Usio asensoŭvajecca praz paraŭnańnie.
Voś zaraz u źviazku z tajamničaj padrychtoŭkaj zakonu ab infarmacyi zhadvajecca, jak u 2001 — 2002 hadach niekalki razoŭ sprabavali praciahnuć praz parlament prajekt zakonu ab infarmacyjnaj biaśpiecy. Toj byŭ ŭvohule — prosta finiš.
Dyk voś, tady prahresiŭnaja hramadzkaść:) — i ŭ nas, i za miažoj — uźniała taki hvałt, što ŭ rešcie reštaŭ prajekt, źviazany najpierš ź imiem Čarhinca, zavaliła... Pałata.
Vo jaki byŭ razhuł demakratyi ŭsiaho piać hadoŭ tamu!
Jašče bolej. Niejkija reštki pluralizmu zachoŭvalisia ŭ dziaržaŭnych medyjach. Mnie samomu daviałosia ŭdzielničać u dyskusii ab hetym zakonaprajekcie na BT.
Paśla zapisu kašula była choć vykručvaj. Nie ad śpioki jupitaraŭ, a tamu, što vaš pakorlivy słuha akazaŭsia adzinym dapuščanym u studyju pradstaŭnikom niezaležnych medyjaŭ. Astatnija ŭdzielniki prezentavali ŭładny bok. Nakinulisia tak, što až pierje palacieła. Tolki i paśpiavaŭ ahryzacca.
Zrešty, niama licha biez dabra. Jak ni dziŭna, maje repliki pajšli ŭ eter praktyčna biez kupiuraŭ. Parazvažaŭšy, pryjšoŭ da vysnovy, što pry mantažy pieradačy inšaha vyjścia nie było. Bo inačaj vyhladała b, što adepty žaleznaj infarmacyjnaj zasłony palemizujuć z pustatoj.
Zrešty, ułady i biez taho zakonu ŭ značnaj stupieni damahlisia svajoj mety — zahłušyć "destruktyŭnyja" infarmacyjnyja krynicy. Va ŭsiakim razie, hruntoŭna začyščany absiah tradycyjnych drukavanych medyjaŭ.
Tady, na pačatku stahodźzia (vo jak bylinna hučyć!), na finišy ranišniaj prabiežki ja kuplaŭ u šapiku biaremia niezaležnych peryjodykaŭ — ad "Narodnaj voli" da "BDH". Zaraz — vyklučna kvitki na tramvaj:)
Tolki ciaham 2001 — 2003 hadoŭ pierastali drukavacca kala dvuch dziasiatkaŭ niedziaržaŭnych hramadzska-palityčnych vydańniaŭ. A praces ža na hetym nie spyniŭsia.
Adno što dychaje Sieciva. U virtuał syšli i taja ž "BDH", i "Salidarnaść". Plus źjavilisia admysłovyja anłajnavyja prajekty. Dyj radyjo "Svaboda" siońnia maje znajomyja nia stolki łoviać pryjmačom (niaŭdziačny zaniatak, ščyra kažučy!), kolki čytajuć (i navat słuchajuć, kali trafiku nie škada:) praz sajt.
Tak, navat ŭ aŭtarytarnaj Biełarusi pry žadańni možna rehularna spažyvać niezaležnuju infarmacyju ŭ dastatkovych dozach praz eter ci — jašče zručniej — praź Sieciva.
Pytańnie ŭ tym, chto jaje šukaje.
Bo kali ŭ šapiku kramolnyja peryjodyki mazolili voka abyvatala, to zaraz treba viedać miescy, dzie možna pažyvicca alternatyŭnym praduktam.
To bok jon stanovicca zdabyčaj padrychtavanych i nastojlivych.
Voś tut — cikavaje letašniaje daśledavańnie NISEPD.
Ź jaho vynikaje, naprykład, što samaj prahresiŭnaj — kali brać kryteram prademakratyčnyja i praeŭrapiejskija kaštoŭnaści — jość aŭdytoryja internetu, a najbolej kanservatyŭnaj — biełaruskaha dziaržaŭnaha radyjo.
Ale ž padkreślu jašče raz: nia stolki Sieciva pieratvaraje retrahradaŭ u adeptaŭ demakratyi i eŭrapiejskaści, kolki publika z užo sfarmavanaj systemaj kaštoŭnaściaŭ znachodzić sabie nišu svabody ŭ Siecivie. I naadvarot: tak zvany "ćviordy elektarat" zadavalniajecca prapahandova-zabaŭlalnym mieniu, bo stravy ŭ im składajucca sa zvykłych idejnych dy kaštoŭnasnych inhredyjentaŭ.
Heta — da pytańnia ab iluzijach, što, naprykład, niezaležny spadarožnikavy kanał zrobić tut niejkuju revalucyju.
Uvohule, kali medyi traktujucca jak srodak revalucyjnaj baraćby (a tut niekatoryja našyja demakraty myślać adzin u adzin jak Uljanaŭ-Lenin) — karyści nie čakaj.
Telekanał taki, kaniešnie ž, zusim nie zaškodzić. Bo Sieciva pry vialikim žadańni mohuć kali i nie zahłušyć całkam, to dobra prydušyć — mienavita kramolny sehment. A spadarožnik nie sabješ. Dyj usie talerki-anteny pavykarčoŭvać prablematyčna.
Ja pra inšaje: pra naiŭnaść mierkavańnia, što možna "pieramahčy ŭ hałovach" za košt naroščvańnia vału infarmacyi pad hryfam "suprać režymu".
Bo kožny čuje toje, što choča čuć, i bačyć najpierš toje, što choča bačyć.
Jość hurmany, što kožny dzień smakujuć niepadcenzurnaje słova. Jak zamorski płod kivi.
I jość masa tych, kamu dastatkova praduktu ajčynnaj dziaržaŭnaj televizii. Jak sała z bulbaj. A kivi... na čorta jano, lepiej — plašku!
Pryčym samaje sumnaje, što pry ŭbohim charčavańni jany nie adčuvajuć medyjnaha avitaminozu.
Inšym razam uražańnie takoje, što paralelna ŭ roznych vymiareńniach, kali chočacie — navat u roznych epochach, isnujuć dźvie Biełarusi. Całkam suverennyja :)
Navat hierby sa ściahami ŭ ich roznyja.
