Ministr abarony Biełarusi hienierał-lejtenant Juryj Žadobin rastłumačyŭ, što mieŭ na ŭvazie kiraŭnik dziaržavy, havoračy pra ŭdzieł Rasii ŭ pavyšeńni hrašovaha zabieśpiačeńnia biełaruskim vajennasłužačym.
Nahadajem, prymajučy z dakładam 6 lutaha dziaržsakratara Savieta biaśpieki Leanida Malcava i ministra abarony Juryja Žadobina, Alaksandr Łukašenka zajaviŭ: «Mianie cikavić situacyja va Uzbrojenych siłach, madernizacyja armii, kolkaść u tym liku, pytańni finansavańnia. Druhi kirunak, jaki nam nieabchodna abmierkavać, — kadry, hrašovaje zabieśpiačeńnie. I samaje hałoŭnaje pytańnie — budaŭnictva žylla dla vajennasłužačych. My damaŭlalisia ab vypracoŭcy peŭnaha ałharytmu ŭ hetym pytańni. U suviazi z hetym u nas jość damoŭlenaść z prezidentam Rasii. Ja jamu nakiravaŭ list pra nieabchodnaść pošuku dla biełaruskich vajennasłužačych dadatkovych srodkaŭ za košt roznych kirunkaŭ supracoŭnictva Biełarusi i Rasii. I jon paabiacaŭ dapamahčy ŭ hetym płanie». Kiraŭnik dziaržavy adznačyŭ, što ŭ Biełarusi i Rasii praktyčna ahulnaja armija i zadačy, što stajać pierad joj, ale pamier hrašovaha zabieśpiačeńnia vajennych dźviuch krain adroźnivajecca. Jon zapatrabavaŭ, kab takoje stanovišča było źmieniena.
9 lutaha «Biełorusskaja vojennaja hazieta» apublikavała materyjał pa vynikach praviedzienaha napiaredadni sumiesnaha pasiadžeńnia kansultatyŭnaha savieta pry ministry abarony i kaardynacyjnaha savieta aficerskich schodaŭ Uzbrojenych sił. Na hetym mierapryjemstvie Žadobin padkreśliŭ, što
«ŚMI rastyražavali nasielnictvu niekarektnuju infarmacyju, jakaja datyčycca pytańnia pavyšeńnia hrašovaha zabieśpiačeńnia vajennasłužačych Uzbrojenych sił».«Mahło skłaścisia ŭražańnie, što na toj sustrečy havorka išła pra nieabchodnaść pošuku dla biełaruskich vajennasłužačych dadatkovych srodkaŭ ź biudžetu Rasii. Na samoj spravie padkreślivałasia: paśpiachovaje vajennaje supracoŭnictva pamiž našymi krainami moža stać adnym z arhumientaŭ u atrymańni prefierencyj u ekanamičnych pytańniach, naprykład, u dačynieńni da pošlin na naftu ci haz, jakija dazvolać papoŭnić biudžet krainy i dać mahčymaść pavialičyć hrašovaje ŭtrymańnie našych vajennasłužačych», — havorycca ŭ materyjale.
«Kiraŭnictvu krainy i Uzbrojenych sił dobra viadomy abstanoŭka i ekanamičnaje stanovišča vajennasłužačych, — adznačyŭ hienierał-lejtenant Juryj Žadobin. — Ja asabista dvojčy sustrakaŭsia pa hetych pytańniach z kiraŭnikom dziaržavy i premjer-ministram. Vajennasłužačyja pavinny viedać i dobra ŭjaŭlać, što dziaržava robić usio mahčymaje dla vyrašeńnia prablem aficerskaha składu i armii ŭ cełym. Nivodnaja naša prośba nie była pakinutaja biez uvahi». U pryvatnaści, užo zaviaršajecca ŭzhadnieńnie rašeńnia ab pavyšeńni kampiensacyi vajennasłužačym za arendu žylla. Padrychtavany prajekt ukaza prezidenta ab pradastaŭleńni prava ministru abarony vykarystoŭvać hrašovyja srodki, jakija vyzvalajucca ŭ vyniku realizacyi mierapryjemstvaŭ aptymizacyi arhanizacyjna-štatnaj struktury Uzbrojenych sił, dla materyjalnaha stymulavańnia vajennasłužačych.
