Pradstaŭniki supolnaści ŁHBT buduć rehistravać svaju arhanizacyju 8

Na nastupnym tydni ŭ Ministerstva justycyi Biełarusi buduć padadzieny dakumienty na rehistracyju respublikanskaha maładziožnaha hramadskaha abjadnańnia «Pravaabarončy centr „Alternatyva plus“.

Ustanoŭčy źjezd novaj struktury, jakaja abjadnoŭvaje pradstaŭnikoŭ supolnaści leśbijanak, hiejaŭ, bisieksuałaŭ i transhiendaraŭ (ŁHBT), prajšoŭ 15 kastryčnika ŭ Minsku i byŭ arhanizavany pravaabarončaj hramadskaj inicyjatyvaj „HiejBiełaruś“. Delehaty sa stalicy i z usich abłaściej krainy pryniali statut centra „Alternatyva plus“, abrali saviet i kantrolna-revizijnuju kamisiju. Staršynioj hramadskaha abjadnańnia vybrany Siarhiej Androsienka, kiraŭnik inicyjatyvy „HiejBiełaruś“.

Jak vynikaje sa statuta, centr „Alternatyva plus“ budzie zajmacca pravaabarončaj, infarmacyjnaj, sacyjalnaj pracaj, spryjać stvareńniu ŭ Biełarusi „biaśpiečnych i kamfortnych umoŭ žyćcia dla ŁHTB i ich najbližejšaha atačeńnia“, źnižeńniu ŭzroŭniu hamafobii i transfobii, papularyzacyi ŭ hramadstvie talerantnaści da pradstaŭnikoŭ ŁHBT. Arhanizacyja taksama maje namier akazvać sacyjalnuju i psichałahičnuju padtrymku aktyvistam ŁHBT i členam ich siemjaŭ.

U hutarcy z žurnalistami Androsienka adznačyŭ:

siońnia „razmova pra adnapołyja šluby i ŭsynaŭleńnie dziaciej adnapołymi parami“ ŭ Biełarusi navat nie idzie. „My nie možam havaryć ab prahresie, pakul nie navučymsia karystacca tymi pravami, jakija ŭ nas jość siońnia — na svabodu asacyjacyj i svabodu na mirnyja schody“,

 — zajaviŭ lidar novaj hramadskaj arhanizacyi. Pradstaŭniki sieks-mienšaści ŭ Biełarusi, padkreśliŭ Androsienka, majuć vialikija prablemy z realizacyjaj navat takich pravoŭ. „Za dziesiać hadoŭ była dazvolena tolki adna publičnaja akcyja supolnaści i nie było zarehistravana nivodnaj ŁHBT-arhanizacyi“, — skazaŭ jon.

Namieśnik staršyni novaha abjadnańnia Natalla Mańkoŭskaja ŭ kamientaryi BiełaPAN adznačyła: stvareńnie takoj arhanizacyi dazvolić vyrašyć prablemu „bačnaści ŁHBT-supolnaści ŭ Biełarusi“, zrabiŭšy jaje realnaje isnavańnie jurydyčnym.

Mańkoŭskaja paviedamiła, što zaraz hramadskija aktyvisty pravodziać manitorynh dyskryminacyi najbolš uraźlivych hrup u hramadstvie, u tym liku pa prykmiecie sieksualnaj aryjentacyi». «Vyniki manitorynhu, vierahodna, buduć hatovy da kanca hoda, ale papiarednija ŭžo ciapier havorać ab tym, što heta prablema jość: ludziej zvalniajuć z pracy pa prykmiecie sieksualnaj aryjentacyi, uźnikajuć prablemy na pracy i vučobie. Zvyčajna hetym faktam nadajecca mała ŭvahi», — adznačyła jana. Stvareńnie hramadskaha abjadnańnia, pavodle słoŭ Mańkoŭskaj, dazvolić, akramia inšaha, abaraniać pravy pradstaŭnikoŭ ŁHBT-supolnaści ŭ sudovym paradku.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH