Miaśnikovič pieradaŭ Miadźviedzievu pryvitańnie ad Łukašenki
Adbyŭsia abmien kamplimientami na ŭzroŭni ŭradaŭ.
Prem'jer-ministr Rasii Dźmitryj Miadźviedzieŭ aptymistyčna aceńvaje ciapierašnija adnosiny ź Biełaruśsiu. «Na moj pohlad, siońnia jany pieražyvajuć vielmi dobry čas Jany viedali roznyja časy, ale ciapier heta čas vielmi dobry, bo, akramia taho što jość palityčnaje parazumieńnie pa ŭsich pytańniach, jość i pośpiechi ŭ ekanomicy», — zajaviŭ Miadźviedzieŭ 29 maja padčas razmovy ź biełaruskim kaleham Michaiłam Miaśnikovičam u Turkmienistanie, dzie adbudziecca pasiadžeńnie Savieta kiraŭnikoŭ uradaŭ krain — udzielnic SND.
«Ja pahladzieŭ: tavarazvarot raście, jon užo nabližajecca da 40 młrd dalaraŭ pa vynikach minułaha hoda. Heta vynik aktyŭnaj pracy dvuch uradaŭ, pradprymalnikaŭ dźviuch krain, ale i vynik stvareńnia Mytnaha sajuza», — padaje słovy Miadźviedzieva pres-słužba Biełaha doma.
Rasiejski premjer «jašče raz zaprasiŭ Miaśnikoviča ŭ Sankt-Pieciarburh, dzie 15 červienia projdzie sustreča kiraŭnikoŭ uradaŭ Mytnaha sajuza». U svaju čarhu kiraŭnik biełaruskaha ŭrada «paćvierdziŭ namier uziać udzieł u sustrečy ŭ Sankt-Pieciarburhu. Jon taksama pavinšavaŭ Miadźviedzieva z pryznačeńniem jaho na pasadu prem'jer-ministra i abrańniem lidaram kirujučaj partyi «Adzinaja Rasija».
Miaśnikovič pieradaŭ rasijskamu premjeru «pryvitańnie ad biełaruskaha prezidenta A. R. Łukašenki». Jon adznačyŭ, što ŭ Biełarusi rychtujucca da vizitu prezidenta Rasii Uładzimira Pucina. «Tak, heta vielmi važnaja padzieja ŭ historyi našych adnosin, tamu što svoj pieršy vizit Uładzimir Uładzimiravič Pucin jak novy prezident ździajśniaje mienavita ŭ Biełaruś», — skazaŭ Miadźviedzieŭ (cytata padadzienaja bieź źmienaŭ).
Prem'jer-ministry krain SND 30 maja abmiarkujuć 30 pytańniaŭ. Jany, u pryvatnaści, razhledziać kancepcyju libieralizacyi rynku finansavych pasłuh dziaržaŭ SND. Asablivaja ŭvaha budzie nadadzienaja padrychtoŭcy pahadnieńnia ab supracoŭnictvie ŭ halinie intehravanaha valutnaha rynku. Płanujecca taksama pryniaćcie stratehii raźvićcia fizičnaj kultury i sportu da 2020 hoda i pahadnieńnia ab saviecie pa turyźmie. Premjery zaćvierdziać płan mierapryjemstvaŭ pa realizacyi stratehii mižnarodnaha maładziožnaha supracoŭnictva, paviedamiła pres-słužba biełaruskaha ŭrada.
Kamientary