Ź jakich reziervaŭ uziać €200 na adpačynak?

U suviazi ź letašniaj devalvacyjaj ceny na adpačynak za miažoj u biełaruskich rublach «uźlacieli» ŭ niekalki razoŭ. I ciapier nie kožny biełarus hatovy jechać letam na mora. Žurnalist «NN» znajšoŭ reziervy dla adpačynku, pra jakija my časta nie zadumvajemsia.

Ź siamjoj vyrašyli sioleta źjeździć na mora ŭ Čarnahoryju — u Budvu. Śviet nie blizki. Adkładać hrošy pačali ź minułaha hoda.

Rezierv 1. Abrali aŭtobusny tur: chaj daroha i stamlaje, ale daje mahčymaść naviedać z ekskursijami Vienu, Budapiešt, a prajezdam jašče pabyvać u Polščy, Čechii, Sierbii, Słavakii. Vyjezd 11 vieraśnia, viartańnie — 26 vieraśnia. Adpačynak na mory składaje 10 dzion.

Cana aŭtobusnaha tura na adnaho čałavieka — 340 jeŭra. Siudy ŭklučany prajezd, tranzitnyja načoŭki sa śniadankami, ahladnyja ekskursii, pražyvańnie na kurorcie (trochzorkavyja apartamienty), kurotny zbor. Dadatkova apłočvajucca tranzitnaja viza (60 jeŭra), miedycynskaja strachoŭka (6 jeŭra), turpasłuha (150 tysiač). U vyniku na dvaich atrymlivajecca 812 jeŭra i 300 tysiač rubloŭ.

Ale turfirmy prapanujuć źnižku ŭ 10 pracentaŭ pry zamovie tura da 30 krasavika.

Heta atrymlivajecca, što adpačynak nam abydziecca ŭ 744 jeŭra i 300 tysiač (ekanomija — 68 jeŭra).

Časta praz toje, što pra adpačynak pačynajem dumać za dva miesiacy da jaho, stračvajem na źnižkach.

Rezierv 2. Jość jašče adzin rezierv, pra jaki my redka zhadvajem. Naš adpačynak doŭžycca paŭmiesiaca. Kvatera ŭvieś hety čas budzie pustavać. A značycca, ni vadu, ni elektryčnaść spažyvać nie budziem (možna navat adklučyć chaładzilnik). My padličyli, kolki naša siamja z dvuch čałaviek vydatkovaŭvaje hrošaj na kamunalnyja pasłuhi, ježu. Atrymałasia, što za 16 dzion my spažyli chałodnaj vady — 2 m3, haračaj — 3 m3, elektryčnaści — 70 Vt.

Pa taryfach našaj kvatery zapłacili za elektryčnaść (chaładzilnik, pralnaja mašyna, mikrachvaloŭka, noŭtbuk, televizar) 16670 rubloŭ, za vadu — 7200, za kanalizacyju — 5520, za padahreŭ vady — 10990. Ahułam 40380 rubloŭ, albo 4 jeŭra.

Na ježu my vydatkavali 700 tysiač rubloŭ, na transpart (prajaznyja na mietro, elektryčku, maršrutku) — 195000, na mabilnuju suviaź — 60000, inšaje — 275 tysiač. Ahułam 1,23 miljona rubloŭ albo 114 jeŭra.

U vyniku 186 jeŭra — suma z reziervovych. Hrošy nie maleńkija, choć ich, zrazumieła, i nie chopić na ŭsie vydatki ŭ adpačynku.

• 0
• 0
• 0
• 0
• 0
• 0
• 0
• 0