Pieršymi viernucca pasły Polščy i ES?

Kiraŭnik pradstaŭnictva Jeŭrapiejskaha sajuza Majra Mora i pasoł Polščy Lešak Šarepka pieršymi viernucca ŭ Minsk u pačatku nastupnaha tydnia, paviedamlaje brusielski sajt EUobserver sa spasyłkaj na vysokapastaŭlenuju krynicu ŭ ES. Pasły astatnich krain Jeŭrasajuza viernucca ŭ Biełaruś paźniej, adznačaje vydańnie.

***

Dypłamatyčny kanflikt razhareŭsia paśla lutaŭskaha rašeńnia ES ab pašyreńni sankcyj u dačynieńni da Biełarusi. 28 lutaha biełaruskija ŭłady rekamiendavali kiraŭniku pradstaŭnictva Jeŭrasajuza Majry Mory i pasłu Polščy Lešaku Šarepku «vyjechać u svaje stalicy dla kansultacyj, kab davieści svajmu kiraŭnictvu ćviorduju pazicyju biełaruskaha boku ab nieprymalnaści nacisku i sankcyj». Adnačasova Minsk adklikaŭ dla kansultacyj pastajannaha pradstaŭnika Biełarusi pry Jeŭrasajuzie Andreja Jeŭdačenku i pasła Biełarusi ŭ Polščy Viktara Hajsionka. U adkaz u kancy lutaha — pačatku sakavika krainy ES adklikali svaich pasłoŭ ź Minska.

18 krasavika ministr zamiežnych spraŭ Słavakii Mirasłaŭ Łajčak zajaviŭ, što pryjšoŭ čas pasłam ES viarnucca ŭ Biełaruś.

«Pryjšoŭ čas viartacca pasłam, bo nam treba, kab pasły vykonvali svaju pracu, — zajaviŭ Łajčak. — Jany nie pavinny być častkaj palityčnaj sprečki pamiž Jeŭrasajuzam i Biełaruśsiu».

«Da taho ž Jeŭrasajuz byŭ dastatkova vielikadušny: pasły ES vyjechali ź Biełarusi, ale my pakinuli biełaruskich pasłoŭ u svaich krainach, zhadziŭšysia z dysbałansam na karyść Biełarusi. Hetym my chacieli prademanstravać, što nie zacikaŭleny ŭ eskałacyi situacyi», — adznačyŭ kiraŭnik MZS Słavakii.

30 sakavika JeUobserver paviedamiŭ, što pasły ES usie razam viernucca ŭ Biełaruś nieŭzabavie paśla katalickaha Vialikadnia, «kali Alaksandr Łukašenka za hety čas nie zrobić niejkich rezkich krokaŭ».

Adnak 5 krasavika Łukašenka zajaviŭ, što pytańnie ab viartańni dypłamataŭ budzie razhladacca ŭ piersanalnym paradku. «Heta byli ich vola. Jany pajechali, zrabiŭšy dypłamatyčny, palityčny krok, jaki ŭ toj čas nanosiŭ uron našamu źniešniepalityčnamu viedamstvu jak minimum i našaj dziaržavie jak maksimum. <…> Kali jany siabie tak pavodziać, my ź ministram zamiežnych spraŭ damovilisia, što kožnuju krainu i kožnaha pasła budziem piersanalna razhladać u płanie viartańnia ŭ Biełaruś. Ale heta nie maje ničoha ahulnaha z tym, što my chočam pieraškadžać viartańniu pasłoŭ», — padkreśliŭ jon.

17 krasavika ŭ intervju dziaržaŭnym ŚMI kiraŭnik Administracyi prezidenta Uładzimir Makiej nazvaŭ «poŭnym absurdam» mierkavańnie, što, vypuściŭšy eks-kandydata ŭ prezidenty Andreja Sańnikava i člena jaho kamandy Dźmitryja Bandarenku, biełaruskija ŭłady stvarajuć umovy dla viartańnia pasłoŭ Jeŭrasajuza ŭ Minsk. «Heta dźvie vialikija roźnicy, — zajaviŭ čynoŭnik. — Pytańnie vyzvaleńnia źniavolenych za kankretnyja złačynstvy lažyć vyklučna ŭ śfiery kampietencyi kiraŭnika dziaržavy. Prezident u svoj čas jasna zajaviŭ: raskajucca ludzi, napišuć adpaviednyja prašeńni ab pamiłavańni — jany buduć razhledžany va ŭstanoŭlenym zakonam paradku. Što i adbyłosia. I prezident vyrazna pakazaŭ svaju paśladoŭnaść. A voś pytańnie viartańnie pasłoŭ — heta ŭžo ź inšaj opiery. Jeŭrasajuz u svoj čas sam adklikaŭ svaich pasłoŭ, i siońnia realnaść takaja, što nie my prosim, a Jeŭrasajuz prosić nas dazvolić pasłam viarnucca ŭ Biełaruś. I nie tolki prosić, a patrabuje i navat pahražaje novymi sankcyjami».

Jeŭrakamisar pa pytańniach pašyreńnia Štefan Fiule ŭ intervju pradstaŭniku Fondu Maršała ŭ Bracisłavie zajaviŭ, što vyzvaleńnie Sańnikava i Bandarenki «stvaraje bolš spryjalnyja ŭmovy» dla viartańnia jeŭrapiejskich pasłoŭ u Minsk. «My chacieli b, kab jany viarnulisia nazad najbližejšym časam», — skazaŭ jeŭrakamisar.

• 0
• 0
• 0
• 0
• 0
• 0
• 0
• 0