Šeść faktaŭ pa spravie Bialackaha, pra jakija maŭčyć BT

Aficyjnyja srodki masavaj infarmacyi, jakija raspačali šalonuju kampaniju dyfamacyi suprać viadomaha biełaruskaha pravaabaroncy Alesia Bialackaha, vielmi lubiać raspaviadać pra jahonuju majomaść. U suviazi z hetym my, kalehi Alesia Bialackaha, vyrašyli ahučyć realnyja fakty, jakija zamoŭčvajucca ci skažajucca štatnymi prapahandystami ŭ metach dyskredytacyi źniavolenaha pravaabaroncy.

Adrazu adznačym, što ŭsie vykładzienyja fakty padćviardžajucca aficyjnymi dakumientami, jakija znachodziacca ŭ materyjałach kryminalnaj spravy A. Bialackaha i byli ahučany padčas sudovaha pasiedžańnia.

Fakt pieršy:

Dvuchpakajovaja kvatera, u jakoj pražyvaje siamja Alesia Bialackaha, była nabytaja ŭ 1999 hodzie ŭ vyniku prodažu dvuch adnapakajovych kvater, jakija naležali siamji Bialackich (znachodzilisia na vuł. Varanianskaha ŭ h. Minsku). Varta adznačyć, što, pracujučy dyrektaram Litaraturnaha muzieja Maksima Bahdanoviča (z 1988 pa 1998 hod), Aleś Bialacki atrymaŭ adnu z hetych adnapakajovych kvater pa ordary Ministerstva kultury Respubliki Biełaruś, druhaja była nabyta ŭ pačatku 90-ch hadoŭ — u hetyja časy Aleś aktyŭna zajmaŭsia pierakładčyckaj i vydavieckaj dziejnaściu.

Fakt druhi

Kvatera na praśpiekcie Niezaležnaści 78A-48, u jakoj mieścicca ofis začynienaha ŭładami pravaabarončaha centru «Viasna», była nabytaja ŭ 2000 hodzie. Pa ŭzhodnienym rašeńni rady pravaabarončaha centra kvatera była aformlenaja na pryvatnuju asobu, u joj byŭ aficyjna zarehistravany Aleś Bialacki. Dziakujučy tamu, što ofis źjaŭlaŭsia pryvatnaj ułasnaściu, pravaabaroncy zmahli prapracavać u im 11 apošnich hadoŭ. U hetaj kvatery rehularna pravodziacca pres-kanfierencyi i prezientacyi, jana dobra viadomaja praktyčna ŭsim hramadka-palityčnym aktyvistam krainy i ludziam, jakija sutykajucca z parušeńniem ich pravoŭ, jaje naviedvajuć zamiežnyja dypłamaty.

Viedajuć pra isnavańnie ofisa i biełaruskija śpiecsłužby. U aficyjnych sankcyjach KDB na praviadzieńnie pieratrusaŭ u dadzienaj kvatery ŭ śniežni 2010 i studzieni 2011 hh. było ŭkazana, što śledčyja mierapryjemstvy adbyvalisia ŭ ofisie «niezarehistravanaha PC «Viasna».

U dziaržaŭnych ŚMI admysłova nazyvajuć sučasny rynkavy košt nieruchomaści, jaki značna vyras za apošnija 13 hadoŭ. Razam z tym, na momant nabyćcia košt hetaj kvatery składaŭ kala 23 000 dalaraŭ ZŠA.

Fakt treci:

«Šykoŭny katedž» Bialackich u miastečku Rakaŭ ujaŭlaje saboj ni što inšaje, jak adramantavanuju staruju draŭlanuju chatu (tamu jaje nieachvotna pakazvajuć pa BT). Lecišča było nabytaje siamjoj u 2005 h., pryčym ziamielny ŭčastak, na jakim staić dom, nie byŭ pradmietam kupli-prodažu. Učastak naležaŭ papiarednim haspadaram na pravie pažyćciovaha vałodańnia (nie byŭ pryvatnaj ułasnaściu) i byŭ paźniej pryvatyzavany Bialackim samastojna. Jak viadoma, pryvatyzacyja ziamielnych učastkaŭ ŭ Biełarusi kaštuje zusim nievialikija hrošy: u dadzienym vypadku jana abyšłasia Bialackim u sumu pamieram u 161 330 biełaruskich rubloŭ.

Taksama źviartajem uvahu na toje, što pieryjad atrymańnia srodkaŭ A.Bialackim, jaki razhladaŭsia ŭ sudzie pa kryminalnaj spravie pravaabaroncy — 2007 -2011 hh., a nabyćcio majomaści adbyvałasia ŭ 1999, 2000 i 2005 hadach adpaviedna.

Fakt čaćviorty:

«Šykoŭny aŭtamabil», jaki nabyŭ A.Bialacki ŭ 2010 hodzie — heta «Sitrajen S-5» 2003 h. vypusku, jaki byŭ uviezieny ŭ Biełaruś ź Litvy ŭ paškodžanym stanie. Pavodle aficyjnaj damovy kupli-prodažu, jon kaštavaŭ 2 300 Jeŭra, a razam z mytnymi płaciažami — 3000 Jeŭra.

Aleś Bialacki nie maje vadzicielskich pravoŭ, mašynaj karystaŭsia jahony syn Adam — adzin z aktyŭnych udzielnikaŭ akcyj «stop-bienzin» u Minsku. U lipieni 2011 hoda jon adzin ź pieršych spyniŭ svaju mašynu na praśpiekcie, čym inicyjavaŭ pierakryćcio ruchu na niekalki hadzin. Za ŭdzieł u žnivieńskaj akcyi Adam byŭ aryštavany, a mašyna była pahružana na evakuatar i vyviezienaja na štrafnuju stajanku, dzie znachodzicca i ciapier.

Fakt piaty:

Za pieryjad z 1994 h. pa 2008 h. inśpiekcyja pa padatkach i zborach Pieršamajskaha r-na h. Minska pravodziła pravierki prybytkaŭ Alesia Bialackaha i členaŭ jahonaj siamji. Pieravyšeńnie prybytkaŭ A. Bialackaha nad jahonymi vydatkami pa vynikach dadzienych pravierak skłała suma, ekvivalentnaja 30 dalaram ZŠA. Pieravyšeńnia vydatkaŭ nad prybytkami ŭ inšych členaŭ siamji nie było ŭstanoŭlena. Varta nahadać, što mienavita na hety pieryjad času i prypadajuć ździełki z kuplaj majomaści.

Fakt šosty:

Hrašovyja srodki NIE APYNULISIA na rachunkach, adkrytach A. Bialackim u Litvie i Polščy, a BYLI PIERALIČANYJA tudy šeraham fondaŭ zhodna z dvuchbakovymi damoŭlenaściami pamiž dadzienym fondami i Pravaabarončym centram «Viasna». Atrymanyja srodki raschodvalisia arhanizacyjaj na zajaŭlenyja mety: pravabarončuju dziejnaść, u tym liku — akazańnie dapamohi achviaram parušeńnia pravoŭ čałavieka. Usia spravazdačnaść pa raschodvańni atrymanych srodkaŭ była pradstaŭlena Pravaabrončym centram «Viasna» fondam, jakija nie vykazali nivodnaj pretenzii da ich vykarystańnia. Takim čynam, hrašovyja srodki z rachunkaŭ, adkrytych na imia A. Bialackaha, nie źjaŭlajucca jahonym asabistym prybatkam i, adpaviedna, nie padlahajuć padatkaabkładańniu.

* * *

Vice-prezident Mižnarodnaj fiederacyi pravoŭ čałavieka, kiraŭnik zakrytaha ŭładami pravaabarončaha centra «Viasna» Aleś Bialacki 24 listapada byŭ pryhavorany da čatyroch z pałovaj hadoŭ pazbaŭleńnia voli ŭ kałonii ŭzmocnienaha režymu z kanfiskacyjaj majomaści. Jon pryznany vinavatym va ŭtojvańni dachodaŭ u asabliva bujnym pamiery. Padstavaj dla kryminalnaha pieraśledu Bialackaha stała infarmacyja ab jaho zamiežnych bankaŭskich rachunkach, pieradadzienaja ŭ Minsk čynoŭnikami Litvy i Polščy ŭ ramkach dvuchbakovych pahadnieńniaŭ ab pravavoj dapamozie. Potym polskija i litoŭskija ŭłady vykazali prabačeńni Bialackamu i jaho siamji.

• 0
• 0
• 0
• 0
• 0
• 0
• 0
• 0