U Vilni adčyniŭsia Biełaruski dom pravoŭ čałavieka

Siońnia ŭ Vilni adbyłosia adkryćcio Biełaruskaha domu pravoŭ čałavieka. Heta asacyjacyja biełaruskich i litoŭskich niaŭradavych arhanizacyjaŭ, zarehistravanaja ŭ Litvie. Miarkujecca, što ŭ Biełaruskim domie buduć prachodzić adukacyjnyja seminary, kanferencyi ŭ prablemach pravoŭ čałavieka.

Zasnavalniki Biełaruskaha domu pravoŭ čałavieka — pryvatnyja asoby. Siarod ich biełarusy Aleś Bialacki, Uładzimier Niaklajeŭ, Žanna Litvina, Barys Zvoskaŭ, Alaksandar Žučkoŭ, Siarhiej Dubaviec, staršynia Fondu «Dom pravoŭ čałavieka ŭ Narvehii» narvežka Maryja Dahle.

Raskazvaje pravaabaronca Aleś Bialacki:

Bialacki: «Dziejnaść hetaha Domu budzie raspaŭsiudžvacca na maksymalna šyrokaje koła tych zacikaŭlenych asobaŭ, jakim nieabchodnyja viedy, jakija cikaviacca viedami ŭ halinie pravoŭ čałavieka. Heta jak adzin z adukacyjnych prajektaŭ, jakija na siońniašni dzień užo jość pa‑za miežami Biełarusi (ja maju na ŭvazie Eŭrapiejski humanitarny ŭniversytet). My chočam, kab dziejnaść hetaha Domu była skiravanaja ŭ pieršuju čarhu na Biełaruś».

Ideju stvareńnia Biełaruskaha domu padtrymali narveskija fondy «Dom pravoŭ čałavieka» i «Prava słova», Nacyjanalny fond padtrymki demakratyi ZŠA, Švedzki Chelsynski kamitet, a taksama ŭrady Niderlandaŭ i Českaj Respubliki.

Havoryć menedžarka prajektu, supracoŭnica narveskaha fondu «Dom pravoŭ čałavieka» Ane Bonde:

Bonde: «My padtrymlivajem zasnavańnie hetaha Domu pravoŭ čałavieka, tamu što ličym vielmi važnym, kab u biełaruskich i litoŭskich arhanizacyjaŭ była mahčymaść arhanizoŭvać mierapryjemstvy, seminary. My razumiejem, jak heta ciažka dla biełaruskich arhanizacyjaŭ, jakija zajmajucca abaronaj pravoŭ čałavieka, demakratyčnymi pieraŭtvareńniami. Im stanie lahčej pracavać».

Takija pravaabarončyja damy isnujuć u Narvehii, u Rasiei, Bośnii i Hiercahavinie, Uhandzie. Dom pravoŭ čałavieka aktyvisty niaŭradavych arhanizacyjaŭ nie zmahli adčynić u Biełarusi, chacia ideja prajektu isnavała ŭžo siem hadoŭ, kaža Aleś Bialacki.

Bialacki: «Na praciahu apošnich, mabyć, užo piaci hadoŭ u Biełarusi nie zarehistravana nivodnaj pravaabarončaj arhanizacyi — tamu, realna acaniŭšy svaje šancy, lidery niaŭradavych arhanizacyjaŭ vyrašyli adkryć taki dom u Vilni. A pry źmienie sytuacyi, naturalna, ideja takoha domu ŭvasobicca fizyčna ŭ Miensku. Pryjdzie taki čas».

• 0
• 0
• 0
• 0
• 0
• 0
• 0
• 0