Biełaruski śpieŭ i tancy ŭ sercy Amieryki + fota 2
U subotu ŭ amierykanskim Saŭt-Ryviery prajšoŭ tradycyjny biełaruski fiestyval.
Biełaruski karahod. Na zadnim planie - Biełaruska-amerykanski hramadzki centar u Saŭt-Ryvery, pabudavany ŭ 1975 h.
Tancavalny hurtok, u centry - jaho kiraŭnička, 90-hadovaja Viła Laŭčuk.
Prezientacyja biełaruskaj pjesy "Cacačnaja krama" ŭ zali hramadskaha centru.
Maładoje pakaleńnie śpiavaje biełaruskija pieśni. U centry - pradstaŭnica novaj chvali emihracyi Taćciana Dziamieščyk.
U subotu 4 žniŭnia biełaruska-amierykanskaja hramada ŭ horadzie Saŭt-Ryver, štat Ńju-Džersi, adśviatkavała svoj hadavy festyval.
Padzieja hetaja adbyłasia ŭ nievialikaj parkavaj zonie Biełaruska-Amierykanskaha Centru, što pry carkvie Śv. Eŭfrasińni Połackaj. U prahramie festyvalu byli pieśni, karahody, tancy, valejbolnaja hulnia.
Pracavała tradycyjnaja kuchnia z žaraninaj, hałubcami, blinčykami dy inšymi prysmakami. Adbyłasia taksama bahataja latareja. Ad haračaha dnia možna było achaładzicca ŭ zali z kandycyjaneram dy chałodnymi napojami.
Asablivaściu sioletniaha festyvalu była prysutnaść dvanaccaci asobaŭ haściej ź Biełastoččyny, jakija pryvieźli z saboju pjesu «Cacačnaja krama» aŭtarstva Leanida Drańka-Majsiuka na muzyku Hanny Babik.
Paśla pakazu pjesy adbylisia na traŭniku, što pamiž budynkam centru i carkvoj, tancy i śpievy, u jakich vystupili i biełastockija hości — hrupa starejšych vučniaŭ z nastaŭnicami-apiakunkami Barbaraj Piakarskaj i Alinaj Vaŭraniuk. Na nastupny dzień hości naviedali carkvu Žyrovickaj Božaj Maci ŭ susiednim z Saŭt-Ryveram horadzie Hajlend-Park, dzie taksama vystupili z pakazam pjesy dy infarmacyjaj pra biełaruskuju adukacyjna-kulturnuju dziejnaść na Biełastoččynie.
Saŭt-Ryver — horad u centralnaj častcy štata Ńju-Džersi. Biełarusy stali pierasialacca siudy ŭ kancy XIX st., hnanyja ekanamičnym kryzisam z Rasijskaj imperyi. U pačatku XX st. słavianskija vychadcy ź Biełarusi składali ŭ Saŭt-Ryviery da traciny nasielnictva, zasialiŭšy pieravažna paŭdniovuju častku horada. Mienavita emihranty z vakolic Maładziečna i Vialejki pabudavali ŭ S-R. carkvu Śviatych Piatra i Paŭła, tady ŭ jurysdykcyi RPC.
Źbiełarusizavaŭsia Saŭt-Ryver u pačatku 1950-ch ź pierasialeńniem u jaho niekalkich dziasiatkaŭ biełaruskich emihrantaŭ ź lahieroŭ dla pieramieščanych asob u Niamieččynie. Biełarusy zasnavali prychod Śv. Eŭfrasińni Połackaj u jurysdykcyi Kanstancinopalskaha patryjarchatu, zbudavali carkvu, Biełaruska-amerykanski hramadzki centar. U Saŭt-Ryvery dziejničali i dziejničajuć ciapier niekalki hramadzkich i sacyjalnych arhanizacyj, vydavalisia hazety i časopisy. Časopis «Biełaruskaja dumka» — nia błytać z hihinskim! — vydajecca i pa siońnia. U rysie horadu znachodziacca asobnyja biełaruskija mohiłki.
Aktyŭnaje biełaruskaje žyćcio praciahvajecca ŭ haradku. Tak, 25 sakavika 2012 h. u Saŭt-Ryvery adznačyli Dzień Voli, ŭźniaćciem nacyjanalnaha ściaha kala budynku haradzkoha muzeju.
U vieraśni 2010 h. u Saŭt-Ryvery prajšła tradycyjnaja sustreča biełarusaŭ ZŠA i Kanady.
