Palavańnie na biełaruščynu

Siabry niezarehistravanaj arhanizacyi «Małady front» adznačajuć, što apošnim časam pačaścilisia vypadki, kali pradstaŭniki ŭłady pieraśledujuć ich za razmovy pa‑biełarusku.

Pačaścilisia vypadki, kali supracoŭniki milicyi zatrymlivajuć na mienskich vulicach maładych ludziej, kali čujuć ad tych biełaruskuju movu. Milicyjanty patrabujuć pakazać, što ŭ zaplečniku i kišeniach. Zabirajuć znački «Za svabodu» i «Ja lublu Biełaruś».

Aktyvistka niezarehistravanaj arhanizacyi «Małady front» Nasta Pałažanka zhadvaje, što ŭ časie tak zvanaj «začystki» paśla razhonu akcyjaŭ milicyjanty ŭ cyvilnym prysłuchoŭvajucca da maładych ludziej i chapajuć tych, chto razmaŭlaje pa‑biełarusku.

Pałažanka: «My ŭsie razmaŭlajem pa‑biełarusku. Nam vielmi škada — nadyšoŭ taki čas, kali biełaruskaja mova źjaŭlajecca pakazčykam palityčnych pohladaŭ, a nie etničnaj prynaležnaści».

Lider niezarehistravanaj arhanizacyi «Małady front» Źmicier Daškievič na spatkańni z baćkami kazaŭ, što jaho papiaredzili, kab nie razmaŭlaŭ pa‑biełarusku. Inakš abiacali daterminova spynić spatkańnie. Maci Źmitra Volha Daškievič paviedamiła «Svabodzie»:

Daškievič: «Kaža, što zabaranili. Pytajemsia: a čamu?. Kazaŭ, što papiaredzili, kali, maŭlaŭ, budzieš razmaŭlać pa‑biełarusku, to spatkańnie spynim ci, naahuł, nikoli nie sustrenieciesia. Kazaŭ, što pa‑rasiejsku ŭžo amal nie razumieje. Źmicier kazaŭ achoŭnikam, što ŭ nas u Kanstytucyi zapisana, što dźvie dziaržaŭnyja movy, rasiejskaja i biełaruskaja — i razmaŭlaj na jakoj chočaš. Jamu kazali: «Ciabie heta nia tyčycca. Ty nie na svabodzie, a tut. U Kanstytucyi ty abmiežavany. Tak što, daražeńki, nie vystaŭlaj tut svaich pravoŭ». A jon kaža: «A ja j nie vystaŭlaju, a paprostu razmaŭlaju na rodnaj movie».

Namieśnik kiraŭnika škłoŭskaj papraŭčaj kalonii Siarhiej Jermalicki asprečvaje infarmacyju Daškievičaŭ:

Jermalicki: «Jamu kazali, kab nie razmaŭlaŭ na zamiežnych movach, na anhielskaj… Heta nia ja kazaŭ, heta kantralory kazali, kab nie razmaŭlaŭ na niamieckaj i anhielskaj movach. Kantralor abaviazany davieści da viedama svajakoŭ i asudžanaha, što na zamiežnaj movie razmaŭlać zabaroniena na karotkačasovym spatkańni».

Administracyja kalonii vyniesła Źmitru Daškieviču dva papiaredžańni za parušeńnie praviłaŭ unutranaha rasparadku. Pieršaje — za toje, što nadzieŭ kamizelku; druhoje — za toje, što na špacyry adyšoŭsia na niekalki krokaŭ ubok. Dniami jaho pieraviaduć u štrafny izalatar.

Lider aršanskaj filii «Maładoha frontu» Siaržuk Huminski raspavioŭ, što 10 studzienia milicyjanty pačali jaho źbivać u pastarunku paśla taho, jak jon admoviŭsia havaryć pa‑rasiejsku.

Huminski: «Milicyjanty zapatrabavali, kab ja ź imi razmaŭlaŭ pa‑rasiejsku. Ja admoviŭsia. Paśla hetaha jany pačali mianie źbivać, kažučy, kab ja razmaŭlaŭ pa‑rasiejsku. Kazali: «Razmaŭlaj jak pacan». Ja im kazaŭ, što maju prava, a, kali im nie padabajecca, to niachaj zaprosiać pierakładčyka. Paśla hetaha mianie znoŭ źbili razy try».

Aktyvisty «Maładoha frontu» ŭ Babrujsku raspaviali, što ŭ časie zatrymańnia milicyjanty zabaranili im havaryć na rodnaj movie. Jany kazali: «Havarycie pa‑ludzku».

Luboŭ Łuniova, Radyjo Svaboda

Ilustracyja — frahment plakatu Uładzimiera Krukoŭskaha (pavialicyć)

• 0
• 0
• 0
• 0
• 0
• 0
• 0
• 0