Pakul nieviadoma, kudy.
Aktyvista niezarehistravanaj BCHD Jaŭhiena Vaśkoviča etapavali z Mahiloŭskaj papraŭčaj kałonii № 15. Hetuju infarmacyju paćvierdzili ŭ administracyi kałonii, ale nie paviedamili, kudy mienavita.
Pra pieravod syna nie viedaje pakul jaho maci Rušańnia Ivanaŭna. U apošnim licie Jaŭhien paviedamlaŭ joj, što jaho pieravodziać u pamiaškańnie kamiernaha typu. Jak zajaviła supracoŭnica kałonii, maci aryštanta paviedamiać pra novaje miesca adbyćcia pakarańnia syna ciaham troch sutak paśla jaho prybyćcia tudy.
U papraŭčaj kałonii № 15 Jaŭhiena Vaśkoviča nie raz źmiaščali ŭ štrafny izalatar za parušeńnie režymu. Jon admaŭlaŭsia vykonvać zahady turemščykaŭ.
Jaŭhiena Vaśkoviča i dvuch prychilnikaŭ idejaŭ anarchizmu Arcioma Prakapienku i Paŭła Syramałotava asudzili na siem hadoŭ pazbaŭleńnia voli za napad na budynak babrujskaha KDB u kastryčniku 2010 hoda. Babrujski sud pryznaŭ ich vinavatymi ŭ złosnym chulihanstvie i ŭ naŭmysnym naniasieńni škody ŭ asabliva bujnych pamierach.
Vaśkovič pryznaŭ fakt napadu, ale nie pakajaŭsia. Prakapienka i Syramałotaŭ vinu pryznali i raskajalisia. U noč z 16 na 17 kastryčnika 2010 hoda chłopcy kinuli ŭ budynak KDB dźvie butelki z «kaktejlem Mołatava».
Arhkamitet pa stvareńni partyi «Biełaruskaja chryścijanskaja demakratyja» nastojvaje na pryznańni Jaŭhiena Vaśkoviča palitviaźniem, adnak asudžaje ŭčynak, za jaki jaho pakarali. Pavodle partyjcaŭ, aktyvist adsiedzieŭ davoli za ŭčynienaje. Vyrak Vaśkoviču nazyvajecca palityčna matyvavanym.
Kamientary