Kiraŭnik hramadskaha abjadnańnia «Tavarystva biełaruskaj movy imia F.Skaryny» Aleh Trusaŭ maje namier damahacca pryniaćcia Praviłaŭ darožnaha ruchu (PDR) na biełaruskaj movie asobnym ukazam prezidenta. Pra heta jon zajaviŭ 8 śniežnia ŭ Minsku na prezientacyi pierakładu PDR na biełaruskuju movu.
«Ja źbirajusia źviarnucca ŭ Administracyju prezidenta, z tym kab vyjšaŭ biełaruskamoŭny ŭkaz prezidenta ab tym, kab Praviły darožnaha ruchu byli zaćvierdžany ŭkazam na biełaruskaj movie. Kali my rychtavali hetyja praviły, akazałasia, što jany prymajucca nie zakonam. Nie praz parłamient u dvuch čytańniach i Savietam respubliki, a ŭkazam prezidenta. Ź inšaha boku, heta dobra — niama biurakratyčnych pieraškod. My stavim pytańnie: voś vam viersija PDR na biełaruskaj movie, voś vam patrabavańni, i, kali prezident vydaść ukaz — heta budzie ŭžo aficyjny pierakład», — skazaŭ Trusaŭ.
Pavodle jaho słoŭ, u takim razie «aficyjna zamacoŭvajecca vialiki płast biełaruskaj leksiki ŭ takim dalikatnym vypadku, jak techničnyja terminy». «Heta vielmi važna, pakolki tam bolš za tysiaču słoŭ, jakija nie pierakładalisia na biełaruskuju movu», — adznačyŭ Trusaŭ.
Namieśnik staršyni TBM Alena Anisim adznačyła, što heta «vielmi važna dla pašyreńnia ŭžyvańnia biełaruskaj movy». «Usie my tak ci inakš uduzielniki darožnaha ruchu. Na padstavie taho, što ŭsie terminy buduć pryznanyja jak aficyjnyja, my zmožam kazać pra vydańnie knih dla dziaciej pa PDR na biełaruskaj movie, vypuskać biełaruskamoŭnyja dapamožniki dla biełaruskich aŭtatechničnych śpiecyjalnaściaŭ, prapanoŭvać nastaŭnikam, jakija pravodziać biełaruskamoŭnyja zaniatki, zajmacca ź dziećmi pa Praviłach darožnaha ruchu
Akramia taho, adznačyła Anisim, TBM užo raspracavała kanśpiekt pa vyvučeńni praviłaŭ darožnaha ruchu na biełaruskaj movie. «Heta toj materyjał, jaki zmohuć vykarystoŭvać aŭtainstruktary ŭ pracy ź biełaruskamoŭnymi studentami aŭtaškoł, — skazała jana. — Heta materyjał, jaki možna budzie vykarystoŭvać u praktycy, padrychtavać ekzamien na pravy i h.d.».
