Avaryja z udziełam Kazimira Rachatki zdaryłasia ŭ niadzielu 15 krasavika. Pryblizna a 17-j hadzinie na 184-m kiłamietry darohi Minsk—Hrodna ŭłabavuju sutyknulisia Toyota Land Cruiser i Opel Astra.
Pavodle aficyjnaj infarmacyi DAI Hrodzienskaj vobłaści 59-hadovy kiroŭca «ź nieviadomaj pakul pryčyny vyjechaŭ na pałasu sustrečnaha ruchu».
Mahčyma, miarkujuć u milicyi, kiroŭcu ŭsiedarožnika mahło padvieści zdaroŭje. Jon niadaŭna vypisaŭsia z balnicy i ŭ jaho mahli ŭźniknuć prablemy z sercam.
Vyjezd «Tajoty» na sustrečku mieŭ katastrafičnyja nastupstvy dla kiroŭcy «Opiela» i jaho pasažyraŭ. Adzin ź ich, 53-hadovy cieść kiroŭcy, pamior ad traŭmaŭ u reanimacyi; 32-hadovy kiroŭca (pavodle niepravieranaj infarmacyi — milicyjant), jaho žonka, 8-hadovaja dačka, ciešča i siastra žonki atrymali ciažkija traŭmy.
Kiroŭca «Tajoty» atrymaŭ čerapna-mazhavuju traŭmu i šmatlikija ŭdary. Jahonyja dziejańni kvalifikujucca jak «parušeńnie praviłaŭ darožnaha ruchu abo ekspłuatacyi transpartnych srodkaŭ, što paciahnuła pa nieaściarožnaści śmierć čałavieka abo pryčynieńnie ciažkaha cialesnaha paškodžańnia».
U vypadku kali budzie raspačataja kryminalnaja sprava i kiroŭcu pryznajuć vinavatym, jamu pahražaje pakarańnie da piaci hadoŭ źniavoleńnia.
U aficyjnych kamientarach milicyja nie nazvała imia kiroŭcy «Tajoty», a tolki jahony ŭzrost. Mahčyma heta i stała adnoj z pryčynaŭ źjaŭleńnia čutak vakoł trahiedyi.Jak tolki fota i videa ź miesca trahiedyi trapili ŭ internet, na forumach zahavaryli, što kiroŭcam Toyota Land Cruiser byŭ staršynia Lidskaha rajonnaha sielskahaspadarčaha ŭnitarnaha pradpryjemstva «Mažejkava» Kazimir Rachatka. Hetyja źviestki padmacoŭvalisia infarmacyjaj ad pacyjentaŭ ź lidskaj balnicy, kudy jon nibyta trapiŭ.
Niekatoryja śviedki avaryi i prostyja ŭdzielniki forumaŭ taksama źviartali ŭvahu na toje, što numarny znak «Tajoty» tajamniča źnik paśla pryjezdu na miesca DTZ milicyjantaŭ. Maŭlaŭ, takoje zdarajecca ŭ vypadku z VIP-avaryjami.Mnohija ŭkazvali na dobryja adnosiny Rachatki z Łukašenkam, jaki ŭ 2005-m hodzie asabista pryniaŭ kiraŭnika haspadarki, jakaja ŭ tym hodzie pieramahła na «Dažynkach».
«Pastupiŭ z traŭmami biez pahrozy dla žyćcia»
U reanimacyjnym adździaleńni Lidskaj centralnaj rajonnaj balnicy karespandentu «Našaj Nivy» paćvierdzili infarmacyju pra špitalizacyju staršyni «Mažejkava». Tam raskazali, što Kazimir Rachatka pastupiŭ da ich paśla avaryi z traŭmami, jakija nie nieśli pahrozy dla žyćcia. U reanimacyi paciarpieły pravioŭ 15 hadzin i paśla stabilizacyi stanu byŭ pieraviedzieny ŭ chirurhičny adździeł.
U reanimacyi padkreślili, što Rachatka pastupiŭ da ich z traŭmami, atrymanymi ŭ vyniku avaryi. Na momant špitalizacyi prablem z sercam u jaho nie vyjavili.
* * *
U 2010 hodzie «Mažejkava» fihuravała ŭ inšaj aŭtamabilnaj historyi. U liku inšych 39 haspadarak Hrodzienščyny jana trapiła ŭ pole zroku prakuratury. U 2008-m ŁRSUP «Mažejkava», jakoje na toj momant mieła kala 3 miljardaŭ rubloŭ zapazyčanaściaŭ, nabyła aŭtamabili «Piežo-Partnior» 2008 h.v. koštam Br35,6 młn. i «Folksvahien» 2007 h.v. za Br31,8 młn (kurs dalara tady byŭ 2100).
Rachatka Kazimir Uładzisłavavič — nar. 15 vieraśnia 1952 h. Dyrektar ŁRSUP «Mažejkava». Zasłužany rabotnik sielskaj haspadarki Biełarusi, kandydat ekanamičnych navuk. Člen pastajannaj kamisii savieta respubliki pa mižnarodnych spravach i nacyjanalnaj biaśpiecy (2000—2004), člen pastajannaj kamisii SR pa ekanomicy, biudžecie i finansach (2004—2008).
ŁRSUP «Mažejkava» — adno z najbujniejšych sielkahaspadarčych pradpryjemstvaŭ Hrodzienščyny. Akramia raślinavodstva i žyviołahadoŭli zajmajecca vytvorčaściu likiora-harełačnaj pradukcyi, maje ŭ vałodańni lasnuju palaŭničuju haspadarku.
