Zhodna z prahnozam SB, tempy rostu VUP Biełarusi ŭ 2012 h. źniziacca da 0,5%

Suśvietny bank (SB) prahnazuje ŭ 2012 hodzie padzieńnie tempaŭ rostu VUP Biełarusi da 0,5%. Hetaja ličba ŭtrymlivajecca ŭ apublikavanym siońnia štohadovym dakładzie SB «Hłabalnyja ekanamičnyja pierśpiektyvy na 2012 hod».

Miž tym, zhodna z zaćvierdžanym Prahnozam sacyjalna-ekanamičnaha raźvićcia Biełarusi na 2012 hod, rost VUP pavinien skłaści 5–5,5%.

U 2013 hodzie pryrost VUP u Biełarusi, pavodle acenki SB, składzie 3,5%.

Na dumku ekśpiertaŭ Suśvietnaha banka, «suśvietnaja ekanomika ŭvajšła ŭ niebiaśpiečnuju fazu». «Finansavyja ŭzrušeńni ŭ Jeŭropie častkova raspaŭsiudzilisia na krainy, jakija stali na šlach raźvićcia, i inšyja krainy, u tym liku z vysokim uzroŭniem dachodaŭ, što da niadaŭniaha času zastavalisia niekranutymi. Hetaje razrastańnie kryzisnych źjaŭ pryviało da pavyšeńnia koštu pazyčańniaŭ u mnohich rehijonach śvietu i pryviało da padzieńnia indeksaŭ na fondavych rynkach, pry hetym prytok kapitału ŭ krainy, jakija stali na šlach raźvićcia, rezka skaraciŭsia. Jeŭropa, pa ŭsioj bačnaści, uvajšła ŭ recesiju», — havorycca ŭ dakładzie.

U suviazi z recesijaj u jeŭrazonie SB źniziŭ prahnoz rostu suśvietnaj ekanomiki ŭ 2012 hodzie z 3,6% (hetaja ličba nazyvałasia bankam minułym letam) da 2,5%.

Źnižany i prahnoz ekanamičnaha rostu dla Rasii — z 4,2% da 3,5%.

Niekatoryja krainy jeŭrapiejskaha rehijonu, adznačajecca ŭ dakładzie, sutyknucca z prablemami inviestavańnia — jak źniešniaha, tak i ŭnutranaha. «U vypadku značnaha paharšeńnia kanjunktury patoki zamiežnaha kapitału mohuć jašče bolš asłabnuć, a košt pazyčańniaŭ moža rezka ŭzraści», — ličać ekśpierty SB.

Jak adznačajecca ŭ dakładzie, «pierad takim scenaryjem uzmacnieńnia žorstkaści finansavych umoŭ asabliva ŭraźlivyja krainy z vysokim uzroŭniem karotkaterminovaj zapazyčanaści abo doŭhaterminovaj zapazyčanaści ź blizkim terminam pahašeńnia, a taksama krainy ź vialikim deficytam rachunku biahučych apieracyj».

Asablivuju ŭraźlivaść u hetym płanie, na dumku ekśpiertaŭ SB, «demanstruje Turcyja, jakaja maje vialiki deficyt rachunku biahučych apieracyj i značny abjom karotkaterminovych daŭhoŭ adnosna vieličyni svaich reziervaŭ». «Biełaruś i Čarnahoryja taksama ŭraźlivyja pierad zamarožvańniem kredytavańnia na hłabalnych rynkach, roŭna, jak i Hruzija, Bałharyja i Rumynija, u jakich vialikija abjomy karotkaterminovaj zapazyčanaści», — ličać aŭtary dakłada. «U hetym kantekście pierśpiektyvy ŭjaŭlajucca vielmi niapeŭnymi», — padkreślivajuć jany.

• 0
• 0
• 0
• 0
• 0