Navukoviec-rusapiat atrymaŭ svajo za naftahazavuju vajnu:)

Schadziŭ i ja ŭčora ź siarednim synam-padletkam na viernutych "Tutejšych".

Voś šanoŭny Viačasłaŭ Rakicki na "Svabodzie" adznačaje: i 16 hadoŭ tamu, i ciapier "hetak ža sama i ŭ tych ža samych miescach publika śmiajecca i plaskaje ŭ dałoni".

Ja ž zaŭvažyŭ u šerahu momantaŭ mienavita adroznuju reakcyju. Mo' tamu, što, akramia syna, u łožy beletažu (darečy, ci jość biełaruski adpaviednik?) apynułasia cełaja kampanija zusim junych asobaŭ.

Dyk voś, hetaje pakaleńnie, nia žyŭšy ŭ peryjad deficytaŭ dy specraźmierkavalnikaŭ, kudy bolej raŭnadušna suziraje tuju satyryčnuju scenu, dzie saŭbur Mikita Znosak ciahnie vazok z partfelami. Tam paśviedčańni "na vadu, na apał, na jadu" i h.d., a taksama pajki:

"...siem funtaŭ adbornaj atrubianaj muki, paŭtara funta z aśmuškaj krup, dva funty z čvertkaj harochu, nia viedaju kolki hazy, paŭčverci funta i dva łoty soli, i da ŭsiaho hetaha jašče: sieladcy, tarany, siem z pałovaj funtaŭ droŭ, pudełačka, miedždu protčym, pudry a-la-ruž, padstaŭka dla kvietak, try čarki, a bolej, zdajecca, ničoha niama".

16 hadoŭ tamu, kali biez talonaŭ dy kuponaŭ nie prydbać było ni škarpetak, ni plaški, ni cyharetaŭ, hetuju tyradu zała sustrakała škvałam emocyjaŭ. Uvohule adhukałasia na kožny satyryčny štrych, datyčny kamunistyčnaha kiravańnia, vopleskami vitała antybalšavickija repliki.

Nasuprać Kupałaŭskaha teatru, na Karła Marksa, 38, mieściŭsia tady CK KPB, dla jakoha bieł-čyrvona-bieły ściah taksama byŭ zabaronienaj symbolikaj. Razam z tym, funkcyjanery ŭsio bolej padciskali chvasty. Demakratyčnaja publika pjanieła ad iluzii, što varta pazbavicca ŭłady zamšełych partakrataŭ — i adrazu zažyviem volna dy zamožna.

(Uspaminy ab premjery "Tutejšych" lažać voś tut. )

Razam z tym, na miažy 90-ch mnohija ajčynnyja demakraty ź pijetetam hladzieli na Maskvu, što viała pierabudovačny rej.

Učora ž teatralnaja zała, jak mnie padałosia, najbolej emacyjna padtrymlivała sceničnyja vypady suprać navukoŭca-rusapiata, jaki dzioŭb pra Paŭnočna-Zachodni kraj.

Hetyja emocyi, asabliva ŭ junaj publiki, peŭna ž byli afarbavanyja i vodbliskami niadaŭniaj naftahazavaj vajny.

Padčas jaje, kaniešnie, i z vusnaŭ tutejšaha načalstva my čuli filipiki na adras Kramla.

Ale plaskać u ładki niešta nia ciahnie.

Bo jašče źviniać u vušach treli na temu bratniaha jadnańnia. Bo jašče mocnaja ŭ viarchoch fluhiernaja mentalnaść a-la Mikitka Znosak.

Pra kaniec anamalii možna budzie skazać nie raniej, čym vysokaja ŭłada prydzie na "Tutejšych" i budzie stojačy vitać u finale bieł-čyrvona-bieły ściah.

P.S. A mo' načalstvu kvitkoŭ nie chapiła? :)

• 0
• 0
• 0
• 0
• 0
• 0
• 0
• 0