Tom Peci, adzin z vybitniejšych amierykanskich muzykantaŭ i aŭtaraŭ pieśniaŭ druhoj pałovy XX stahodździa, usio žyćcio pravodzić u zmahańni. Spačatku z hukazapisvajučymi kampanijami, paśla -- z vydaŭcami płaścinak suprać padvyšeńnia koštaŭ. Ciapier jon zmahajecca z termitami, jakija pajadajuć jahony draŭlany katedž, i z sanitarnaj słužbaj svajoj akruhi. I piša pry hetym cudoŭnyja liryčnyja pieśni.
Na samym pačatku dvuchtysiačnych Tom Peci, jakoha biantežyła adsutnaść jakasnaj muzyki jak kłasa, zapisaŭ albom «Apošni dydžej», nakiravany adrazu suprać usich jahonych vorahaŭ plus suprać radyjostancyj. I voś tut zdaryłasia niečakanaje — patencyjny chit Last DJ na roznych amierykanskich radyjostancyjach krucić «nie rekamiendavali». Precedent dla ZŠA prosta nievierahodny — u pieśni niama nivodnaj nieprystojnaści, niama absalutna ničoha, što mahło b abrazić pačućci słuchača. Zatoje jość historyja apošniaha dydžeja, jaki stavić nie toje, što patrabujuć bosy kampanij, a toje, što ličyć vartym, praz heta jaho nie lubiać, i ŭ rešcie rešt jon uciakaje ŭ Mieksiku. Mahčyma, radyjostancyi pakryŭdzilisia, a mahčyma, radok «Pakul my ŭchvalajem pasrednaść» svaju spravu zrabiŭ.
Nu, pa ščyraści, Tomu Peci nastroj takim nie sapsuješ — dziasiatak jahonych trekaŭ i tak ahulnanacyjanalnyja chity. A toje, što radyjo atrymała niebłahoha pinka i adčuła jaho — značycca, «reakcyja pajšła».
Darečy, u efirach biełaruskich FM-radyjostancyj u 2001–2002 hodzie taja samaja pieśnia ŭvieś čas hučała ŭ efiry. Ź inšaha boku, kali b Tom Peci žyŭ u Biełarusi, to byŭ by pieršym, chto trapiŭ u «čornyja śpisy».
