“Jana była dastaŭlena supracoŭnikami milicyi. Tam była zajava. Zajava z podpisami, ale biaz proźviščaŭ. Ale z podpisami. Jana pastupała z nakiravańniem na prymusovuju špitalizacyju”.
Hramadzkaja aktyvistka Kryścina Šacikava padała ŭ Mahiloŭskuju prakuraturu skarhu na hvałtoŭnaje źmiaščeńnie ŭ psychijatryčny špital, dzie jaje utrymlivali ź viečara piatnicy, 23 sakavika, da paniadziełka, 26 sakavika. Jak tłumačać pryčyny prymusovaj dastaŭki ŭ špital i abychodžańnie tam z Kryścinaj Šacikavaj aficyjnyja pradstaŭniki?
Hałoŭny psychijatar Ministerstva achovy zdaroŭja Biełarusi Pavał Rynkoŭ pra vypadak z Šacikavaj nia čuŭ.
“Ja pra heta ničoha nia viedaju. Dzie heta było? Mahileŭski psychijatryčny špital? Treba tudy telefanavać. Tam jość hałoŭny psychijatar, hałoŭny lekar, jany pavinny viedać, što tam adbyłosia”.
”Jana pastupała z nakiravańniem na prymusovuju špitalizacyju...”
Da hałoŭnaha psychijatra Mahiloŭskaj vobłaści i adnačasova hałoŭnaha lekara psychijatryčnaha špitalu Valerja Bialanina datelefanavacca nie udałosia – u jaho dva pracoŭnyja miescy, i pastajanna jon byŭ u darozie. Zahadčyca vośmaha adździaleńnia špitalu, dzie ciaham troch dzion znachodziłasia Šacikava, Ała Ucionyšava paćvierdziła, što Kryścinu pryvieźli ŭ piatnicu paśla 18-j hadziny:
“Jana była dastaŭlena supracoŭnikami milicyi. Tam była zajava. Zajava z podpisami, ale biaz proźviščaŭ. Ale z podpisami. Jana pastupała z nakiravańniem na prymusovuju špitalizacyju”.
Prymusovaja špitalizacyja, zhodna z Zakonam ab psychijatryčnaj dapamozie, ažyćciaŭlajecca pavodle troch punktaŭ: kali čałaviek ujaŭlaje pahrozu dla siabie albo asiarodździa. Kali jon nia dziejazdolny. I kali nieakazańnie psychijatryčnaj dapamohi pryviadzie da paharšeńnia stanu chraničnaha chvoraha. Šacikavu dastavili jak čałavieka, jaki niasie pahrozu, patłumačyli lekary.
Pres-sakratar Mahiloŭskaha abłasnoha Upraŭleńnia KDB Taciana Šaŭcova paviedamiła, što 23 sakavika sapraŭdy Kryścinu Šacikavu vyklikali ŭ KDB, dapytali jak śviedku ŭ kryminalnaj spravie, zaviedzienaj pa artykułu 193 i adpuścili.
”Jaje dapytali jak śviedku i adpuścili na usie čatyry baki...”
“Što tyčycca inšaj infarmacyi, to my joj prosta nie vałodajem”, – zajaviła Taciana Šaŭcova.
Karespandentka: “KDB nia maje dačynieńnia da jaje prymusovaj dastaŭki ŭ špital?”
Šaŭcova: “Tak, KDB nie vałodaje infarmacyjaj pra heta. Jaje dapytali jak śviedku i adpuścili na usie čatyry baki. A jak tam što było dalej...”
Zahadčyca adździaleńnia Mahiloŭskaha psychijatryčnaha špitalu Ała Ucionyšava kaža: nie špitalizavać Šacikavu lekary nie mahli. Što tyčycca psychijatryčnaj ekspertyzy, usio praviedziena zhodna z Zakonam:
“My abaviazanyja ciaham troch dzion jaje pravieści. Što my i zrabili. Heta z ulikam vychodnych. Kali jana trapiła b da nas u budni dzień – my pahladzieli b jaje na nastupny dzień”.
”U jaje było ŭzbudžeńnie ŭ adździaleńni, niematyvavanaje, nieabhruntavanaje...”
U paniadziełak kamisija z šaści psychijatraŭ pryznała, što Šacikava nie ujaŭlaje pahrozy, i jaje adpuścili sa špitalu. Što da vykarystańnia tak zvanaj fiksacyi – praściej kažučy, pryviazvańnia pacyjentki da łožku, zahadčyca adździaleńnia skazała:
“Nijakaj fiksacyi nie było. Tak, u jaje było ŭzbudžeńnie ŭ adździaleńni, niematyvavanaje, nieabhruntavanaje. Ale jaje nichto nie fiksavaŭ. Kali b była fiksacyja, ślady ad jaje b byli. Jak ad udaŭki ślady”.
Što da ŭviadzieńnia lekavych preparataŭ, psychijatar Ucionyšava patłumačyła:
“Akramia adnaho-adzinaha sebazonu ničoha jana nie atrymoŭvała. Heta adnosicca da hrupy narkatyčnych preparataŭ, ale nie narkotyk. Jon prosta vyklikaje zaležnaść, kali prymać jaho bolš za miesiac. Tamu hetyja preparaty ŭ nas śpisvajucca, i ampuły zdajucca. Ujaŭlajecie, kali napisać adno, a uvieści druhoje, to dzie uziać ampułu? Sebazon – heta lohki trankvilizatar, a nia niejki tam psychatropny zabojny. Heta nie halucynahien ni ŭ jakim vypadku”.
Takim čynam, zastajecca tajamnicaj, chto dastaviŭ Šacikavu ŭ psychijatryčny špital.
«Hałoŭnaje — heta vopyt!» Łukašenka nazvaŭ, kaho bačyć nastupnym prezidentam14
Kamientary