Dakumienty na rehistracyju inicyjatyŭnaj hrupy pa źmianieńni vybarčaha zakanadaŭstva buduć pieradadzienyja ŭ Centrvybarkam da 20 maja. Pra heta paviedamiŭ kiraŭnik hrupy kandydat u prezidenty na vybarach 2010 hoda Dźmitryj Us 3 maja napres-kanfierencyi ŭ Minsku.
Pavodle jaho słoŭ, schod inicyjatyŭnaj hrupy prajšoŭ 1 maja «ŭ poŭnaj adpaviednaści ź biełaruskim zakanadaŭstvam». «My čatyry razy źviartalisia ŭ Minharvykankam pa dazvoł na praviadzieńnie schodu. Ale kožny raz nam admaŭlali. Tym nie mienš, abaviazkovaha dazvołu na praviadzieńnie schodu inicyjatyŭnaj hrupy zakon nie patrabuje», — skazaŭ jon.
Us paviedamiŭ, što schod inicyjatyŭnaj hrupy prachodziŭ u Minsku na placoŭcy pierad budynkam pa vulicy Navatarskaj. U mierapryjemstvie ŭziali ŭdzieł 151 čałaviek z 300 členaŭ inicyjatyŭnaj hrupy.
Inicyjatyŭnaja hrupa maje namier unieści ŭ vybarčaje zakanadaŭstva nastupnyja papraŭki: dać kandydatam u prezidenty i deputaty prava na ŭklučeńnie ich pradstaŭnika va ŭčastkovyja vybarčyja kamisii; abaviazać vybarčyja kamisii pry padliku hałasoŭ vystaŭlać na ahlad naziralnikaŭ kožny biuleteń; dać prava kožnamu členu ŭčastkovych kamisij stavić svaje podpisy na vybarčych biuleteniach.
Us taksama zaznačyŭ, što ŭ inicyjatyŭnuju hrupu ŭvachodziać «prostyja hramadzianie». Pavodle jaho słoŭ, apazicyjnyja struktury pramoha sadziejańnia ŭ praviadzieńni schodu nie akazvali.
Nieabchodnaść źmianieńnia vybarčaha zakanadaŭstva była adnoj z hałoŭnych idej pieradvybarnaj prahramy Dźmitryja Usa na prezidenckich vybarach 2010 hoda. Mierkavanyja papraŭki, na dumku Usa, dazvolać paźbiehnuć niezakonnaha ŭkidvańnia ŭ skryni padčas daterminovaha hałasavańnia i falsifikacyj padčas padliku hałasoŭ.
