Siońnia polskaja prakuratura vystaviła abvinavačańnie hienerału Paŭłu Bialaŭnamu, namieśniku načalnika Biuro achovy ŭradu, u ramkach raśśledavańnia avijakatastrofy pad Smalenskam 10 krasavika 2010 hodu.
Hienerał Bialaŭny abvinavačvajecca ŭ nievykanańni słužbovych abaviazkaŭ padčas padrychtoŭki palotu prezydenckaha Tu-154M i dapuščeńni chłuślivaj infarmacyi ŭ aficyjnym dakumencie. Prakuratura nie paviedamlaje detalaŭ, infarmujučy tolki, što Bialaŭnaha abvinavačvajuć jašče ŭ adsutnaści naležnaha nahladu za dziejańniami pa zabieśpiačeńni palotu pieršych asobaŭ dziaržavy.
Bialaŭny, pavodle paviedamleńnia prakuratury, nie pryznaŭ svajoj viny i admoviŭsia davać tłumačeńni.
Učora Bialaŭny byŭ zvolnieny ministram unutranych spravaŭ sa svajoj pasady ŭ Biuro achovy ŭradu.
Bialaŭnamu pahražaje da troch hadoŭ pazbaŭleńnia svabody.
Raniej polskija prakurory vystavili abvinavačańnie dvum aficeram, što zajmali vysokija pasady ŭ pałku transpartnaj avijacyi, u funkcyi jakoha ŭvachodziła pieravozka pieršych asobaŭ dziaržavy.
10 krasavika 2010 hodu pry sprobie pryziamleńnia na vajskovym aeradromie pad Smalenskam raźbiŭsia polski ŭradavy samalot. Zahinuli 96 čałaviek, uklučna z prezydentam Polščy Lecham Kačynskim.