Śviedki kažuć, što takich masavych moładzievych razborak nia bačyli ŭžo bolš jak 10 hadoŭ. Pavodle roznych źviestak, paŭtary hadziny bilisia ad 40 da 200 čałaviek. Milicyja nie «zaminała».
Masavaj bojkaj skončyłasia śviatkavańnie Dnia śviatoha Valancina ŭ nievialikim rajonnym centry Bieraściejskaj vobłaści. Padrabiaznaści stali viadomyja tolki praź niekalki dzion. Paśla taho, jak acichli žarści dy ačulisia ad zaznanaha šoku paciarpiełyja. Śviedki kažuć, što takich masavych moładzievych razborak nia bačyli ŭžo bolš jak 10 hadoŭ.
Usio zdaryłasia paśla viečarynki ŭ adnym ź internataŭ sielskahaspadarčaha profilu. Navučency viartalisia dachaty, kali na ich napali nieviadomyja. Jak ćvierdziać vidavočcy, u rukach niekatorych z napadnikaŭ byli žaleznyja pruty, jakimi jany źbivali z noh moładź. Pavodle roznych źviestak, bilisia ad 40 da 200 čałaviek.
Za navučencaŭ PTV chacieli byli zastupicca majstry vytvorčaha navučańnia, adnak byli ŭ momant źbityja bolšymi pa kolkaści napadnikami. Niechta z persanału vučelni zatelefanavaŭ u «02», adnak paratunku ad pravaachoŭčych orhanaŭ tak i nie dačakalisia, tym časam bojka, dakładniej, źbićcio, tryvała paŭtary hadziny. U miastečku hamoniać, byccam rabotniki milicyi zbajalisia ŭstupać u bojku na nalotčykami dziela kolkasnaj pieravahi apošnich u dziasiatki razoŭ, tym časam navučencaŭ PTV paprostu bili.
Na ŭmovach ananimnaści ŭdałosia vyśvietlić versiju zdareńnia. Niekatoryja z navučencaŭ, jakija žyvuć u inšych pasieliščach, nie admaŭlajuć, što miascovaja moładź rehularna patrabavała ź ich «myta» ŭ paradku «ty ź jakoha rajonu budzieš?». Kažuć, što niechta ź śmiełych płacić admoviŭsia, paśla čaho j byli pryznačanyja razborki. Źlakanyja navučency raspaviadajuć, što «raźbiracca» ź imi pryjaždžali ci nie z usich rajonnych centraŭ vobłaści, bahata chto z bandytaŭ byŭ na mašynach.
Małaryta — nievialikaje miastečka. Nieznajomych ludziej bačyli na čyhunačnaj stancyi, u miascovaj kramie. Čahości padobnaha nia tolki ŭ Małarycie, ale i ŭ vobłaści, užo daŭnavata nie zdarałasia. Faktyčna heta była ŭžo daŭno zabytaja ŭ Biełarusi masavaja bojka «ścienka na ścienku».
Na ščaście, vyniki nie byli nadta dramatyčnymi. U medyčnyja ŭstanovy z paškodžańniami roznaj stupieni ciažkaści źviarnulisia tolki niekalki čałaviek. U kahości — vycion, u kahości — rvanaja rana.
U Małaryckim RAUSie nie śpiašajucca kamentavać zdareńnie. Pavodle najaŭnaj infarmacyi, usčataja kryminalnaja sprava pa artykule «chulihanstva z abciažarvalnaj prykmietaj, učynienaje hrupaj asob».
Davoli dziŭna, što bojka z takoj vialikaj kolkaściu ŭdzielnikaŭ nie była razahnanaja milicyjantami. Ad epicentru padziejaŭ da ŭčastku padać rukoj. Mahčyma, milicyjanty navat čuli łajanku i brazhat raźbivanych plašak.
Sytuacyja pa svaim raźvićci duža nahadvaje incydent, jaki adbyŭsia pry kancy 2006 hodu ŭ elektryčcy, u jakoj moładź viartałasia ź śviata Miensku. Milicyja nie pryjšła na dapamohu ludziam, jakija trapili ŭ niebiaśpiečnuju kałatnieču. Nieviadoma taksama, ci znojdzienyja zavadatary zabureńniaŭ i jakija śledčyja dziejańni pravodziacca datyčna ich.
U Małarycie ŭžo siam‑tam kažuć pra nibyta adrodžanuju ruskuju tradycyju. Ale, na žal, zhadanaja bojka nijak nie pasuje da farmatu ruskaj zabavy, jakoj ciešylisia pierad Maślenkaj u carskaj Rasiei. Tady paśla boju, jaki prachodziŭ pa vyrazna akreślenych praviłach, udzielniki prasili adno ŭ adnoha vybačeńnia j całavalisia.
Što ž da navučencaŭ sielskahaspadarčaha PTV, to chłopcy paśla incydentu na vulicu biez supravadžńnia starejšych navat vyjści papalić bajacca: «Abiacali «papałavić» pa adnym dy pahamanić «pa paniacijach»»
Fota z Małaryty fillinsakura.livejournal.com
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym4
Kamientary