Dziaŭčynu Viačasłava Dyjanava (Marharytu Łavyšyk) źniali ź ciahnika na polskaj miažy
U jaje kanfiskavali noŭtbuk.
Marharytu Łavyšyk, dziaŭčynu adnaho z kaardynataraŭ kampanii «Revalucyja praz sacyjalnuju sietku» (RPSS) Viačasłava Dyjanava, u noč na 20 krasavika źniali ź ciahnika na pamiežnym pierachodzie «Brest — Ciarespal».
Padčas asabistaha nadhladu ŭ Łavyšyk kanfiskavali ŭsie nośbity infarmacyi, noŭtbuk. Paśla čaho jaje adpuścili, i na najbližejšym ciahniku dziaŭčyna dajechała da polskaha pamiežnaha pierachoda ŭ Ciarespali, dzie jaje čakaŭ Dzijanaŭ.
Na hety momant jany znachodziacca ŭ Varšavie.
Nahadajem, 18 krasavika ŭ kvateru ŭ Minsku, dzie žyvuć Łavyšyk i jaje siabroŭka Kryścina Kumiejka, uvarvalisia piaciora nieviadomych. Łavyšyk, jakaja ŭ hety čas razmaŭlała pa skajpie z Dyjanavym, schapili i vyciahnuli z kvatery. Uvieś dzień nivodnaje siłavoje viedamstva nie pryznavałasia ŭ tym, što jany była zatrymana. Viadoma, što kampjutar Łavyšyk pilna pravieryli. Była vyniata ŭsia pierapiska asabistaha charaktaru.
Dyjanaŭ zajaviŭ, što jaho dziaŭčyna nie ŭdzielničała ŭ kampanii RPSS, a taksama nie zajmałasia inšaj palityčnaj dziejnaściu. Pavodle jaho słoŭ, 18 krasavika Łavyšyk pavinna była vyjechać da jaho ŭ Polšču. Kaardynatar RPSS ličyć, što zatrymańnie i sud — heta pomsta śpiecsłužbaŭ «praz rodnych i kachanych ludziej tym, da kaho jany sami nie mohuć daciahnucca».
19 krasavika Łavyšyk i Kumiejka sudom Maskoŭskaha rajona Minska byli aštrafavany na paŭtara miljona rubloŭ kožnaja za drobnaje chulihanstva (art. 17.1 Kodeksa ab administracyjnych pravaparušeńniach).
Kamientary