Biełaruś padpisała z Kitajem ramkavaje pahadnieńnie ab Kitajska-biełaruskim industryjalnym parku. Baki ličać, što jon nie sastupić pa razmachu Kitajska-sinhapurskamu industryjalnamu parku ŭ horadzie Sudžou.
Jak paviedamlaje BiełTA, podpisy pad dakumientam pastavili namieśnik prem'jer-ministra Biełarusi Anatol Tozik i namieśnik ministra kamiercyi KNR Čžun Šań. U hety ž dzień padpisanaje pahadnieńnie ab supracoŭnictvie pa inviestycyjnym prajekcie Kitajska-biełaruskaha industryjalnaha parku na terytoryi Respubliki Biełaruś. Ź biełaruskaha boku dakumient padpisaŭ hienieralny dyrektar AAT «Kiroŭnaja kampanija chołdynhu «Haryzont» Juryj Pradko, z kitajskaha boku — prezident «Eksimbanka» Kitaja Li Žohu i prezident Kitajskaj karparacyi inžynirynhu SAMS Ło Jań.
Prem'jer-ministr Biełarusi Michaił Miaśnikovič na sustrečy ŭ Domie ŭrada z kitajskaj parłamienckaj delehacyjaj na čale sa staršynioj Pastajannaha kamiteta Usiekitajskaha schodu narodnych pradstaŭnikoŭ U Banha adznačyŭ: «My ŭskładajem vialikija nadziei na stvarany Kitajska-biełaruski industryjalny park». Pavodle jaho słovaŭ, heta vielmi vialiki infrastrukturny prajekt — pa maštabach vyrašanych zadač i abjomach inviestycyj takich abjektaŭ u śviecie adzinki. «Ličym, što z ulikam našaj śpiecyfiki atrymajecca paŭtaryć paśpiachovy vopyt Kitajska-sinhapurskaha industryjalnaha parku ŭ horadzie Sudžou», — skazaŭ kiraŭnik urada Biełarusi.
Jak paviedamiła ANT, ahulny košt prajekta składaje bolš za 30 miljardaŭ dalaraŭ.
Kamientary