Da aktyvista kampanii «Ježa zamiest bombaŭ», zatrymanaha padčas akcyi pa razdačy ježy kala stancyi mietro «Uschod» u Miensku 15 studzienia, supracoŭniki KDB pryjšli pa miescy vučoby (Biełaruski nacyjanalny techničny univiersitet – BNTU) i prapanoŭvali supracoŭnictva. Imia aktyvista my nie padajem u intaresach jahonaj biaśpieki.
Razmova z supracoŭnikami KDB adbyvałasia ŭ dekanacie ŭniviersiteta 13 lutaha. Papiarednie namieśnik dekana fakultetu BNTU, na piatym kursie jakoha navučajecca aktyvist, patelefanavaŭ jamu i paprasiŭ pryjści ŭ dekanat, kab napisać tłumačalnuju z toj nahody, što jaho zatrymlivała milicyja. Namieśnik dekana skazaŭ studentu, što heta – «prostaja farmalnaść».
Kali aktyvist pryjšoŭ u dekanat, tam byli 2 nieviadomyja čałavieki ŭ cyvilnym. Namieśnik dekana pakinuŭ studenta razam ź imi pisać tłumačalnuju. Asoby ŭ cyvilnym pačali zadavać chłopcu pytańni, datyčnyja jahonaj hramadzianskaj aktyŭnaści. Pradstavicca jany admovilisia, tolki dali zrazumieć, što pracujuć u Kamitecie dziaržaŭnaj biaśpieki.
Padčas razmovy 5-kurśniku BNTU pahražali prablemami z vojskam dy raźmierkavańniem.
Admoviŭšysia hutaryć ź nieviadomymi asobami, małady čałaviek nakiravaŭsia da dźviarej kabinietu, ale jany apynulisia začynienyja. Paśla šerahu pytańniaŭ, na jakija aktyvist admoviŭsia davać adkazy, dźviery zvonku adčyniŭ namieśnik dekana i adpuściŭ jaho.
Paŭtorna cikavaść da aktyvista ŭźnikła paśla zatrymańnia padčas kancertu «Ježa zamiest bombaŭ» 24 sakavika ŭ kłubie «Jo-majo»,što znachodzicca ŭ budynku Pałacu kultury MTZ. Ciaham nastupnaha tydnia, z 26 pa 31 sakavika, supracoŭniki KDB sprabavali paŭpłyvać na aktyvista praz baćku,
ale toj zajaviŭ, što syn nie budzie supracoŭničać navat pad pahrozaj vyklučeńnia z univiersiteta.
29 sakavika student napisaŭ tłumačalnuju z nahody novaha zatrymańnia. Krychu paźniej namieśnik dekana zapatrabavaŭ u aktyvista napisać papieru ab tym, što jon «nie budzie ŭdzielničać u palitycy i hramadskaj dziejnaści». Adnak paźniej zajaviŭ, što nieabchodnaść u napisańni takoj papiery źnikli.