6 studzienia ŭ Biełarusi nabyli moc papraŭki ŭ Kodeks ab administracyjnych pravaparušeńniach i Pracesualna-vykanaŭčy kodeks ab administracyjnych pravaparušeńniach, jakija datyčacca adkaznaści za parušeńni ŭ śfiery vykarystańnia internetu.
Ustanaŭlivajecca adkaznaść jurydyčnych asob i indyvidualnych pradprymalnikaŭ za ažyćciaŭleńnie imi dziejnaści pa realizacyi tavaraŭ, vykanańni rabot, akazańni pasłuh na terytoryi Biełarusi z vykarystańniem infarmacyjnych sietak, sistem i resursaŭ, jakija majuć padklučeńnie da internetu i nie raźmieščany na terytoryi krainy i (ci) nie zarehistravanyja va ŭstanoŭlenym paradku. Štraf u hetym vypadku moža skłaści ad 10 da 30 bazavych vieličyń.
Štraf ad 5 da 15 bazavych vieličyń moža być pryznačany apierataru pieradačy danych, internet-kafe i kampjutarnamu kłubu ŭ tym vypadku, kali jany nie ažyćciaŭlajuć identyfikacyju abanienckich pryład pry akazańni internet-pasłuh i (ci) karystalnikaŭ internet-pasłuh u punktach kalektyŭnaha karystańnia, ulik i zachoŭvańnie źviestak pra abanienckija pryłady, piersanalnych danych karystalnikaŭ internet-pasłuh, a taksama źviestak pra akazanyja internet-pasłuhi.
Ad 10 da 30 bazavych vieličyń — heta štraf, jaki moža nakładacca na internet-pravajdara za parušeńnie patrabavańniaŭ ab abmiežavańni dostupu karystalnikaŭ internet-pasłuh da infarmacyi, zabaronienaj da raspaŭsiudžańnia ŭ adpaviednaści z zakanadaŭčymi aktami. Abaviazkovaja internet-filtracyja ŭviedziena dla dziaržaŭnych orhanaŭ, vyklučajučy siłavyja viedamstvy, i ŭstanoŭ adukacyi. Dla ŭsich astatnich internet-dostup mohuć abmiežavać tolki pa žadańni samoha karystalnika.
Hetyja novaŭviadzieńni ŭ zakanadaŭstvie mnohija rasceńvajuć jak internet-cenzuru. Šerah analitykaŭ, pradstaŭnikoŭ internet-supolnaści i karystalnikaŭ sietki aścierahajucca ŭzmacnieńnia žorstkaści kantrolu za niepažadanymi ŭładam apazicyjnymi sajtami.
Pavodle nieaficyjnych danych, užo siońnia ŭ śpis zabaronienych resursaŭ akramia sajtaŭ parnahrafičnaha źmiestu ŭklučanyja sajty niezarehistravanaha pravaabarončaha centra «Viasna», «Biełorusskij partizan», «Chartyja'97» i błoh Jaŭhiena Lipkoviča ŭ «Žyvym žurnale».
Napiaredadni nabyćcia mocy papraŭkami ŭ KoAP i PVKoAP Apieratyŭna-analityčny centr pry prezidencie Biełarusi (AAC) raspaŭsiudziŭ kamientaryj. U im adznačajecca, što «źmianieńni ŭ zakanadaŭstva zaklikanyja stvaryć spryjalnyja ŭmovy dla subjektaŭ haspadarańnia Biełarusi, zabiaśpiečyć prazrystaść internet-handlu, abaranić intaresy biełaruskich internet-karystalnikaŭ ad zabaronienaj da raspaŭsiudžańnia zakanadaŭstvam infarmacyi (handal ludźmi, parnahrafičnyja materyjały, prapahanda nasilla, biaźlitasnaści i da t.p.), stvaryć umovy dla abarony honaru i hodnaści».
Jakich-niebudź abmiežavańniaŭ pa vykarystańni internet-resursaŭ dla hramadzian nie praduhledžvajecca, ich dostup da zamiežnych internet-sajtaŭ nie abmiažoŭvajecca, a raspaŭsiudžnaja niekatorymi ŚMI i internet-resursami infarmacyja ab uviadzieńni ŭ Respublicy Biełaruś adkaznaści za naviedvańnie zamiežnych sajtaŭ nie adpaviadaje rečaisnaści, śćviardžaje AAC.
«Zakanadaŭstva nie pieraškadžaje dziejnaści biełaruskich subjektaŭ haspadarańnia pa realizacyi tavaraŭ, vykanańni rabot i akazańni pasłuh za miežami Respubliki Biełaruś z vykarystańniem zamiežnych internet-resursaŭ. Da administracyjnaj adkaznaści mohuć pryciahvacca tolki jurydyčnyja asoby i indyvidualnyja pradprymalniki Respubliki Biełaruś za ažyćciaŭleńnie na jaje terytoryi dziejnaści pa realizacyi tavaraŭ, vykanańni rabot i akazańni pasłuh z vykarystańniem internet-resursaŭ, raźmieščanych za miežami nacyjanalnaha siehmienta sietki internet», — havorycca ŭ paviedamleńni AAC.
Kamientary