Biełarusy jeduć lačycca ŭ pravincyju, bo tam tańniej 4

Valutny kryzis nie moh nie zakranuć płatnuju stamatałohiju. I heta zrazumieła, bo i materyjały, i abstalavańnie tut u bolšaści impartnyja. Jašče letam pryvatnyja stamatołahi, pieravažna ŭ rehijonach, zabili tryvohu — klijenty amal pierastali lačyć zuby. Paźniej źjavilisia paviedamleńni, što płatnaje lačeńnie zuboŭ stała adnoj z formaŭ układańnia hrošaj. My pasprabavali vyśvietlić, što adbyvajecca ŭ hetaj śfiery ciapier.

Ceny vyraśli, ale klijentaŭ nie pamienieła

U Minsku ŭ pryvatnych klinikach jašče ŭ červieni papiaredžvali, što ŭ druhim paŭhodździ ceny istotna vyrastuć. Mahčyma, navat udvaja. Tak jano i vyjšła.

U adnoj ź minskich klinik u červieni pasłuha chirurha pa vydaleńni zuba ŭ zaležnaści ad składanaści apieracyi kaštavała ad 150 da 200 tysiač rubloŭ. Ciapier za heta davia-dziecca vykłaści ad 400 tysiač i vyšej. Toje samaje i ź inšymi pasłuhami. Tym nie mienš, u darahich klinikach klijentaŭ nie stała mienš. Tut i da pavyšeńnia cenaŭ lačeńnie było niatannym, a novy rost bolšaść zamožnych pacyjentaŭ pakul nie napałochaŭ.

I ŭsio ž častka klijentaŭ płatnaj stamatałohii pierakačavała ŭ dziaržaŭnyja palikliniki. Bo jany navat z ulikam pavyšeńnia cen dahetul nie dasiahnuli dakryzisnaha ŭzroŭniu cenaŭ pryvatnikaŭ. Naprykład, kali ŭ centrach, kštałtu «Łade», u pačatku hoda palačyć try kanały karennaha zuba kaštavała kala 500 tysiač rubloŭ, to ŭ Minskaj abłasnoj stamatałahičnaj paliklinicy hetaja pasłuha i ciapier kaštuje ad 170 tysiač.

Jeduć lačycca ŭ pravincyju, bo tam tańniej

«Klijentaŭ u nas nie stała mienš. Mahčyma, navat pabolšała», — raskazvaje pryvatny stamatołah ź Biełaaziorska Natalla Daroška. Pa jaje słovach, ceny na pasłuhi stamatołaha ŭ pravincyi značna mienšyja, čym u stalicy i vialikich haradach. Vychadnyja dni ŭ jaje raśpisanyja na miesiac napierad, budni — na paŭmiesiaca. Pa vychodnych u doktarki ŭ asnoŭnym lečacca studenty haradoŭ, najpierš ź Minska i Bresta. Bo tut tanna, a kabiniet abstalavany nie horš, čym u Minsku.

«Pacyjentaŭ-biełarusaŭ robicca mienš»

U maładziečanskim stamatałahičnym centry «Čełsiena-dent» kolkaść klijentaŭ taksama nie skaraciłasia. Inšaja reč, što biełarusaŭ siarod ich robicca ŭsio mienš, a ich miesca zajmajuć bahaciejšyja rasiejcy. «Kali ŭźnikli prablemy z valutaj i pačaŭsia ažyjataž u kramach, častka ludziej układała hrošy nie tolki ŭ tavary, ale i ŭ pasłuhi. U tym liku i stamatałahičnyja», — patłumačyli ŭ centry. Ale ciapier, kali daražeje praktyčna ŭsio, hrošaj u ludziej na stamatołaha nie zastajecca. «My da apošniaha trymali cenavuju płanku, najbolšy rost na niekatoryja pasłuhi ŭ nas składaŭ kala 20%. Adnak što budzie ciapier, paśla ŭviadzieńnia adzinaha kursa, my nie viedajem», — skazali ŭ administracyi centra.

Plusy i minusy pryvatnaj i dziaržaŭnaj stamatałohii

Biezumoŭnym plusam pryvatnych centraŭ, akramia vysokaprafiesijnych śpiecyjalistaŭ, źjaŭlajecca arhanizacyja pracy z klijentam. Heta, jak praviła, nie tolki ŭtulnyja pamiaškańni, pačynajučy z kalidora, ale i indyvidualny padychod da kožnaha klijenta. U kabiniecie adnačasova lečycca tolki adzin pacyjent. Doktaru dapamahaje miedsiastra. Nie treba stajać u čarzie, kab zrabić zdymak prablemnaha zuba. Ale za ŭsio heta treba niamała zapłacić.

U dziaržaŭnaj časam možna sutyknucca z čerhami ŭ kalidorach i sieansam adnačasovaha lačeńnia čatyroch pacyjentaŭ. Kampiensacyjaj za heta byli bolš čym pryjemnyja ceny. Abstalavańnie ŭ płatnych dziaržaŭnych klinikach daŭno ŭžo nie horšaje, čym u pryvatnych.

***

Stamatałohija anłajn

Aficyjny sajt kampanii — daŭno nie navina. Svaje staronki ŭ siecivie majuć nie tolki pryvatnyja stamatałahičnyja kliniki, ale i dziaržaŭnyja. Pry hetym niekatoryja kliniki nie spyniajucca na pieraliku pasłuh i cenach. Ciapier praź internet možna zapisacca da doktara. U zmahańni za klijenta kliniki ładziać internet-akcyi. Naprykład, zapisaŭšysia na pryjom praz sajt, možna atrymać źnižku na lačeńnie i biaspłatnuju kansultacyju. Jość i takija ŭstanovy, što, akramia akazańnia kamiercyjnych pasłuh, vykonvajuć adukacyjnuju funkcyju. Na ich sajtach možna daviedacca, jak pravilna čyścić zuby, pra dohlad za zubami ŭ asablivych vypadkach, jak padrychtavać dziaciej da pachodu da stamatołaha i mnohaje inšaje.

0

0

0

0

0

0

Siamion Piečanko

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH