Siońnia ŭ Maskvu prybudzie novy pasoł u Rasii Andrej Kabiakoŭ

14 listapada ŭ Maskvu prybudzie novy pasoł Biełarusi ŭ Rasii Andrej Kabiakoŭ. Jak paviedamili BiełaPAN u biełaruskim pasolstvie, čakajecca, što Kabiakoŭ pryjedzie viečaram i ŭžo zaŭtra pačnie pracavać.

Napiaredadni adjezdu ŭ intervju teleprahramie «Karcina śvietu» na kanale «RTR-Biełaruś» Kabiakoŭ padkreśliŭ, što «fundamientam raboty pasolstva źjaŭlajucca handlova-ekanamičnyja adnosiny».

Akramia taho, adznačyŭ Kabiakoŭ, śpiecyfika raboty pasolstva Biełarusi ŭ Rasii źviazana z pražyvańniem u hetaj krainie «samaj vialikaj biełaruskaj dyjaspary». «Na žal, u Rasijskaj Fiederacyi vialikaja častka hramadstva stała vahacca ŭ acency taho, što adbyvajecca ŭ Respublicy Biełaruś», — skazaŭ pasoł. Razam z tym, padkreśliŭ jon, «tam jość masa siabroŭ» Biełarusi, patencyjał jakich «treba ŭ maksimalnaj stupieni vykarystoŭvać na farmiravańnie bolš spryjalnaha imidžu».

Na dumku Kabiakova, Biełaruś i Rasija vyjšli na novuju stupień intehracyi. «Skłałasia takaja situacyja, kali ŭ farmacie troch (Biełaruś — Rasija — Kazachstan), u farmacie Mytnaha sajuza, Adzinaj ekanamičnaj prastory ŭ nas jość mahčymaść vyrašyć šerah pytańniaŭ, jakija z-za šerahu pryčyn nie byli da kanca zavieršanyja ŭ ramkach Sajuznaj dziaržavy. Ale ciapier uźnikaje novaja zadača. Nie zaviaršajučy vyrašeńnia bazavych ekanamičnych pytańniaŭ na siońniašnim etapie, treba ruchacca i dumać, jak žyć dalej. U hetym płanie vopyt, napracoŭki, jakija byli zroblenyja Biełaruśsiu i Rasijaj u ramkach Sajuznaj dziaržavy, vielmi zapatrabavanyja pry rabocie «trojki», — ličyć pasoł.

Na zaŭvahu viadučaha prahramy Juryja Kazijatki, što Biełaruś u Rasiju «pradaje tavary na rubiel, a kuplaje na dva», Kabiakoŭ adznačyŭ, što jon charaktaryzuje ŭmovy źniešniaha handlu abjomami biez uliku nafty, naftapraduktaŭ i pryrodnaha hazu. «U 2008 hodzie salda (biez uliku enierharesursaŭ. — BiełaPAN.) za ŭvieś hod, dobry hod, pamiatajecie, tam kryzis tolki krychu začapiŭ, tolki dzieści čaćviorty kvartał, było 843 miljony dołaraŭ stanoŭčaha salda na karyść Biełarusi. U 2009 hodzie byŭ miljard i 132 miljony, u 2010-m — 2.180, za studzień — vierasień 2011 hoda — bolš za čatyry miljardy», — pryvioŭ prykład Kabiakoŭ.

Pavodle słoŭ Kabiakova, zadača pasolstva — za košt rostu ekspartu «ŭ maksimalnaj stupieni ŭrehulavać admoŭnaje salda z Rasijskaj Fiederacyjaj, kab vyjści na stanoŭčy bałans krainy». «Kali budzie stanoŭčy handlovy bałans, to budzie dastatkovaje ŭkładańnie valuty, kab zadavalniać popyt jak jurydyčnych asob, tak i fizičnych asob, i adpaviednaja kursavaja palityka, jakaja budzie pravodzicca ŭ krainie bolš stabilna, čym heta adbyvajecca siońnia», — ličyć Kabiakoŭ.

• 0
• 0
• 0
• 0
• 0
• 0
• 0
• 0