Fiederalnaja mytnaja słužba Rasii ličyć, što pad vyhladam praduktaŭ naftachimii Biełaruś ekspartuje naftapradukty, piša hazieta «Iźviestija» sa spasyłkaj na krynicu viedamstva.
Hetyja tavary nie abkładajucca ekspartnaj pošlinaj pry vyvazie za miežy Mytnaha sajuza, i adpaviedna, Rasija nie atrymlivaje za ich hrošy.
Pavodle pahadnieńniaŭ, padpisanych Rasijaj i Biełaruśsiu, respublika atrymlivaje naftu i naftapradukty biaspošlinna i pa značna bolš nizkich ŭnutryrasijskich cenach, a zatym pierapracoŭvaje i pradaje ŭ inšyja krainy. Adnak pry pastaŭkach naftapraduktaŭ za miežy Mytnaha sajuza Biełaruś abaviazałasia pieraličvać u rasijski biudžet ekspartnyja pošliny. Pavodle dadzienych Fiederalnaj mytnaj słužby (FMS), u 2011 hodzie Rasija pastaviła ŭ Biełaruś 18,1 młn t syroj nafty rynkavym koštam $7,44 młrd i 5,6 młn t naftapraduktaŭ na sumu $3,3 młrd.
FMS zacikaviła značnaje pavieličeńnie pastavak rastvaralnikaŭ i arhaničnych rastvaralnikaŭ ź Biełarusi. U 2011 hodzie kraina ekspartavała ŭ 8,6 razu bolš «chimii», čym u 2010 hodzie (2073 tys. t suprać 242 tys. t) — na ahulnuju sumu kala $1,5 młrd. Dla paraŭnańnia: Rasija ekspartuje ŭsiaho 16,9 tys. t rastvaralnikaŭ.
Pavodle dadzienych Minfina RF, što dałučyŭsia da rasśledavańnia, u studzieni 2012 hoda ekspart vyras u 125 razoŭ u paraŭnańni z anałahičnym pieryjadam minułaha hoda. Bolšaja častka pastavak u 2011 hodzie prypała na Łatviju — 73%, jašče 23% — na Niderłandy, kudy Biełaruś hetuju pradukcyju raniej nie pastaŭlała.
FMS adznačaje sinchronnaje pavieličeńnie pastavak biełaruskich rastvaralnikaŭ u Łatviju (u 6,3 razu) i pavieličeńnie ŭvozu ŭ Biełaruś naftapraduktaŭ z Rasii (taksama ŭ 6,3 razu).
«Sinchronnaje pavieličeńnie ŭ 6,3 razu abjomaŭ uvozu z Rasii naftapraduktaŭ i abjomaŭ vyvazu ŭ Łatviju rastvaralnikaŭ dazvalaje vykazać zdahadku, što rastvaralnik moža być tavaram prykryćcia», — kaža krynica ŭ FMS.
Minenierha RF pasprabavała vyśvietlić u biełaruskaha boku, jaki abjom rastvaralnikaŭ vyrablajecca na zavodach krainy, adnak kancern «Biełnaftachim» adkazaŭ viedamstvu, što zbor hetych dadzienych kancernam na rehularnaj asnovie nie ažyćciaŭlajecca.
