarkoŭ.

Ciapier u hramadstvie nazirajecca «abstrahavańnie ad hetaj situacyi nie tolki ŭ asiarodździ aŭtaamataraŭ», skazaŭ kiraŭnik ustanovy. Jon ličyć, što «ŭsie zamierli ŭ čakańni taho, što budzie na valutnym rynku krainy, i heta ŭpłyvaje na prajaŭleńnie hramadzianskaj aktyŭnaści».

• 0
• 0
• 0
• 0
• 0
• 0
• 0
• 0