Kanaploŭ šukaje sustrečy z Hryzłovym, a Sidorski pajechaŭ da Łužkova
Kanaploŭ damoviŭsia pra asabistuju nieaficyjnuju sustreču z Barysom Hryzłovym, a Sidorski siońnia pravodzić pieramovy z meram Maskvy.
Kiraŭniki łukašenkaŭskaj administracyi aktyvizujuć kantakty na rasiejskim nakirunku.
Staršynia pałaty pradstaŭnikoŭ Uładzimier Kanaploŭ abvieściŭ, što maje spatkacca ŭ Maskvie z kiraŭnikom Dumy Barysom Hryzłovym. Jak paviedamlaje radyjo «Svaboda», U.Kanaploŭ choča prasić rasiejskaha kalehu dapamahčy «vypravić sajuznyja dačynieńni».
Uładzimier Kanaploŭ skazaŭ, što pra asabistuju nieaficyjnuju sustreču ŭ Maskvie z Hryzłovym jon damoviŭsia, kali niadaŭna byŭ prajezdam u stalicy Rasiei. Metu razmovy dvuch śpikieraŭ vyznačaje tak:
«Vielmi niaprostyja ciapier biełaruska-rasiejskija dačynieńni. I ŭsim nam, u tym liku i parlamentaram, nieabchodna pracavać, kab ich zrušyć ź miortvaha punktu. I tamu my budziem pieradusim pracavać praz tych deputataŭ, jakija ŭvachodziać u skład parlamenckaha schodu Biełarusi i Rasiei. Liču, što ŭ lubym vypadku Rasieja jość Rasieja, i našy dačynieńni nieabchodna palapšać».
U sieradu, 4 krasavika, u Maskvie vypraviŭsia i biełaruski premjer Siarhiej Sidorski. Adnak hety vizyt nie aficyjny, i nie na ŭradavym uzroŭni. Jon maje sustrecca z meram Maskvy Jurjem Łužkovym. Hety nacyjanalistyčny palityk maje ciesnyja kantakty ź biełaruskim uradam.
Paśla kanfliktnaje zimy Rasieja spyniła cisk na administracyju A.Łukašenki, i biełaruski bok śpiašajecca vykarystać paŭzu dla taho, kab arhanizavać sustreču A.Łukašenki z Uładzimieram Pucinym. Ličycca, što takija spatkańni važnyja dla zachavańnia papularnaści kiraŭnika Biełarusi. Akramia taho, rost adjemnaha salda ŭ zamiežnym handli vymušaje šukać zapasnyja aeradromy na rasiejskim rynku. Ekspart tavaraŭ ź Biełarusi u Eŭrasajuz źniziŭsia ŭ studzieni-lutym na čverć, paśla taho jak Rasieja źmienšyła lhoty na pastaŭki nafty ŭ Biełaruś. U vyniku Biełaruś zaprasiła ŭ Rasieja hihancki stabilizacyjny kredyt (1,5 młrd dalaraŭ). Pasoł Rasiei ŭ Biełarusi paćvierdziŭ hatoŭnaść taki kredyt dać. Zastajecca daznacca, na jakim umovach.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym2
Kamientary