«Biełtelekam» vyjšaŭ sa składu zasnavalnikaŭ «BiełSieł»

Respublikanskaje ŭnitarnaje pradpryjemstva «Biełtelekam», jakoje vałodała 50% sotavaha apieratara TAA SP «BiełSieł», vyjšła sa składu jaho zasnavalnikaŭ.

«Ciapier udzielnikami kampanii źjaŭlajucca niderłandskaje pradpryjemstva CIB BV i biełaruskaje ZP „Džaraš“ z kiprskim kapitałam», — paviedamili BiełaPAN u pres-słužbie «BiełSieł». «Biełtelekam» vyjšaŭ sa składu zasnavalnikaŭ u sakaviku hetaha hoda. Padrabiaznaści źmien u składzie zasnavalnikaŭ pradpryjemstva ŭ pres-słužbie nie ŭdakładniajuć.

Sotavy apieratar taksama paviedamlaje, što «Biełtelekam» admoviŭsia ad akazańnia pasłuh WLL na bazie sietki TAA SP «BiełSieł» z 1 lipienia 2012 hoda. Prajekt WLL byŭ zapuščany ŭ 2007 hodzie i vyrašaje prablemu «apošniaj mili», zabiaśpiečvajučy suviaźziu terytoryi, dzie niavyhadna prakładvać telefonnyja kabieli (naprykład, u addalenych sielskich rajonach).

Na siońnia pasłuhami WLL na bazie sietki «BiełSieł» karystajucca bolš jak 170.000 abanientaŭ «Biełtelekama». Zaraz kampanija «BiełSieł» ažyćciaŭlaje zakupku novaha terminalnaha abstalavańnia dla akazańnia hałasavych pasłuh i pasłuh vysakachutkasnaj pieradačy danych pavodle technałohii 3G usim zacikaŭlenym asobam, u tym liku abanientam WLL.

Novaje terminalnaje abstalavańnie dastupna dla papiaredniaj zamovy na sajcie kampanii. Prodaž pačniecca ŭ lipieni adnačasova z padklučeńniem na śpiecyjalna raspracavany taryfny płan.

Jak paviedamiŭ u pres-relizie hienieralny dyrektar TAA SP «BiełSieł» Viktar Novikaŭ, zasnavalnikami kampanii pryniata rašeńnie ab arhanizacyi doślednaj zony LTE da kanca 2012 hoda. «Zaraz viaducca pieramovy ź niekalkimi pastaŭščykami abstalavańnia dla arhanizacyi testavaj zony LTE na častacie 450 MHc. U zaležnaści ad vynikaŭ budzie pryniata rašeńnie ab kankretnaj technałohii, jakuju kampanija budzie vykarystoŭvać dla dalejšaha raźvićcia — LTE abo EVDO Rev. B. Adznaču, što stanoŭčy vopyt pa arhanizacyi testavaj sietki LTE na častacie 450 MHc atrymany ŭ Brazilii, dzie da kanca 2013 hoda płanujecca akazvać pasłuhi LTE na bolšaj častcy terytoryi krainy», — zaznačyŭ hiendyrektar.

***

TAA SP «BiełSieł» utvorana ŭ 1992 hodzie. U žniŭni 2002 hoda ŭ licenziju byli ŭniesieny papraŭki, jakija dali «BiełSieł» prava na stvareńnie sietki cdma2000. U červieni 2006 hoda apieratar uvioŭ u kamiercyjnuju ekspłuatacyju technałohiju pieradačy danych 3G (treciaha pakaleńnia) EV-DO. U lipieni 2008 hoda adbyŭsia zapusk technałohii vysakachutkasnaj mabilnaj pieradačy danych EV-DO Rev. A.

Terytoryja pakryćcia sietki achoplivaje 93% haradskoha nasielnictva Biełarusi. U «BiełSieł» prykładna 170 tysiač abanientaŭ pasłuh pavodle technałohii WLL i krychu bolš za 11 tysiač abanientaŭ inšych pasłuh suviazi.

• 0
• 0
• 0
• 0
• 0
• 0
• 0
• 0