Siońnia, 26 lutaha, Jaŭhienu Vaśkoviču, asudžanamu na 7 hadoŭ za sprobu padpału Babrujskaha KDB, spaŭniajecca 22 hady. Dzień narodzinaŭ jon adznačaje ŭ Mahiloŭskaj turmie № 4, tak zvanaj «krytcy», u jakuju letaś jaho za niepadparadkavańnie pieraviali z Mahiloŭskaj kalonii №15.
Z nahody dnia narodzinaŭ źniavolenaha nam piša Anatol Sanacienka, hałoŭny redaktar internet-vydańnia «Babrujski kurjer», u jakim pracavaŭ Jaŭhien Vaśkovič da taho, jak ułady zakryli papiarovaje vydańnie hazety:
«Try hady tamu ja ŭziaŭ jaho na pracu ŭ «Babrujski kurjer» jak talenavitaha maładoha čałavieka, jaki piša i havoryć vyklučna pa-biełarusku, što źjaŭlajecca redkaściu dla Ŭschodniaj Biełarusi. I dva hady my ź im pracavali razam, pakul ułady, pad kiraŭnictvam «biełaruskaha hiestapa», nie zadušyli hazetu.
16 kastryčnika 2010 hodu Jaŭhien Vaśkovič z dvuma siabrami ździejśniŭ symbaličny akt napadu na babrujski adździeł KDB.U bok fasada palacieli dźvie butelki z zapalnaj sumieśsiu, čornaj sažaj pakryłasia častka ściany la ŭvachodu. Škoda (pabieł ściany) skłała 253 tysiačy rubloŭ, a termin «babrujskim anarchistam» — byŭ pryznačany ŭ 7 hadoŭ kalonii ŭzmocnienaha režymu. Hety prysud šakavaŭ mnohich. Ja ž, ruskamoŭny litaratar, pad upłyvam hetych padziej (u tym liku) staŭ pisać vieršy pa-biełarusku. I adzin ź ich pryśviaciŭ Jaŭhienu Vaśkoviču. Ja viedaju, jon budzie jamu blizkim — i pa movie, i pa temie, i pa duchu...
Anatol Sanacienka, hałoŭny redaktar "Bobrujskoho kuŕjera", litaratar».
***
Pryśviačajecca Jaŭhienu Vaśkoviču
Žyvie Biełaruś — heta klič našych prodkaŭ.
Žyvie Biełaruś — viakoŭ našych stohn.
Žyvie Biełaruś — heta mović sałodka.
Žyvie Biełaruś — tyranu praklon...
-
Kryvioju svajoj — da kropli apošniaj, —
Kab sercu Ajčyny biłosia valniej, —
O, Boh, usiemahutny, o, boža, o, boža, —
Kryvioju svajoj — što stali macniej —
-
Hatovy addana zaŭždy raźličycca,
Jak toj, chto paznaŭ luboŭ na ziamli:
Biaz serca Radzimy majemu nia bicca,
Biaz rodnaj staronki — žyćcio ŭ imhle...
-
Hazdava, Kaścieša i hierb naš Pahonia,
Źbirajcieś ŭsie razam pad ściaham adnym!
Hladzicie i słuchajcie: ziamla naša stohnie,
U hory žyvie, pad kniaziem čužym.
-
Kaściuška, Kastuś, pad vašy charuhvy
Ja stanu, jak toj staradaŭni žaŭnier.
Mieč praŭdy — u ruki, mieč voli — u ruki!
Što budzie, to budzie: tut i ciapier!
-
Hladzi svaim vokam: ad mora da mora,
Iduć, byccam chvali, našy pałki —
Praz ŭsio, što było, praz pakuty i hora —
Za Volaj, za Praŭdaj! Praz hody-viaki!
-
U myślach malusia, kryž nakładaju
Na dušu Radzimy, na dušu svaju:
Kab hora nia viedać miłamu kraju,
Kab mima biadu praniesła by ŭsiu.
-
Kab katy, tyrany nikoli, nikoli
Nia zdoleli trapić na ziemli tvaje...
Pad zorkaju praŭdy, pad zorkaju voli,
Žyvie Biełaruś! Nazaŭsiody — žyvie!
-
25 lutaha 2012 h.
Anatol Sanacienka