Vieści baraćbu na niabačnym froncie Iranu dapamahajuć biełaruskija raspracoŭki?

U ekśpiertnaj supolnaści, to razharajučysia, to zacichajučy, praciahvajecca dyskusija ab tym, jakim čynam u rukach iranskich vajskoŭcaŭ apynuŭsia najnoŭšy amierykanski bieśpiłotny lotny aparat (BPŁA) Lockheed Martin RQ-170 Sentinel. Šmat što kaža na karyść taho, što adbyłosia heta nie biez dapamohi apošnich raspracovak biełaruskaha VPK.

Nahadajem: 4 śniežnia minułaha hoda suśvietnyja ŚMI, spasyłajučysia na infarmacyju krynic u Tehieranie, paviedamili, što

srodki radyjoelektronnaj baraćby (REB) uzbrojenych siłaŭ Irana pasadzili hety zvyšsakretny BPŁA na ŭschodzie krainy.

Nieŭzabavie paśla hetaha vydańnie The Christian Science Monitor apublikavała intervju ź iranskim inžynieram, jaki nibyta braŭ niepasredny ŭdzieł u apieracyi pa pierachopie RQ-170. Surazmoŭca raskryŭ šerah techničnych padrabiaznaściaŭ hetaha pierachopu.

Pavodle jaho słovaŭ, z dapamohaj srodkaŭ REB irancy mahutnaj pieraškodaj razarvali kanał spadarožnikavaj suviazi pamiž RQ-170 i stancyjaj naziemnaha kiravańnia, jakaja znachodzicca ŭ ZŠA. U takoj situacyi prahramnaje zabiaśpiečańnie BPŁA pieravodzić aparat u režym aŭtapiłota, pry dapamozie jakoha robat i pavinien byŭ viarnucca na miesca — bazu VPS ZŠA ŭ Afhanistanie.

Skarystaŭšysia tym, što ŭ pracy aŭtapiłota vykarystoŭvajecca sistema GPS, iranskija vajennyja praz hetuju sistemu navihacyi zmahli padsunuć jamu iłžyvyja sihnały hłabalnaha pazicyjanavańnia (a mahčyma, i prosta zahłušyć sihnały). U vyniku kiravalnaja prahrama bieśpiłotnika paličyła, što jon užo prybyŭ da miesca bazavańnia, i zrabiła amal miakkuju pasadku terytoryi Irana.

Miž tym,

zhodna z aficyjnaj viersijaj amierykanskich uładaŭ, Sentinel byŭ stračany praz zboj u abstalavańni.

Apošni vielmi skieptyčna stavicca da infarmacyi, apublikavanaj irancami. Sutnaść piarečańniaŭ palahaje ŭ nastupnym: sistema GPS źjaŭlajecca dvuchuzroŭnievaj, adzin jaje ŭzrovień pryznačany dla ahulnaha karystańnia, i dadzienyja jaho nie šyfrujucca, a voś druhi ŭzrovień vykarystoŭvajecca vyklučna dla vajennaha prymianieńnia i tamu šyfrujecca z dapamohaj kryptaŭstojlivych ałharytmaŭ P(Y). Uzłom hetych ałharytmaŭ tearetyčna mahčymy, ale praktyčna małavierahodny, a biez hetaha padmianić kamandy GPS vajennaha ŭzroŭniu niemahčyma.

Prykładna hetaksama vyhladaje i chod razvažańniaŭ viadomaha rasijskaha ekśpierta Ihara Karotčanki, dyrektara Centra analizu suśvietnaha handlu zbrojaj. Toj ličyć najbolš vierahodnaj pryčynaj pryziamleńnia BPŁA RQ-170 u Iranie albo prahramny, albo aparatny zboj.

Adnak siarod śpiecyjalistaŭ isnuje i inšy punkt hledžańnia. Jaho prychilniki pakazvajuć na toje, što ŭzbrojenym siłam ZŠA ŭžo daŭno było viadoma pra słabyja miescy GPS-sistemy. Stvaryŭšy pieraškody na kanale suviazi, možna pieravieści lotnuju pryładu, jakaja vykarystoŭvaje GPS-navihacyju, u režym aŭtapiłota, i ŭ hety momant stračvajecca naziemny kantrol nad aparatam. Pieršy dakład, pryśviečany prablemie ŭraźlivaści GPS z papiaredžańniem ab niebiaśpiecy chakierskich napadaŭ dadzienaha typu, źjaviŭsia jašče ŭ 2003 hodzie.

Ciažka skazać napeŭna, ci sapraŭdy irancy zdoleli samastojna pravieści hetuju apieracyju, ale, jak adznačaje resurs cnews.ru, GPS-spufinh sapraŭdy mahčymy, što nieadnarazova demanstravali sami amierykancy. Dastatkova zahłušyć praŭdzivy sihnał GPS bolš mahutnym iłžyvym, i sistema navihacyi transpartnaha srodku źbivajecca z pantałyku.

Ale takim čynam možna lohka ŭździejničać na niezašyfravanyja hramadzianskija sistemy GPS. Vajennyja ž prymačy GPS vykarystoŭvajuć zašyfravany P(Y)-kod dla suviazi sa spadarožnikami. I vielmi małavierahodna, što irancy zdoleli ŭzłamać hety kod, a kali b im i ŭdałosia ździejśnić taki praryŭ u kryptaŭzłomie, to jany nikoli nie stali b vydavać vałodańnie takim kaštoŭnym dasiahnieńniem dziela adnaho bieśpiłotnika.

Adnak iranskim śpiecyjalistam, akazvajecca, nieabaviazkova było uzłomvać P(Y)-kod, kab pryziamlić robat.

Heta adrazu vyklikała b pierachod sistemy kiravańnia palotam RQ-170 u režym aŭtapiłota. Zvyčajna BPŁA adnačasova vykarystoŭvaje bolš nadziejny «vajenny» P(Y)-kod na častacie L2 i bolš prosty «hramadzianski» C/A-kod na častacie L1. U vypadku, kali aŭtapiłot pazbaŭlajecca dadzienych pa P(Y)-kanała, jon pierachodzić na C/A. U hety momant źjaŭlajecca mahčymaść padmianić bolš prosty «hramadzianski» sihnał iłžyvym i vyvieści bieśpiłotnik u patrebnaje miesca.

Kali irancy mohuć hienieravać vybaračnyja pieraškody na častotach L1 i L2, to jany mohuć vykarystoŭvać hetuju ŭraźlivaść aŭtapiłota i padmianiać sapraŭdnyja kaardynaty iłžyvymi. Uskosnym dokazam mahčymaści takoha scenaru mohuć słužyć adnosna nievialikija paškodžańni BPŁA RQ-170 — byccam jon samastojna zachodziŭ na pasadku.

Dadatkovuju intryhu ŭ hetuju palemiku ŭniesła vydańnie Flightglobal, jakoje vykazała zdahadku, što

irancy mahli vykarystoŭvać u apieracyi suprać RQ-170 atrymany imi nie tak daŭno z Rasii kompleks radyjotechničnaj raźviedki 1Ł222 «Aŭtabaza».

Miž tym, jak śćviardžajuć śpiecyjalisty ŭ halinie REB, sam kompleks 1Ł222 nie moža być vykarystany dla prymusovaj pasadki BPŁA. Jon pryznačany dla pasiŭnaj raźviedki impulsnych samalotnych RŁS i pieradačy nastupnaj infarmacyi: kutnich kaardynat mety, kłasa RŁS, numary častotnaha dyjapazonu pracy.

U toj ža čas «Aŭtabaza» — tolki častka mabilnaha aŭtamatyzavanaha kompleksu REB, raspracavanaha jašče ŭ časy SSSR. U jaho skład akramia stancyj radyjotechničnaj raźviedki i aŭtamatyzavanych punktaŭ kiravańnia ŭvachodziać taksama adnapramiennyja i šmatpramiennyja stancyi mahutnych šumavych pieraškod. Mienavita apošnija i błakujuć pracu bartavych radyjołakacyjnych stancyj lotnych aparataŭ usich typaŭ, uklučajučy BPŁA. U pryncypie, jany mohuć hłušyć lubyja pryjomnyja pryłady.

Siońnia šmatlikija važnyja srodki REB, takija, naprykład, jak naziemnyja stancyi mahutnych šumavych pieraškod i aparatura błakavańnia GPS, vyrablajucca i prapanujucca na suśvietnym rynku pradpryjemstvami vajenna-pramysłovaha kompleksu Respubliki Biełaruś.

U pryvatnaści, aparatura, pra jakuju išła havorka vyšej, raspracoŭvajecca i vyrablajecca AAT «KB Radar».

Pavodle infarmacyi, raźmieščanaj na sajcie «KB Radar», jaho śpiecyjalizacyjaj, u pryvatnaści, źjaŭlajecca raspracoŭka i vytvorčaść kompleksaŭ «pieraškod karystalnikam hłabalnych spadarožnikavych navihacyjnych sistem, jakija vyklučajuć vykanańnie imi svaich navihacyjnych zadač (naprykład, zryŭ naviadzieńnia vysokadakładnych kryłatych rakiet na mety)».

Adnym z takich kompleksaŭ źjaŭlajecca «Optyma-3» — kompleks radyjopieraškod prymača sistemy hłabalnaj radyjonavihacyi GPS. Jon pryznačany dla taho, kab parušać u zadadzienaj zonie radyjonavihacyi spažyŭcoŭ sistemy GPS (avijacyjnych srodkaŭ, vysokadakładnaj zbroi, sistem kiravańnia zbrojaj i da t.p.).

U skład «Optyma-3» uvachodzić 9 kamplektaŭ pieradatčykaŭ pieraškod i aŭtamatyzavanaja sistema kiravańnia imi. Małyja habaryty i nievialikaja vaha pieradatčykaŭ pieraškod zabiaśpiečvajuć ich apieratyŭnaje raźmiaščeńnie i źmienu pazicyj na abranych vyšynnych abjektach (vyškach mabilnaj suviazi, radyjosuviazi, televizijnych retranślataraŭ, vyšynnych budynkach i śpiecyjalnych mačtach).

Na aždiehłaści da 100 km takimi pieradatčykami stvarajecca sucelnaje pole, što abciažarvaje vyjaŭleńnie i parazu asobnych pieradatčykaŭ, pryčym košt pieradatčykaŭ značna nižejšy za košt srodkaŭ ich parazy.

Akramia stacyjanarnych hienierataraŭ pieraškod, «KB Radar» raspracoŭvaje mabilnyja pieradatčyki pieraškod typu «Tuman» i «Tuman-2» dla raźmiaščeńnia na BPŁA i viertalotach. Takija pieradatčyki pryznačanyja dla farmavańnia i vypramieńvańnia pieraškod, jakija dušać pracu navihacyjnych prymačoŭ sistem GPS i HŁONASS («Tuman»), mabilnych aparataŭ karystalnikaŭ kaśmičnaj radyjosuviazi sistem Inmarsat, Iridium («Tuman-2»).

Pieradatčyk «Tuman» vykarystoŭvajecca dla hienieracyi i vypramieńvańnia pieraškod aptymalnaj struktury na dźviuch častotach sistemy GPS (L1 i L2) abo (i) u dvuch dyjapazonach častot sistem HŁONASS (L1 i L2), pieradatčyk «Tuman-2» — u dyjapazonach častot sistem Inmarsat, Iridium. Pieradatčyki abodvuch typaŭ mohuć być raźmieščanyja na BPŁA i viertalotach roznych typaŭ. Radyus zony padaŭleńnia — 100 km.

Pra toje, jakim moža być značeńnie hetych sistem dla viadzieńnia sučasnych vajskovych dziejańniaŭ, kažuć vykazvańni byłoha pasła ZŠA ŭ AAN Džona Bołtana, apublikavanyja nie tak daŭno šmatlikimi drukavanymi i elektronnymi ŚMI. Pavodle jaho słovaŭ,

kali b rasijcy (pra Biełaruś Bołtan, peŭna, viedaje mała) dali Iranu sučasnaje abstalavańnie pastanoŭki pieraškod, to heta b aznačała, što dla ZŠA vielmi mnohaje ŭ vajennaj halinie «znachodzicca ŭ niebiaśpiecy».

Kanhres, na dumku Bołtana, pavinien być vielmi zaniepakojeny tym, što Iran, mahčyma, maje ŭ svaim rasparadžeńni technałohii pastanoŭki pieraškod, jakija mohuć źbivać rakiety, samaloty, kamunikacyi i sistemy naviadzieńnia «dla cełaha šerahu našych sistem uzbrajeńnia».

• 0
• 0
• 0
• 0
• 0