U Homieli adbyłasia treciaja ekskursija cykła «Horad, jaki źnikaje»
Homielskaja maładziožnaja krajaznaŭčaja hramadskaja arhanizacyja «Tałaka» 29 maja praviała treciuju ekskursiju cykła «Horad, jaki źnikaje».
Hetym razam nieabyjakavym hamialčanam było prapanavana prajścisia pa rajonie staroha horada Zalinija. Pravodziŭ ekskursiju krajaznaŭca, navukovy supracoŭnik Vietkaŭskaha muzieja narodnaj tvorčaści Andrej Skidan. Na prahułku sabralisia prykładna 30 hamialčan. Udzielniki mieli mahčymaść daviedacca pra svojeasablivaści tradycyjnaj haradskoj zabudovy, u pryvatnaści aznajomicca z admietnaściami siadzibnaj draŭlanaj architektury, ubačyć adnu ź niamnohich poŭnaściu brukavanych jašče z darevalucyjnych časoŭ vulic.
«Homielski „zaliniejny“ rajon — častka horada, jakaja pačała zabudoŭvacca za linijaj čyhunki, adkul i atrymała svaju nazvu. Asnoŭnymi žycharami rajona byli čyhunačnyja słužačyja i rabočyja.U svajoj masie jon składajecca z adnapaviarchovaj zabudovy prysiadzibnaha typu. Heta nievialikaja častka jašče mała kranutaha staroha Homiela. Ale tradycyjnaja histaryčnaja draŭlanaja zabudova horada znachodzicca pad pahrozaj poŭnaha źniščeńnia. Zhodna ź niadaŭna zaćvierdžanym novym hienpłanam raźvićcia horada, usiu adnapaviarchovuju zabudovu ŭ centry horada, niahledziačy na jaje histaryčnuju, architekturnuju ci mastackuju kaštoŭnaść, płanujuć źnieści», — paviedamiŭ BiełaPAN staršynia «Tałaki» Jaŭhien Mierkis.
Namahańni homielskich historykaŭ i aktyvistaŭ pa stvareńni śpiecyjalnych achoŭnych zon ci muziejaŭ pad adkrytym niebam, pavodle słoŭ Mierkisa, pakul zastajucca daremnymi.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym2
Kamientary