Dziasiatki tysiač ludziej vyjšli na vulicy Maskvy, kab patrabavać pieravybaraŭ i realnaj demakratyi. Jany pratestavali suprać karumpavanaj ułady Pucina. Na pravakacyi siłavikoŭ manifiestanty adkazali adekvatna.
Na Bałotnaj płoščy demanstranty pavalili zaharodki.
Dziasiatki tysiač ludziej uziali ŭdzieł u šeści.
Kreml byŭ atočany patrojnym kardonam siłavikoŭ.
Najbolš arhanizavanaj była kałona Levaha frontu na čale z Udalcovym.
Siadziačy strajk u Maskvie.
Kab sarvać abo skamiečyć mitynh apazicyi, rasijskija ŭłady išli na ŭsialakija chitryki. Sprava skončyłasia masavymi sutyknieńniami. Situacyja nahadvała mitynh paśla letašnich vybaraŭ u Dumu z toj roźnicaj, što tady ŭ šeści i sutyčkach uziali ŭdzieł kala piaci tysiač čałaviek, a siońnia — da sta tysiač.
Na hora dla pucincaŭ, pratesty ŭ Maskvie ŭsio macniej zhurtoŭvajuć jak pravych, tak i levych krytykaŭ ciapierašniaj sistemy.
Spačatku ŭłady nie davali dazvołu na šeście ŭ centry. Urešcie dali, tady pačalisia inšyja padkopy: aktyvistaŭ apazicyi, što kiravalisia ŭ Maskvu, zatrymlivali na rehijanalnych vakzałach. Vajenkamy pałochali moładź, što źjavicca ŭ Maskvie, zaboram u sałdaty. Narešcie, ułady puścili ŭ chod ciažkuju artyleryju: brehietanosiec-patryjarch Kirył na admysłovym mitynhu asudziŭ tych, chto zaklikaje da nieviadomaha novaha. Siońnia byli zabłakavanyja samyja papularnyja apazicyjnyja sajty.
Tym nie mienš, na Jakimancy sabralisia dziasiatki tysiač ludziej. Navat i tut ułady sprabavali dezarhanizavać pratest. Stancyi mietro ŭ centry Maskvy zakryli. Było pastaŭlena mała ramak ź mietałašukalnikami, utvaryłasia šturchanina. Zatoje na vulicy vyvieli dziasiatki aktyvistaŭ prakramloŭskaj moładzi ŭ kaściumach cyrkavych błaznaŭ, staŭby zakleili abraźlivymi ŭlotkami. Karaciej, zrabili ŭsio, kab spravakavać.
Na Jakimancy adbyŭsia trahičny vypadak: fatohraf zalez na vysoki bałkon doma, kab źniać demanstrantaŭ, ale sarvaŭsia i zabiŭsia naśmierć.
Kulminacyjaj napružańnia staŭ momant, kali palicyja sprabavała raśsiačy manifiestantaŭ na padychodach da Bałotnaj płoščy, dzie mantavali scenu mitynhu. Bałotnaja płošča była, na dumku palicyi, pierapoŭniena ludźmi, i śpiecnaz prosta pierastaŭ puskać tudy ludziej. Lidary apazicyi, u tym liku Alaksiej Navalny i Siarhiej Udalcoŭ, paličyli heta sprobaj zanizić kolkaść udzielnikaŭ akcyi. Jany zładzili siadziačy pratest kala kinateatra «Udarnik», što la Kramla.
Miž tym siłaviki ŭspryniali siadziačy pratest jak pravakacyju: pucincy bajalisia ŭźniknieńnia majdana ŭ centry Maskvy, jaki im było b ciažka razahnać.
Na hety momant na Bałotnaj płoščy ŭžo znachodziłasia kala 60 tysiač čałaviek. Častka ź ich pajšła nazad da «Udarnika».
AMAP žorstka cisnuŭ na ludziej, jakija chacieli pakinuć płošču. Tyja adkazali taksama siłaj. U vyniku na podstupach da Bałotnaj płoščy ludzi pavalili niekalki mietałašukalnikaŭ i ŭtvaryłasia ciskanina. Paśla hetaha siłaviki dali ludziam prajści.
Natoŭp skandavaŭ: «My nie sydziem!».
«My sfarmulavali 3 patrabavańni: pradastaŭleńnie apazicyi na praciahu hadziny žyvoha efiru na fiederalnych kanałach, admiena inaŭhuracyi prezidenta Pucina i pierapryznačeńnie vybaraŭ prezidenta i parłamienta», — skazaŭ Siarhiej Udalcoŭ, dadaŭšy, što ciapier na Bałotnaj i ŭ jaje vakolicach sabrałasia da 100 tysiač čałaviek.
Bajučysia šturmu Kramla, palicyja pačała razhaniać demanstrantaŭ i pierajšła da maštabnych zatrymańniaŭ la kinateatra «Udarnik».
U adkaz anarchisty razam z ultrapravymi radykałami prarvali kardon palicyi, ale byli spynienyja žaleznaj aharodžaj i dubinkami žaŭnieraŭ unutranych vojskaŭ. U pravaachoŭnikaŭ lacieli fajery i ciažkija pradmiety.
Kala 10 tysiač manifiestantaŭ zastavalisia na Bałotnaj płoščy da 19-j hadziny pa maskoŭskim časie. Adnak usie sproby pastavić namioty ŭ rajonie Vialikaha kamiennaha mosta spyniŭ śpiecnaz. Apošnija sutyčki byli zafiksavany pozna ŭviečary.
Zatrymanyja lidary apazicyi Alaksiej Navalny (nacyjanalist), Siarhiej Udalcoŭ (Levy front), Barys Niamcoŭ (libierał). Ahulnaja kolkaść zatrymanych skłała kala 650 čałaviek.
Rasijski lud sapsavaŭ zaŭtrašniuju inaŭhuracyju Pucina, jaki kiruje Rasijaj užo 13-y hod. Adnačasova na Pakłonnaj hary adbyŭsia mitynh prychilnikaŭ Pucina. Na jaho sabrałasia kala troch tysiač čałaviek, ale palicyja zajaviła pra 30 tysiač.
