Vatykanski ijerarch: «Biełaruskaja hreka-katalickaja carkva paŭstała z popiełu»

Archibiskup Kirył Vasil mieŭ sustrečy ŭ MZS, Kamitecie pa spravach relihijaŭ, maliŭsia ŭ Słonimie pierad ikonaj Žyrovickaj Maci Božaj, u Ivacevičach, dzie jon ušanavaŭ pamiać zakatavanaha hiestapa hreka-katalickaha ekzarcha Biełarusi Antona Niemanceviča i spalenych u 1942 hodzie hreka-katalickich viosak, a taksama ŭ Chatyni — u pamiać achviaraŭ minułaj vajny.

Aprača taho, vatykanski ijerarch znajomiŭsia z žyćciom biełaruskich hreka-katalikoŭ, a taksama ryma-katalikoŭ i pravasłaŭnych chryścijanaŭ. Zaŭtra jon sustreniecca z pravasłaŭnym mitrapalitam Fiłaretam.

Na pres-kanfierencyi, aceńvajučy stan Hreka-katalickaj carkvy Biełarusi z punktu hledžańnia razbudovy struktur, jon nazvaŭ jaje pakul što biednaj i słaboj:

«Jość peŭnyja aśpiekty, jakija treba raźvivać, uzmacniać i naroščvać. Što da inšaha žyćcia carkvy, jakoje datyčyć viery, sumleńnia, siamji, to tut Biełaruskaja hreka-katalickaja carkva zrabiła vialiki krok napierad, bo heta carkva, jakaja adradziłasia z popiełu, jak ryma-katalickaja i pravasłaŭnaja cerkvy. Paśla doŭhaha času pieraśledu i źniščeńnia carkvy ŭ Biełarusi heta sapraŭdny cud — toje, što adbyvacca z carkvoj, jaje adnaŭleńnie ŭ Biełarusi. Heta znak taho, što jana žyvaja».

Pavodle vatykanskaha ijeierarcha, tema razbudovy struktury Biełaruskaj hreka-katalickaj carkvy źjaŭlajecca aktualnaj, i hetaje pytańnie budzie abmiarkoŭvacca ź inšymi kampietentnymi orhanami Śviatoha pasadu, a taksama z katalickimi ijerarchami ŭ Biełarusi:

«Hetaje pytańnie blizkaje majmu sercu. Jano budzie abmiarkoŭvacca z usioj uvahaj, jakaja jamu naležyć. Ale havaryć pra kankretnyja formy i sposaby jaho vyrašeńnia jašče zaŭčasna».

Archibiskup Kirył Vasil paviedamiŭ, što padčas jahonaha znachodžańnia nie abmiarkoŭvałasia tema mahčymaha vizitu papy rymskaha ŭ Biełaruś:

«Ale ja viedaju, što da hetaj temy jość vialikaja cikavaść. Takoje hipatetyčna mahčyma ŭ budučyni, i mnohija chočuć, kab heta adbyłosia. Heta adbudziecca tady, kali abodva baki buduć hatovyja nadać hetaj padziei sapraŭdnaje značeńnie».

Archibiskup Kirył Vasil uziaŭ udzieł u kanfierencyi «Značeńnie tradycyi chryścijanskaha Uschodu dla suśvietnaj carkvy», jakaja prajšła ŭ pierapoŭnienaj kanfierenc-zale Čyrvonaha kaścioła. Da hetaj kanfierencyi było prymierkavana adkryćcio vystavy akvarelaŭ Źmitra Mšara «Unijackaja architektura Biełarusi».

• 0
• 0
• 0
• 0
• 0
• 0
• 0
• 0