Vyniki-2011. Čałaviek hoda — Siarhiej Michałok

Ad Siarhieja Michałka sychodzić mahutnaja enierhietyka.

21-hadovy Mikita Lichavid vyjšaŭ z turmy pieramožcam.

Błohier Jaŭhien Lipkovič prydumaŭ žartaŭlivuju abrevijaturu ŠOS.

Advakat Źmitra Daškieviča Maryjana Siamieška, za joj - advakat Eduarda Łobava - Alena Aŭsiańnikava.

Darja Katkoŭskaja - arhanizatarka dapamohi zatrymanym paśla Płoščy-2011 z synam Alesiem.

Siarhiej Darafiejeŭ prymusiŭ Lidziju Jarmošynu pakinuć u noč na 20 śniežniastudyju "Vybara".

Lidzija Jarmošyna zaklikaje ŭsich varyć boršč.

Ź Siarhiejem Rumasam źviazvajuć nadziei na rynkavy kurs ekanomiki.

Arciom Šarkoŭ arhanizavaŭ u Biełarusi akcyi "Stom-bienzin".

Viačasłaŭ Dzijanaŭ -- arhanizatar "maŭklivych akcyj".

Intelektuał Vital Silicki pamior ad raku. Jamu było 38 hadoŭ.

Rusłan Salej raźbiŭsia ź jarasłaŭskim "Łakamatyvam". Kamanda lacieła ŭ Minsk na adkryćcio KCHŁ.

Hieorhij Kandraćjeŭ vyvieŭ moładzievuju zbornuju na Alimpijadu-2012.

Aktyvistki Femen praviali dziorkuju akcyju kala biełaruskaha KDB.

Dźmitryj Kanavałaŭ i Uładzisłaŭ Kavaloŭ asudžanyja da śmiarotnaha pakarańnia. 160 tysiač padpisalisia za admienu śmiarotnaha pakarańnia.

U śpikiera savieta respubliki Anatola Rubinava nie zhasaje paetyčny talent.

Žyćciapis Franaka Viačorki loh u asnovu polskaha błokbastara pra Biełaruś.

Sioleta naš vybar paŭ na Siarhieja Michałka. Lidar hurtu «Lapis Trubiackoj» praź niekalki dzion paśla Płoščy «vykinuŭ» u internet pieśniu «Hraj». «Napiliś byki, skačuć pa krainie, topčuć ručniki kapytami ŭ hlinie», — śpiavaŭ Michałok. Mnohija pabačyli ŭ kampazicyi paraleli z tym momantam, kali štodnia adbyvalisia aryšty, pieratrusy, hvałt.

«Lapis Trubiackoj» pačynaŭ jak bałahanny hurt, nakiravany na rasijskuju aŭdytoryju. «Uviazu ciabie, uviazu ŭ Sočy», — śpiavaŭ puchły Michałok. Za apošniaje dziesiacihodździe lidar kamandy nie tolki nakačaŭ muskuły, ale i staŭ bližejšy da biełaruskaj rečaisnaści i movy.

U sakaviku «Lapis Trubiackoj» traplaje ŭ «čorny śpis» biełaruskich vykanaŭcaŭ. Ich pieśni zabaronienyja na radyjostancyjach i telekanałach.

Michałok daje rezkija intervju, dzie nazyvaje Łukašenku «chłusam, złodziejem i nieprezidentam». Heta vyklikała skryhat u Hienieralnaj prakuratury,

jakaja vyklikaje Michałka dla tłumačeńniaŭ vykazvańniaŭ na adras kiraŭnika krainy.

Pry kancy hoda «Lapis» zdymaje klip na kłasičny vierš Janki Kupały «Chto ty hetki?». Klip ź vializnym bieł-čyrvona-biełym ściaham pahladzieli na Jutubie ŭžo paŭmiljona razoŭ.

Na svaich kancertach Michałok hukaje «Žyvie Biełaruś» i ŠOS. Pad sercam jon vybiŭ tatuiroŭku «Nie być skotam», a na nazie — Pahoniu. Papularny muzyka maje vialiki ŭpłyŭ na svaju aŭdytoryju.

Entuzijast hoda — stvaralnik sajta Prakapovi'č

Kali ŭ krainie prapała valuta, mnohija zajmali čerhi ŭ bankach, dva razy na dzień adznačajučysia ŭ pierakličkach. Zrešty, razhubilisia nie ŭsie.

Hrupa entuzijastaŭ stvaryła virtualny abmieńnik prokopovi.ch.

Dziejańnie jaho było prostym: žadajučyja pradać i nabyć dalary damaŭlalisia miž saboj. Pieršy nios valutu ŭ bank, a druhi — adrazu jaje nabyvaŭ, dapłočvajučy paśla roźnicu miž aficyjnym i nieaficyjnym kursami.

Sajt nabyŭ šalonuju papularnaść u čas kryzisu. Pracavaŭ nie tolki abmieńnik, apieratyŭna abnaŭlalisia i naviny. Stvaralniki začyniać «Prakapoviča» nie źbirajucca i ciapier, kali valuta pa novych cenach viarnułasia ŭ banki. Dzie harantyja, što pasłuhi sajta znoŭ nie spatrebiacca?

Hieroi hoda — Mikita Lichavid, Andrej Sańnikaŭ, Mikałaj Statkievič dy inšyja

Paśla Płoščy paŭsotni čałaviek apynulisia za kratami.

Hetyja ludzi prajavili asabistuju mužnaść i hieraizm. Čaho varty 21-hadovy chłopiec Mikita Lichavid, jaki admaŭlaŭsia vykonvać zahady turemnaha kiraŭnictva, nie ličačy siabie vinavatym. Za heta

Lichavid pravioŭ u štrafnych izalatarach 81 sutki. Ale jaho tak i nie złamali.

Usim palitviaźniam vykručvali ruki, kab jany padpisali prašeńni ab pamiłavańni na imia Łukašenki, kab być vyzvalenymi. Bolšaść nie padpisała ničoha, u tym liku kandydaty ŭ prezidenty Andrej Sańnikaŭ, Mikałaj Statkievič, Dźmitryj Us, palityki Źmicier Bandarenka, Pavieł Sieviaryniec dy inšyja.

Uzor addanaści demanstravali žonki i mamy aryštavanych — Iryna Chalip, Maryna Adamovič, Nasta Pałažanka, Darja Korsak. Sukamierniki zajzdrościli palitviaźniam, što tyja majuć takich spadarožnic žyćcia.

Abaroncy hoda — advakaty

Kolki ich užo pałochali ŭ minułyja hady za pracu z palitviaźniami, ale ŭsio adno aryštavanyja na Płoščy biez abarony nie zastalisia.

Choć advakaty ryzykavali stracić svaju vysokaapłatnuju pracu.

Minskaja abłasnaja kalehija pazbaviła licenzii advakata Daškieviča i Sańnikava Paŭła Sapiełku.

Prypynili licenziju Tamary Sidarency (abaronca Niaklajeva), Uładzimiru Toŭściku, Tamary Harajevaj (aboje — Chalip), Alehu Ahiejevu (Michaleviča).

Prykład ź inšaj palarnaści — sudździ. Nivodzin ź ich nie vynies apraŭdalnaha prysudu pa spravie Płoščy.

Usie štampavali: 3, 4, 6 hadoŭ turmy.

Hramadskaść nazirała, jak vypusknica Kołasaŭskaha liceja Volha Komar (Kanojka) adpraŭlała na čatyry hady ŭ turmu Vasila Parfiankova, a inšy vypusknik hetaj ustanovy Źmicier Łajeŭski baraniŭ Alesia Bialackaha.

Serca hoda — Darja Katkoŭskaja

Nichto nie zabyty, ništo nie zabytaje.

Pa takim pryncypie dziejničali vałanciory, što dapamahali viaźniam Płoščy. Bieź pieradački na Novy hod nie zastaŭsia nichto. Praca kaardynavałasia na Siadzibie BNF, a jaje ruchavikom była jurystka Darja Katkoŭskaja.

Słova hoda — ŠOS

Ź lohkaj ruki błohiera Jaŭhiena Lipkoviča žartaŭlivy trasiankavy skarot staŭ papularny nie tolki na internet-staronkach.

ŠOS pišuć na damach i haražach, słova vykarystoŭvajuć jak tost na zastollach.

Navat na radyjostancyjach zamaŭlajuć vinšavańnie dla ŠOSa Alaksandra Ryhoraviča.

Žurnalist hoda — Siarhiej Darafiejeŭ

Viadučy ANT Siarhiej Darafiejeŭ pravioŭ sumlenny efir u dzień vybaraŭ, dzie davaŭ słova nie tolki pradstaŭnikam ułady, ale i apazicyi.

Za heta miesca viadučaha jon straciŭ. Ale doŭha biez pracy Darafiejeŭ nie zastavaŭsia, uładkavaŭšysia va Ukrainie.

Boršč hoda — Lidzija Jarmošyna

Staršynia CVK hatova jašče šmat razoŭ paŭtarać svaje słovy pra boršč,

jaki pavinny varyć žančyny zamiest udziełu ŭ mitynhach. Chacia heta była nie adzinaja fiejeryčnaja zajava sioleta: «Ja strašenna rasčaravanaja žanočaj častkaj maładoha pakaleńnia — jany ahidnyja maci, jany paskudnyja žonki, jany nie dobryja, nie miłasernyja ludzi. Tamu — jak chutčej — treba ich zaklikać da baršča, dziaciej, knižak i hetak dalej».

Avans hoda — Siarhiej Rumas

Z hetym novym čałaviekam va ŭradzie źviazvali nadziei na rynkavy kurs ajčynnaj ekanomiki.

I Rumas hetyja spadziavańni šmat razoŭ siłkavaŭ svaimi słovami pra reformy. Tym nie mienš, vialikich źmienaŭ Rumasu dy inšym «rynačnikam» pravieści tak i nie dali. Vice-premjer pakul zastaŭsia adnym vialikim avansam.

Novyja imiony ŭ palitycy — Arciom Šarkoŭ i Viačasłaŭ Dzijanaŭ

U samy razhar ekanamičnaha kryzisu, kali maŭčała apazicyja, na scenu vyjšli novyja ludzi.

Aŭtaamatar Arciom Šarkoŭ zarhanizavaŭ akcyju «Stop-bienzin», jakaja ŭ červieni pierakryła praśpiekt Niezaležnaści i dabiłasia sastupak ad uładaŭ.

Na červień prypaŭ i pik «Maŭklivych akcyj» pratestu — adnoj z najiarčejšych padziej hoda. Ciažka skazać, ci moža naležyć aŭtarstva hetaj idei adnamu čałavieku, ale ich źviazvajuć ź imiem palituciekača Viačasłava Dzijanava.

Straty hoda — Vital Silicki, Rusłan Salej

Pamior ad raku vydatny intelektuał, dyrektar Biełaruskaha instytuta stratehičnych daśledavańniaŭ Vital Silicki.

Čałaviek z zachodniaj adukacyjaj i biełaruskim ducham. Jamu było 38 hadoŭ.

U avijakatastrofie pad Jarasłaŭlem razam sa svajoj kamandaj «Łakamatyŭ» zahinuŭ kapitan chakiejnaj zbornaj Rusłan Salej.

Jamu było ŭsiaho na hod mieniej, čym Silickamu.

Trenier hoda — Hieorhij Kandraćjeŭ

Uradženiec Tałačynskaha rajona Hieorhij Kandraćjeŭ vyvieŭ moładzievuju zbornuju Biełarusi na Alimpijadu-2012.

Heta pakul najbolšy pośpiech našaha futboła na ŭzroŭni zbornych. Piatroviča za hierojstva z maładziožkaj pavysili da treniera nacyjanalnaj kamandy.

Płyŭčycha Alaksandra Hierasimienia ŭpieršyniu vyjhrała zołata na čempijanacie śvietu. Kaža, joj prapanoŭvali pierajechać u Rasiju na vyhadny kantrakt, ale jana admoviłasia.

Šafior hoda — Michaił Zacharaŭ

Niekali ŭ hetaj naminacyi pieramahaŭ ciažkaatlet Andrej Aramnaŭ, jaki pa pjani traplaŭ u darožnyja pryhody.

Sioleta adznačyŭsia chakiejny trenier Michaił Zacharaŭ, jaki raźbiŭ svoj Bentley Continental GT.

Cana takoj mašyny 200 tysiač dalaraŭ. Łukašenka potym publična skaža, što Zacharaŭ byŭ niećviarozy, u vyniku nastaŭnika pazbavili pravoŭ na try hady.

Akcyja hoda — «Fiemien»

Ukrainskija dziaŭčaty z abjadnańnia «Fiemien» praviali śmiełuju akcyju pad ścienami KDB.

Ahaliŭšysia i načapiŭšy vusy, jany hukali «Žyvie Biełaruś» i «Svaboda palitviaźniam». U adkaz na akcyju dziaŭčat vyvieźli ŭ les u Jelski rajon, źbili i pakocali vałasy. Tym nie mienš, «Fiemien» źbirajucca pravieści ŭ Biełarusi jašče akcyi.

Asudžanyja hoda — Kanavałaŭ i Kavaloŭ

Terakt u minskim mietro byŭ adnoj z centralnych temaŭ hoda.

15 zahinułych, bolš za sotniu paranienych u vyniku vybuchu 11 krasavika na «Kastryčnickaj».

Viarchoŭny Sud pryznaŭ vinavatymi ŭ ździajśnieńni terakta viciebskich chłopcaŭ Dźmitryja Kanavałava i Uładzisłava Kavalova. Ich prysudzili da rasstrełu. Ź listom da Łukašenki ab pamiłavańni źviarnuŭsia tolki Kavaloŭ.

Sud pastaviŭ kropku, ale ŭ hramadstva zastajecca jašče šmat pytańniaŭ pa hetaj spravie.

Paet hoda — Anatol Rubinaŭ

U śpikiera savieta respubliki Anatola Rubinava na vośmym dziasiatku hadoŭ nie zhasaje paetyčny talent.

U vydaviectvie «Litaratura i mastactva» vyjšli adrazu dźvie jahonyja knihi. Staršynia PEN-centra, paet Andrej Chadanovič kaža, što heta novaje słova ŭ suśvietnaj litaratury.

Och, narod ty naš, narod,
Och, narodiŝie!
Iz połtysiači porod —
Odna porodiŝa!
Naš odin — za ichnich dvuch —
Tolko daj borŝa…
I raz v dvadcať kriepčie duch…
Iz tualetiŝa.

«Šalonyja» hoda — «Budźma»

Kampanija «Budźma» stvaryła piacichvilinny pazityŭny klip pa historyi Biełarusi,

jaki ŭ styli rep pračytaŭ muzyka Alaksandr Pamidoraŭ. Rolik z «kankretnym mažoram Franciškam Skarynam» atrymaŭsia sapraŭdy ŭdałym i paśpiachovym.

Kinahieroj hoda — Franak Viačorka

Ci stanie błakbastaram film «Miron. Žyvie Biełaruś», havaryć jašče rana.

Jaho zdymki tolki pačalisia ŭ Polščy. U asnovu scenara lehli niekatoryja epizody z žyćcia lidara moładzi Franaka Viačorki. Charakterna, što kino dla biełarusaŭ zdymajecca ŭ susiedniaj krainie. Na «Biełaruśfilmie» sioleta vartych stužak nie było.