Za čatyry miesiacy 2012 hoda ŭ Mahilovie pazbavilisia baćkoŭskaj apieki 52 dziciaci, ź jakich 11 — da troch hadoŭ. Takija danyja byli apublikavanyja 6 červienia na pasiadžeńni Mahiloŭskaha harvykankama.
Namieśnik staršyni kamisii pa spravach niepaŭnaletnich harvykankama Alena Trockaja adznačyła, što za anałahičny pieryjad 2011 hoda było pryniata rašeńnie zabrać 26 dziaciej, jakija majuć patrebu ŭ dziaržaŭnaj abaronie.
«Kolkaść dziaciej, jakija majuć patrebu ŭ dziaržaŭnaj abaronie, pavialičyłasia ŭ dva razy, pry hetym 63,5% haradskoha pakazčyku daŭ Leninski rajon, — zajaviła Trockaja. — Asnoŭnaja pryčyna pastanoŭki na ŭlik i zabrańnia dziaciej źviazana sa złoŭžyvańniem ałkaholem baćkami».
Pavodle jaje słoŭ, za čatyry miesiacy 2012 hoda ŭ bijałahičnyja siemji było viernuta 33,3% zabranych raniej dziaciej (12 z 36), što na 20% nižej za pakazčyk minułaha hoda.
U toj ža čas u Mahilovie źniziłasia kolkaść dziaciej, jakija znachodziacca ŭ sacyjalna niebiaśpiečnym stanoviščy, — 517 za čatyry miesiacy 2012 hoda ŭ paraŭnańni z 659 za anałahičny letašni pieryjad. Niepaśpiachovymi na hety čas u horadzie źjaŭlajucca 330 siemjaŭ.
Tym časam, jak ličać u kamisii, čym raniej pryznajuć, što dzieci znachodziacca ŭ sacyjalna niebiaśpiečnym stanoviščy, tym chutčej u ich siemjach moža narmalizavacca situacyja.
