U Minsku vystava mastactva Japonii

Vystava «Tradycyjnaje dekaratyŭna-prykładnoje mastactva Japonii» pačała pracavać 17 kastryčnika ŭ Nacyjanalnym mastackim muziei Biełarusi (Lenina, 20). Jaje arhanizatarami vystupili Ministerstva kultury Biełarusi, Japonski Fond, Ministerstva zamiežnych spraŭ Japonii, a taksama pasolstva hetaj krainy ŭ Biełarusi.

Zahadčyca adździeła zamiežnaha mastactva muzieja Alena Siankievič na pres-kanfierencyi z nahody adkryćcia vystavy zaznačyła, što japoncy vyklučna ŭvažlivyja da ŭłasnaj kultury. Nie tak daŭno jana viarnułasia z pajezdki ŭ Japoniju i padzialiłasia svaimi nazirańniami: kultavyja miescy Krainy ŭzychodziačaha sonca ŭ asnoŭnym naviedvajuć zusim nie turysty, a sami jaje žychary.

Sakratar pa kultury pasolstva Japonii ŭ Biełarusi spadarynia Chanata Anoka zaŭvažyła, što japoncam cikavaja nie tolki ich ułasnaja kultura, ale i kulturnyja tradycyi inšych narodaŭ. «Kali b u vystavy biełaruskaha tradycyjnaha mastactva ŭ Japonii była dobraja rekłama, to na jaje pajšli b», — skazała spadarynia Chanata. Adnak, padkreślivajuć biełaruskija śpiecyjalisty, arhanizacyja takoj ekspazicyi ŭ Japonii źviazana z mnohimi ciažkaściami, u tym liku ź finansavymi, tamu pakul biełaruskaj vystavy ŭ adkaz nie varta čakać.

Na vystavie ŭ Minsku dvaccać japonskich majstroŭ vystavili 90 tvoraŭ mastactva, vyrablenych z kieramiki, farforu, tekstylu, łakaŭ, škła, mietału, bambuku, a taksama papiery ručnoj raboty.

Tak, biełaruskija znaŭcy ŭschodniaj kultury zmohuć ubačyć tradycyjnyja pradmiety bytu, načyńnie, viejery, dekaratyŭnyja pradmiety interjeru. Centralnaje miesca hetaj ekspazicyi zajmaje štučna ŭpryhožanaje kimano dla vizitaŭ Chamonhi pad nazvaj «Vodar vietru» majstra Teruchika Siadzavy.

Nie mienš cikavym ujaŭlajecca taksama vyrablenaja z bambuku kampazicyja, u jakuju ŭvachodziać kletka dla nasiakomych, a taksama sami pradstaŭniki faŭny: cvyrkun Karohi, cvyrkun-zvanočak Sudzumusi, bahamoł Kamakiry, a taksama konik Kiryhirysu i sioro bata (uschodniaja doŭhahałovaja saranča). Nasiakomyja, kožnaja ź jakich vieličynioj z pałovu palca, vyhladajuć tak realna, što paznać u ich štučna stvoranuju skulpturu mahčyma tolki ź blizkaj adlehłaści.

• 0
• 0
• 0
• 0
• 0