U 2013 hodzie ŭ Biełarusi moža być razhledžana pytańnie ab denaminacyi biełaruskaha rubla, paviedamiła kiraŭnik Nacyjanalnaha banka Nadzieja Jermakova na sustrečy z pracoŭnym kalektyvam Słuckaha zavoda emalposudu.
Jak pieradaje internet-resurs Infa-kurjer, Jermakova raskazała pra situacyju ŭ finansavaj śfiery dziaržavy, pra palityku ŭ halinie vydzialeńnia kredytaŭ na budaŭnictva žylla, pra kredyty dla apłaty za navučańnie studentaŭ, pra situacyju z płaciažami za miažoj biełaruskimi płastykavymi kartkami.
Staršynia praŭleńnia Nacbanka adkazała na pytańni pracoŭnych zavoda.
Jana patłumačyła, što pytańnie pra ŭviadzieńni na terytoryi Biełarusi rasijskaha rubla nie razhladajecca, adznačyła, što sama nie prychilnik takoha rašeńnia i vystupaje za zachavańnie suvierenitetu. Z nahody mahčymaj denaminacyi biełaruskaha rubla Jermakova skazała, što, chutčej za ŭsio, tolki ŭ 2013 hodzie ŭmovy mohuć spryjać tamu, kab zaniacca razhladam hetaha pytańnia.
Nahadajem, 14 sakavika ŭ chodzie pramoj linii ŭ haziecie «Respublika» Nadzieja Jermakova taksama vykazvałasia adnosna mahčymaści praviadzieńnia denaminacyi. U pryvatnaści, kiraŭnik Nacbanka vykazała mierkavańnie, što pierš čym pravodzić u Biełarusi denaminacyju, treba całkam adnavić ekanomiku.
***
Apošni raz denaminacyja biełaruskaha rubla - u suadnosinach 1:1.000 - pravodziłasia ŭ Biełarusi 1 studzienia 2000 hoda. Tady Nacyjanalny bank uvioŭ u abaračeńnie banknoty vartaściu 1, 5, 10, 20, 50, 100, 500, 1.000 i 5.000 rubloŭ, a paźniej - 10.000, 20.000, 50.000 i 100.000 rubloŭ.
Na praciahu 2000 hoda ažyćciaŭlałasia paralelnaje chadžeńnie kupiur staroha i novaha ŭzoru. 30 śniežnia 2003 hoda termin abmienu starych hrošaj minuŭ.
12 sakavika 2012 hoda Nacbank uvioŭ u abaračeńnie novuju samuju bujnuju kupiuru naminałam 200 tysiač biełaruskich rubloŭ, što składaje kala 25 dalaraŭ ZŠA pa biahučym kursie.
