Adziny kurs — 8680. Kursy ŭ abmieńnikach papaŭźli ŭvierch abnoŭlena ŭ 11.20 42

Paśla abviaščeńnia kursa pačałasia pres-kanfierencyja staršyni praŭleńnia Nacbanka Nadziei Jermakovaj.

Nacyjanalny bank prahnazuje kurs dalara da pačatku nastupnaha hoda na ŭzroŭni 7-8 tys. za 1 dalar. Taksama Jermakova zajaviła siońnia, što sioleta denaminacyi (nie błytać z devalvacyjaj) nie budzie.

Stała viadoma, što ŭ pačatku 2012 hoda ŭ zvarocie źjaviacca kupiury 200 tysiač rubloŭ. Pa słovach Jermakovaj, na kupiury namalavanaja biełaruskaja architektura.

* * *

Paśla vyznačeńnia novych aficyjnyŭ kursaŭ zamiežnych valut banki stali ŭzdymać svaje kursy, kupli i prodažu. Apošnija dni jany byli zanižanyja.

Naprykład,

«Fransabank» adrazu ŭźniaŭ kurs kupli z 7800 da 8350 rubloŭ.

Siaredni kurs prodažu dalara tym časam dapoŭz da 8700 rubloŭ, ale nižejšaja prapanova ŭsio jašče składaje 8550 rubloŭ.

* * *

Abjom tarhoŭ byŭ nievialikim. Naprykład, papiaredniaja prapanova dalara składała $23,188 miljona, popyt — $19,532 miljona. U vyniku abjom tarhoŭ skłaŭ $23,165 miljona.

* * *

Ciaredni zarobak u Biełarusi apuściŭsia nižej za $230. Z ulikam abvieščanaha rostu taryfnaj staŭki pieršaha razradu zarobak moža padraści, ale, vidać, nie pieravysić 300 dalaraŭ da kanca hoda.

* * *

Devalvacyja apuściła canu bienzinu AI-92 da $0,57 za litr, a dyzielnaha paliva da $0,62. U bližejšy čas varta čakać novaha istotnaha padaražeńnia

* * *

Devalvacyja dasiahnuła 190% ad pačatku hoda. Sumny rekord dziesiacihodździa.

U paraŭnańni z učora adnarazovaja devalvacyja skłała 50,9%. Nahadajem, u mai devalvacyja było bolšaj, na 54%.

* * *

Kurs dalara spyniŭsia na ŭzroŭni 8680 rubloŭ. Tarhi pačalisia z učorašniaha kursa dadatkovaj siesii — 8 790 rubloŭ.

Jeŭra — 11 900 rubloŭ.

* * *

Kursy ŭ abmieńnikach uranicy śpikiravali ŭniz. Ciapier dalar možna zdać maksimum za 8260 rubloŭ («Bank Maskva-Minsk»). Astatnija banki prapanujuć 7800–8200 rubloŭ. Nabyć amierykanskuju valutu možna ŭ «Technabanku» pa 8580 rubloŭ, astatnija trymajuć kurs 8600–8800 rubloŭ. Nie viedajučy, čaho čakać ad tarhoŭ, banki vystaŭlać roźnicu pamiž kursami kupli i prodažu 600–700 rubloŭ.

* * *

Aficyjny kurs dalara (na 20.10.2011) — 5712 rubloŭ.

Kurs dalara na dadatkovaj siesii (na 19.10.2011) — 8790 rubloŭ.

Roźnica pamiž imi — 54%.

Voś z takimi nažnicami kraina padyšła da 20 kastryčnika. Mienavita 20-ha na rynku nazirajecca štomiesiačny pik prapanovy valuty — heta krajni termin spłaty padatkaŭ pradpryjemstvami. I akurat na hety samy zručny dla rubla momant łukašenkaŭcy pryznačyli pierachod na adziny kurs. Nie pa svajoj voli: pad ciskam MVF i Rasii. Kredytory «samaj paśpiachovaj madeli» Jeŭropy pastavili abjadnańnie kursaŭ najpieršaj umovaj. Sprava ŭ tym, što

ŭ situacyi dvajnoha kursu składalisia idealnyja ŭmovy dla ŭzbahačeńnia asobaŭ, dapuščanych da raźmierkavańnia finansavych płyniaŭ.

Ale pierachod na adziny kurs nie aznačaje poŭnaj libieralizacyi valutnaha rynku. Ułady mohuć pa-raniejšamu sielektyŭna dapuskać subjekty haspadarańnia da ŭdziełu ŭ tarhach. U toj ža čas urad maje nieabmiežavanyja mahčymaści «ŭpłyvu» na eksparcioraŭ — bolšaść ź ich heta dziaržaŭnyja pradpryjemstvy. Tamu nie pamylimsia, kali skažam, što i

novy «rynkavy» kurs ustanoviać dla krainy łukašenkaŭcy, na asnovie niejkich ułasnych raźlikaŭ.

U sieradu ŭ Pieciarburzie

premjer Miaśnikovič pryznaŭ pierad Pucinym: Biełaruś «idzie da libieralizacyi» valutnaha rynku, ale jašče nie ažyćciaviła jaje. Łukašenkaŭcy tak lohka nie addaduć resurs dostupu da valuty.

Zrešty, i mizernaść zołatavalutnych reziervaŭ krainy vymahaje peŭnaha kantrolu: pry małoj padušcy zapasaŭ rubiel moh by lohka stać achviaraj finansavych śpiekulacyj, dyj prosta paniki.

Tym nie mienš, łukašenaŭcy vymušanyja pryznačyć realistyčny kurs. Inačaj čorny rynak zakvitnieje znoŭ, jak toje było ŭletku hetaha hoda.

Z 20 kastryčnika valutnyja tarhi buduć prachodzić u ramkach adnoj siesii. Vieśnikam libieralizacyi ŭ čarhovy raz staŭ vice-premjer Biełarusi Siarhiej Rumas.

«Na adzinaj handlovaj siesii, hetak ža, jak ciapier na dadatkovaj, budzie hnutkaje kursaŭtvareńnie — u zaležnaści ad popytu i prapanovy, — abiacaje jon. — Urad i Nacbank dazvalajuć kursu namacać raŭnavažkaje značeńnie, pry jakim popyt i prapanova buduć roŭnyja. Kab eksparcioram było cikava pradavać valutu, a imparcioram kuplać. Heta značyć ni ŭ jakoj stupieni dziaržava nie budzie administracyjna ŭmiešvacca ŭ kursaŭtvareńnie», — kaža Rumas.

Pierad zajavaj vice-premjera kurs ros z šalonaj chutkaściu i pa stanie na piatnicu dasiahnuŭ rekordnych 9010 rubloŭ. Abiacańnie vice-premjera čakana vyklikała źnižeńnie popytu na valutu na dadatkovaj siesii, umacavaŭšy rubiel da 8790 u sieradu.

Łahična, što kampanii nie chacieli kuplać «darahuju» valutu, kali, jak miarkujecca, z 20 kastryčnika možna budzie nabyć paraŭnalna tannuju. Nahadajem, što 30% ad valutnaj vyručki eksparciory ŭsio jašče vymušanyja pradavać pa nizkim kursie. Ciapier taki abaviazak budzie źniaty.

Aproč taho, narešcie budzie admienieny padatak na roźnicu kursaŭ. Jurasoby, jakija kuplali dalar na biržy pa 9000 rubloŭ, musili spłacić padatak na roźnicu pamiž aficyjnym i biržavym kursam.

Čakańni abvastryła zajava Łukašenki pra budučy rost rubla. Praŭda, kiraŭnik krainy takija zajavy paŭtaraje ad krasavika, i pakul heta mała pierasiakałasia z rečaisnaściu.

Vyciekaŭ infarmacyi pra novy kurs rubla nie było.

Nahadajem, što pierad pieršaj dadatkovaj siesijaj usie čakali rezkaha źnižeńnia kursa, a jon akazaŭsia bolš jak na 1000 rubloŭ vyšejšy za tahačasny kurs čornaha rynku.

14 vieraśnia, u pieršy dzień tarhoŭ, biržavy kurs dalara skłaŭ 8600 rubloŭ. Paśla rubiel umacoŭvaŭsia, a ŭrešcie papoŭz uniz, abahnaŭšy navat startavy ŭzrovień.

Tym nie mienš, valuta ŭ abmieńnikach źjaviłasia. Sajt Prakapovi.č kankurencyi z bankami nie vytrymaŭ.

Toje, što adnosna siońniašnich tarhoŭ peŭna: novy kurs faktyčna aznačaje novuju devalvacyju rubla. I za im niepaźbiežna pryjdzie novy vitok rostu cen.

Pieradusim za košt padaražeńnia hazu. Raniej valuta dla jaho nabyćcia kuplałasia pa 5500 rubloŭ, a ciapier budzie kuplacca za rynkavym kursie. Možna čakać padaražeńnia paliva, transpartnych pasłuh, kamunalnych płaciažoŭ. Krainie nie ŭdajecca vyjści z devalvacyjnaj śpirali. Mahčyma, chvaroba tak zapuščana, što dapamahčy moža tolki šokavaja terapija.

Jahor Marcinovič, Siarhiej Hiezhała

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH