Tozik: u ekanomicy śfiery adukacyi nieabchodna pieraraźmierkavać resursy

Takoje mierkavańnie vykazaŭ 1 lutaha na pasiadžeńni padahulniajučaj kalehii Ministerstva adukacyi namieśnik prem'jer-ministra Biełarusi Anatol Tozik.

Pavodle słoŭ Anatola Tozika, u Biełarusi ekanomika adukacyi sistemna nie analizujecca. «Mianie paradavała svaim vystupleńniem dyrektar himnazii, jakaja prapanavała nie pavialičvać patoki finansavańnia, a źmianić ich napramki.

I heta pravilna: treba racyjanalna, pa-haspadarsku raźmierkavać srodki, jakija vydzialajucca na halinu, i tyja, jakija śfiera adukacyi zarablaje sama»,

Vice-premjer prapanavaŭ praanalizavać i aptymizavać sistemu ahulnaj siaredniaj adukacyi. Tut jon bačyć niekalki prablem, siarod jakich nizkaja napaŭnialnaść kłasaŭ u sielskaj miascovaści. «Typovaja situacyja: u pieršym kłasie siadzić adzin školnik, i da jaho prychodzić adzin nastaŭnik, u toj ža škole ŭ dziasiatym kłasie adna vučanica, i da jaje prychodziać šeść nastaŭnikaŭ. Treba padyści da kožnaj situacyi ŭzvažana i padumać, ci metazhodny taki raschod biudžetnych srodkaŭ», — skazaŭ Anatol Tozik.

Jon taksama ličyć nieabchodnym abmierkavać pytańnie pryncypu paŭročnaj apłaty pracy nastaŭnika:

«Bolšaść krain śvietu takoha pryncypu nie prytrymlivajucca. U asnoŭnym apłačvajuć rabočy dzień — siudy ŭvachodzić usio, što robić nastaŭnik jak piedahoh i jak kłasny kiraŭnik. Mahčyma, nam taksama varta padumać ab takim vidzie apłaty pracy nastaŭnika».

Namieśnik prem'jer-ministra ŭźniaŭ i prablemu dakumientaabarotu.

«Jašče ŭ vieraśni išła razmova ab tym, što dakumientaabarot u škole vielmi vialiki. I pakul što atrymlivajecca, što z kožnym našym słovam ab baraćbie ź im hety dakumientaabarot pavialičvajecca na 5–10 pracentaŭ»,

Padvodziačy vyniki pasiadžeńnia, Anatol Tozik padkreśliŭ nieabchodnaść pryniaćcia rašeńnia ab stvareńni novaha kvalifikacyjnaha ŭzroŭniu — nastaŭnik-mietadyst. Pry hetym važna praanalizavać dziejnaść instytutaŭ pavyšeńnia kvalifikacyi i pierapadrychtoŭki kadraŭ: vice-premjer pierakanany, što amal 20 pracentaŭ finansavańnia haliny vykarystoŭvajecca ŭpustuju. «Pakolki pa ŭsioj krainie ŭ takich strukturach pracujuć niekalki tysiač čałaviek, ale za apošni hod va ŭrad nie pastupała nivodnaj surjoznaj prapanovy ad ich, — skazaŭ jon. — Heta dziŭna, kali nastaŭnikaŭ źbirajuć na kursy pa pradmietu „čyrlidynh“. Takija zaniatki, mahčyma, i patrebna pravodzić, ale nie za košt biudžetnaha finansavańnia».

• 0
• 0
• 0
• 0
• 0
• 0