Irkuckich biełarusaŭ abvinavacili ŭ ekstremiźmie

Rasijskija pravaachoŭnyja orhany ŭ Irkucku raspačali suprać 26-hadovaha biełarusa Alaksieja Kuchty spravu ab ekstremiźmie. Jamu vystavili abvinavačańnie pavodle artykułu «Uzbudžeńnie nianaviści albo varožaści, a taksama źniavaha čałaviečaj hodnaści». Kuchta — aktyvist maładziovaha klubu «Kryvičy», jaki dziejničaje pry Irkuckim tavarystvie biełaruskaj kultury imia Jana Čerskaha.

Pavodle infarmacyi rasijskich pravaachoŭnych orhanaŭ, jon vykładvaŭ «ekstremisckija fatahrafii i videa» na svajoj staroncy ŭ sacyjalnaj sietcy.

Padčas pieratrusu ŭ jaho kvatery byli znojdzienyja «našyŭki z nacysckaj simvolikaj i litaratura ekstremisckaha źmiestu».

U suviazi z spravaj ab «biełaruskim ekstremiźmie» siońnia — užo druhi raz na praciahu tydnia — byŭ praviedzieny pieratrus u ofisie Irkuckaha tavarystva biełaruskaj kultury imia Jana Čerskaha

U kvatery Rudakova byli kanfiskavanyja asabistyja kampjutary jaho i jaho pryjomnaj dački.

Staršy pamočnik kiraŭnika Śledčaha ŭpraŭleńnia Śledčaha kamiteta pa Irkuckaj vobłaści Uładzimir Sałavaraŭ paviedamiŭ, što

padčas pieratrusu ŭ tavarystvie «byli kanfiskavanyja materyjały ekstremisckaha źmiestu, vyjavy lidaraŭ biełaruskich nacyjanalistaŭ, jakija vajavali na baku Niamieččyny suprać savieckich vojskaŭ».

Aleh Rudakoŭ patłumačyŭ, što ź biełaruskich materyjałaŭ byli kanfiskavanyja kalandaryki z vyjavami zasnavalnikaŭ BNR i niezaležnickich dziejačoŭ, u tym liku Vasila Bykava.

Pavodle Sałavarava, Alaksiej Kuchta ciapier znachodzicca pad padpiskaj ab niavyjeździe. Jaho staronka ŭ sacyjalnaj sietcy «Vkontaktie» zabłakavanaja za parušeńni praviłaŭ sajtu. Zabłakavany taksama błoh «Kryvičoŭ» u Žyvym Žurnale.

Kamientujučy situacyju Aleh Rudakoŭ zaznačyŭ: «Naša Irkuckaje tavarystva biełaruskaj kultury i maładziovy klub „Kryvičy“ viaduć kulturna-aśvietnickuju pracu. My nie zajmajemsia palitykaj, tym bolš ekstremizmam. U nas tolki navukovaja, aśvietnickaja, hramadskaja dziejnaść. U nas jość falkłornyja hurty, siekcyi pa ramiostvach, siekcyi bytavoha tancu i h. d. Toje, što siarod nas znajšoŭsia chłopiec, jaki tam štości raźmiaściŭ na svaich staronkach — heta jahonaja inicyjatyva i asabistaja sprava. Ale śledčamu kamitetu adnaho čałavieka mała — im patrebnaja cełaja arhanizacyja, kab razdźmuć z muchi słana i zarabić niejki kapitał».

Pakul ciažka skazać, ci sprava ŭ adnym čałavieku, ci heta sproba razdušyć nacyjanalnuju supołku. Biełarusy Irkucka — adna z samych mocnych supołak biełarusaŭ Rasii. U jaje ŭvachodziać naščadki pierasialencaŭ ź Biełarusi roznych chvalaŭ emihracyi. Supołka trymałasia na zapale jaje lidara, Aleha Rudakova. Irkuckija biełarusy trymalisia biełaruskaj nacyjanalnaj simvoliki.

• 0
• 0
• 0
• 0
• 0
• 0
• 0
• 0