Ryełtar Bašarymaŭ piša z «amierykanki»: «Budu za siabie zmahacca»
Dziaŭčyna Bašarymava raskazała pra svajo zatrymańnie i toje, što viedaje pra svajho chłopca.
Minčanka Iryna Łahojka nazyvaje siabie dziaŭčynaj Siarhieja Bašarymava, adnaho ź fihurantaŭ spravy pra plušavych miadźviedzikaŭ, jakoha, jak i žurnalista Antona Surapina, trymajuć u SIZA KDB pa padazreńni ŭ spryjańni hrupie asobaŭ u niezakonnym pierasiačeńni dziaržaŭnaj miažy. Iryna raskazała pra svajo zatrymańnie KDB i toje, što viedaje pra Siarhieja Bašarymava.
«Mianie zatrymali ŭviečary 6 lipienia, pryjechali da mianie damoŭ try supracoŭniki KDB i skazali, što treba prajechać ź imi dla vyśviatleńnia abstavinaŭ. Prykładna ŭ taki ž čas, nastolki ja ciapier viedaju, zatrymali i Siarhieja. Ja była ździŭlenaja, ale asablivaha strachu nie było, bo kali ty viedaješ, što ničoha nie zrabiŭ niezakonnaha, to i nie baišsia. U KDB byŭ dopyt u kabiniecie śledčaha, ale jon zaciahnuŭsia da 12 nočy, i paśla hetaha mianie adviali ŭ kamieru ŭ “amierykanku“. Kamiera była takaja vuzkaja... Voś tam stała niepryjemna. Ja była ŭ šoku. Ranicaj dopyt praciahnuli, a potym dali mnie pračytać maje pakazańni i adpuścili. Padrabiaznaściaŭ dopytu raskazvać nie maju prava».
Pavodle Iryny Łahojka,
da zatrymańnia jana ničoha nie viedała pra historyju ź plušavymi miadźviedzikami, i tamu spačatku niekatoryja pytańni śledčaha byli dla jaje vielmi dziŭnymi.
Iryna Łahojka kaža, što ŭ KDB u jaje było ŭražańnie, što Siarhiej niedzie pobač, u tym ža budynku. Plus ź niekatorych pytańniaŭ na dopycie jana zrazumieła, što jaje chłopiec taksama zatrymany. Ale sami śledčyja pra heta ničoha nie kazali. Pra zatrymańnie Siarhieja joj raskazała jahonaja maci, ź jakoj dziaŭčyna sustrełasia paśla taho, jak jaje vyzvalili. Jany razam užo dvojčy adnosili Siarhieju pieradačy — ježu, adzieńnie, a taksama pieradavali papieru i kanvierty. Ad Siarhieja z 6 lipienia pryjšło ŭžo try listy.
«Piša, što trymajecca, što ŭsio narmalna ź im, što ni ŭ čym nie vinavaty i budzie za siabie zmahacca. Pra ŭmovy piša, što prymalnyja».
Charaktaryzujučy Siarhieja Bašarymava, Iryna adznačyła, što jon čałaviek vielmi pazityŭny i dobry, u jaho šmat siabroŭ, jakija jaho lubiać i pavažajuć. Siarhieju Bašarymavu 28 hadoŭ, jon skončyŭ Biełaruski instytut pravaznaŭstva. Pracuje ryełtaram na prafiesijnaj hlebie, ale bolš pra pracu svajho chłopca Iryna nie viedaje. Pavodle Iryny Łahojki Siarhiej Bašarymaŭ byŭ daloki ad palityki, jak i jana. Asnoŭnaje chobi Siarhieja Bašarymava — płavańnie dy inšyja vidy vodnaha sportu.
Iryna Łahojka kaža, što jany z maci Siarhieja nie padymali šumu pra jaho zatrymańnie, pakul nie minuła 10 dzion, bo čakali, što voś-voś raźbiarucca i adpuściać. A ciapier vyrašyli źviarnucca da žurnalistaŭ.
«Usie za jaho pieražyvajuć, bo viedajuć, što jon ničoha takoha nie moh zrabić. I navošta tak doŭha trymać čałavieka? Heta ž i psichałahična łamaje, i pracy škodzić, i zdaroŭju». Pavodle słovaŭ dziaŭčyny, spačatku Siarhieju Bašarymavu dali dziažurnaha advakata, ale ciapier svajaki damovilisia pra abaronu Siarhieja ź inšym advakatam.
Pavodle adnoj ź viersij, Siarhiej Bašarymaŭ byŭ tym ryełtaram, praź jakoha zamovili ŭ Minsku kvateru šviedy, što dapamahali svaim siabram u palocie nad Biełaruśsiu. Per Kromveł, adzin z arhanizataraŭ hetaha pralotu, kazaŭ, što sustrakaŭsia ź Siarhiejem Bašarymavym jak ryełtaram u traŭni, ale ŭ lipieni nie bačyŭsia ź im, a tolki dasłaŭ jamu SMS z admovaj ad kvatery.
KDB dahetul aficyjna nie pryznaŭ, što Siarhiej Bašarymaŭ zatrymany i źmieščany ŭ izalatar KDB.
Kamientary