Dziaviatym pa liku prezidentam Irłandyi staŭ pradstaŭnik Lejbarysckaj partyi Majkł Chihins. Pavodle apublikavanych u noč na subotu vynikaŭ, na vybarach (a jany prajšli ŭ čaćvier) jon atrymaŭ 707 101 hołas, abo kala 40%.
Jaho hałoŭny supiernik, niezaležny kandydat Šon Hałachier, jaki nabraŭ 504 964 hałasy, admoviŭsia ad dalejšaj baraćby, tak što druhi tur pravodzicca nie budzie. Trecim da finišu pryjšoŭ pradstaŭnik partyi Šyn Fiejn Marcin Makhines.
U vybarach udzielničali siem kandydataŭ.
Usie jany ŭžo patelefanavali Majkłu Chihinsu ź vinšavańniami i pažadańniami paśpiachovaj pracy.
Usiaho za niekalki dzion da hałasavańnia Hałachier, pavodle apytańniaŭ, apiaredžvaŭ Chihinsa.
Vyrašalnuju rolu ŭ pieramozie Chihinsa zhulała jaho reputacyja ŭmieranaha i ŭzvažanaha palityka.Vybarščyki addali jamu pieravahu, čym telezorcy Hałachieru i byłomu kamandziru Irłandskaj respublikanskaj armii Makhinesu.
Jaŭka na vybarach skłała 56,1% — značna nižej, čym na parłamienckich vybarach u lutym, kali na ŭčastki pryjšli kala 70% irłandcaŭ.
Prezident u Irłandyi źjaŭlajecca cyrymanijalnaj fihuraj i abirajecca na siem hadoŭ.
***
Prafiesaru i paetu Majkłu Chihinsu 70 hadoŭ. Jon čverć stahodździa byŭ deputatam irłandskaha parłamienta, a taksama ministram pa spravach kultury, mastactva i helskaj movy.
Adna ź viadučych palityčnych partyj Irłandyi, Fijana Fajł, vyrašyła nie vystaŭlać svajho kandydata paśla ciažkaj parazy, paniesienaj joju na parłamienckich vybarach. Adnak Šon Hałachier, jaki vystupaŭ jak niezaležny kandydat, raniej byŭ u šerahach FF i zajmaŭsia zboram achviaravańniaŭ na jaje karyść.